ENSINO
Mércores 30 de maio do 2007
O Concello de Carballo abrirá o vindeiro venres, 1 de xuño, o prazo de matrícula para participar do programa Concilia. Trátase dunha iniciativa da Concellaría de Muller, Sanidade e Emigración que pretende conciliar a vida laborar e familiar, permitíndolles ás nais e aos pais deixar aos seus fillos e fillas no centro de ensino desde as 7.30 horas até o comenzo da xornada escolar. O programa Concilia desenvólvese nos colexios Fogar, Bergantiños e Cristina e o prazo permanecerá aberto até o 15 de agosto.
CULTURA
Martes 29 de maio do 2007
A presentación do libro de Suso de Toro, Home sen nome, e o ciclo de concertos de Xoves Intérpretes porán o fin esta semana ao Programa das Letras do Concello de Carballo, que se está a desenvolver na localidade desde principios deste mes de maio. Hoxe martes, 29 de maio, terá lugar o primeiro dos concertos do ciclo Xoves Intérpretes, no Pazo da Cultura a partir das 19,00 horas.
OBRAS
Martes 29 de maio do 2007
A execución e explotación do tramo da vía de alta capacidade entre Carballo e Berdoias adxudicarase o vindeiro mes de xuño, segundo manifestou onte no Parlamento o director xeral de Obras Públicas da Consellería de Política Territorial, Manuel Morato. A Xunta de Galicia pretende que o tramo entre Carballo e Baio se constrúa, desde o seu inicio, como autovía.
OBRAS
Luns 28 de maio do 2007
O alcalde de Carballo, Evencio Ferrero, asinará este martes, 29 de maio, os contratos de tres actuacións incluídas no Plan de Obras e Servicios complementario. Son as referentes ao Afirmado de camiño de Barbalde a Altivoa, o Afirmado de camiño de Canelos a Os Loureiros e a Pavimentación de camiños en Castrillón e Cambre.
ELECCIÓNS
Luns 28 de maio do 2007
O BNG foi a formación política máis votada en Carballo nas eleccións municipais celebradas no día de onte. O BNG sumou un total de 7.544 votos, obtendo unha representación de 9 concelleiros. A segunda forza máis votada foi o PP, con 4.672 votos e unha representación de 6 concelleiros. En relación as eleccións municipais celebradas hai catro anos, o BNG sube 3 concelleiros, o mesmo número que perde o PP.
XUNTA DE GOBERNO LOCAL
Luns 28 de maio do 2007
A Xunta de Goberno Local de Carballo deu o visto bo, na sesión ordinaria celebrada este luns, á adxudicación dos expedientes de contratación de dúas obras incluídas no Plan de Cooperación as Obras e Servizos de Competencia Municipal e Rede Viaria Local 2007. Son a Depuradora en Nétoma, parroquia de Razo e Depuradora en Queo, parroquia de Bértoa. Ademais, aprobouse a adxudicación dos expedientes de contratación de catro obras incluídas nese mesmo plan, como o Acondicionamento de praza municipal en Ramil, Acondicionamento de pista en Rus, Afirmado de camiño de Arnados a Razo da costa e Subministro de material de oficina consumible con destino ao Concello de Carballo.
PROGRAMACIÓN DEPORTIVA
Venres 25 de maio do 2007
Rematado o prazo de solicitude para participar no programa Campus de Fútbol 2007, xestionado pola Deputación da Coruña, o Concello de Carballo foi incluído nesta actividade para a que se lle adxudicaron 5 prazas. As datas nas que se desenvolverá a actividade son do 15 ao 21 de xullo de 2007, sendo o prazo de inscrición para achegar as solicitudes do 24 de maio ao 25 de xuño de 2007. En canto aos Campamentos Deportivos, o Concello de Carballo conta con 30 prazas adxudicadas. AS datas nas que se desenvolverá a actividade son do 8 ao 14 de xullo de 2007, sendo o prazo de inscrición para achegar as solicitudes do 24 de maio ao 18 de xuño de 2007.
CULTURA
Venres 25 de maio do 2007
As Festas do San Xoán deste ano incluirán novamente actividades participativas cunha dimensión moi lúdica que teñen moi boa acollida entre a cidadanía de Carballo e, en especial, entre os máis novos. Con elas preténdese recuperar e fomentar tradicións tan importantes na celebración popular do San Xoán como as cachelas, xogos populares ou incorporar ás Festas un elemento tan importante en Carballo como o río Anllóns. Durante tres días poderase desfrutar de actividades moi divertidas e entretidas tanto para o público infantil como adulto e no que o importante é a participación entre a veciñanza de Carballo, polo que a Comisión anima a tomar parte activa da XX edición do Concurso de Cachelas, o VII Gran Prix de Carrilanas e o X Descenso do Anllóns.
CONVOCATORIA
Venres 25 de maio do 2007
A Xunta de Goberno Local de Carballo obordará o vindeiro luns, 28 de maio, a partir das 13,30 horas, unha nova sesión ordinaria na que se contempla a aprobación dos expedientes de contratación das obras Depuradora en Nétoma, parroquia de Razo e Depuradora en Queo, parroquia de Bértoa. Ambas obras están incluídas no Plan Provincial de Cooperación ás Obras e Servizos de Competencia Municipal e Rede Viaria Local 2007. Ademais, contémplase a adxudicación dos expedientes de contratación de catro obras incluídas nese mesmo plan. Son o Acondicionamento de praza municipal en Ramil, Acondicionamento de pista en Rus, Afirmado de camiño de Arnados a Razo da costa e Subministro de material de oficina consumible con destino ao Concello de Carballo.
MULLER
Xoves 24 de maio do 2007
O Pazo da Cultura acolle este xoves, 24 de maio, unha charla a cargo do avogado laboralista Xosé Nogueira Esmorís, organizada polo Clube Emprego Muller. A ponencia terá lugar no segundo piso do Pazo da Cultura, na aula 3, a partir das 19,30 horas.
URBANISMO
Xoves 24 de maio do 2007
O Concello de Carballo está a xestionar a apertura do tramo da rúa Carballo Calero coa finalidade de prolongar esta vía ata confluir coa rúa Carré Aldao. O Concello está a conversar cos propietarios da finca sobre a que se faría a prolongación, que contempla o acondicionamento do seu firme para permitir a circulación de vehículos nese tramo.
DEPORTE
Xoves 24 de maio do 2007
A Casa do Concello acolleu este xoves, 24 de maio, a presentación da terceira edición do Torneo Internacional de Fútbol 7 alevín Concello de Carballo, organizado polas Escolas de Fútbol Luis Calvo Sanz. A fase previa do torneo, da que participarán 42 clubes de toda Galicia, comezará a desenvolverse este sábado, 26 de maio, e terá continuidade os días 9 e 10 de xuño no campo municipal de As Eiroas. A fase final, a celebrar nas instalacións de Conservas Calvo o 15, 16 e 17 de xuño, contará coa presenza das Escolas Luis Calvo Sanz, ademais de con equipos do renome de Valencia, Sporting de Lisboa, Sevilla, Deportivo, Athletic de Bilbao, Valladolid e Zamora.
.jpg)