Inicio Carballo ao día Hemeroteca
Luns 3 de outubro do 2005
O Concello de Carballo, a través do seu Servizo de Normalización Lingüística, inicia unha campaña para promocionar o uso do galego no ámbito socioeconómico. Nesta acción inclúese información para que os comerciantes tomen conciencia da necesidade de empregar a lingua propia, ademais de cursos de mellora da comunicación empresarial e de atención ao público.
Venres 30 de setembro do 2005
O rueiro do casco urbano de Carballo xa se pode descargar da páxina web municipal. O mapa está á disposición de todos os interesados en formato pdf, e pódese acceder a el dende a área denominada Coñece Carballo, no apartado no que se fai referencia á poboación e ao territorio.
Venres 30 de setembro do 2005
O Festival internacional Outono (Fiot) é unha das citas teatrais máis importantes de Galicia. A XIV edición celébrase en Carballo entre o 14 de outubro e o 1 de novembro. Ademais das representacións, no marco do festival organizaranse actividades paralelas como o teatro de rúa, un certame de monólogos cómicos, un concurso escolar de teatro lido ou unha exposición de fotografía.
Xoves 29 de setembro do 2005
O XVI Festival internacional de música de pulso e púa leva ao Pazo da Cultura de Carballo a actuación de Carrapa do Cavaquinho & Cía de música, o venres 30 de setembro. O grupo brasileiro presenta en Carballo o seu jazz do cerrado, unha representación da música carioca, que combinan co coro e outros ritmos brasileiros.
Xoves 29 de setembro do 2005
O alcalde de Carballo, Evencio Ferrero, e o concelleiro delegado de Industria, Comercio, Feiras e Mercado de abastos, Xoán Francisco Pérez Ferreiro, mantiveron unha entrevista co delegado provincial de Innovación e Industria, José Luis Barcia Picos. Durante o encontro, o rexedor solicitoulle, entre outras cuestións, o apoio da Consellaría para desenvolver un plan de aforro enerxético no concello.
Mércores 28 de setembro do 2005
O Concello de Carballo anunciou a modificación das condicións para a contratación, por procemento aberto e concurso público, de dous proxectos municipais, así como a reapertura dos prazos de presentación de ofertas. As novas convocatorias están á disposición dos interesados na páxina web municipal.
Mércores 28 de setembro do 2005
A concellaría de Cultura organiza a representación teatral da obra de José Luis Alonso de Santos, Un home de sorte, que protagoniza o coñecido actor Juan Luis Galiardo e terá lugar o xoves 29 de setembro ás 21.00 horas no Pazo da Cultura de Carballo.
Martes 27 de setembro do 2005
O novo concelleiro de Sanidade, Servizos sociais e Muller, Juan Ramón García del Río, tomou posesión durante a sesión ordinaria do pleno municipal celebrada o 26 de setembro. O edil substitúe no grupo municipal do BNG a Milagros Lantes Seara, nova delegada provincial de Cultura e Deportes.
Martes 27 de setembro do 2005
O Pleno municipal de Carballo decidiu estimar o recurso presentado pola Federación Galega de Construción contra o prego de condicións administrativas para a concesión do novo aparcadoiro e do edificio comercial na Praza do Concello. Con esta modificación o prazo de presentación de ofertas amplíase ao tempo que se lle abre a posibilidade a máis empresas para optar ao concurso público.
Luns 26 de setembro do 2005
O alcalde de Carballo, Evencio Ferrero, acompañado doutros membros da corporación municipal, recibirán o martes 27 de setembro o delegado provincial de Política territorial, Obras públicas e Transporte, Jacinto Parga Fernández, que visitará a segunda fase das obras da travesía principal de Carballo, que están a piques de rematar.
Luns 26 de setembro do 2005
O Centro de información á muller de Carballo abre o prazo de inscrición para participar no curso de risoterapia e relaxación que se celebrará entre os días 19 de outubro e 11 de novembro, no Pazo da Cultura. Os interesados pódense anotar ata o 7 de outubro nas oficinas do Concello ou no teléfono 981 700 688.
Venres 23 de setembro do 2005
A representación teatral da obra Lionel, o malestar do benestar e a celebración dunha conferencia sobre o importante papel da vila de Carballo na época romana centran a oferta lúdica do concello nesta fin de semana. O espectáculo de teatro corre a cargo da compañía coruñesa Casahamlet e celébrase o venres 23 ás 21.00 horas, mentres que o relatorio está previsto para o sábado 24 ás 12.00 horas. Ambas as dúas actividades celébranse no Pazo da Cultura.