VIVENDA E SOLO
Xoves 28 de decembro do 2006
A Consellería de Vivenda e Solo ven de facer pública a Declaración de Impacto Ambiental do Proxecto Sectorial do polígono industrial de Bértoa, 1ª fase, tras ser remitida pola Dirección Xeral de Calidade e Avaliación Ambiental. A primeira fase do polígono industrial terá unha superficie de 730.000 metros cadrados e, con este trámite executado, só resta o informe da Dirección Xeral de Urbanismo para que o Proxecto Sectorial sexa aprobado definitivamente polo Consello da Xunta. A partir de aí poderase iniciar o proceso de expropiación dos terreos que non sexan adquiridos por mutuo acordo. Neste momento, a Consellería xa é titular de 250.000 metros cadrados do total do ámbito da actuación. Ademáis, este venres, 29 de decembro, desprazaranse a Carballo o delegado provincial e o xerente de Xestur para escriturar cerca de 100.000 metros cadrados máis, neste caso financiados polo Instituto Galego de Vivenda e Solo.
CULTURA
Mércores 27 de decembro do 2006
O Pazo da Cultura acolle este mércores, 27 de decembro, a inauguración da exposición do IX Certame Fotográfico Xosé Manuel Eirís. No acto, previsto para as 20,30 horas, farase entrega dos premios aos gañadores desta edición. Ademáis destes, na inauguración da mostra estarán presentes a concelleira de Cultura, Belén Lendoiro, e o alcalde de Carballo, Evencio Ferrero.
SESIÓN PLENARIA
Mércores 27 de decembro do 2006
A corporación municipal de Carballo declarou deserto este martes, na sesión plenaria ordinaria do mes de decembro, o procedemento negociado con publicidade da concesión de obra pública para a construcción e explotación dun aparcadoiro soterrado e un edificio dotacional de carácter comercial na Praza do Concello. A adopción da medida fíxose por unanimidade de todas as formacións políticas do Concello. Foi este o punto da orde do día que requeriu máis tempo de debate no Salón de Plenos, prolongándose por espazo dunha hora.
EMPREGO
Mércores 27 de decembro do 2006
O Pazo da Cultura acolleu o acto de apertura do Obradoiro de Emprego Oficios>25, un programa de emprego e formación subvencionado pola Consellería de Traballo e promovido polo Concello de Carballo. As especialidades a impartir serán as de albanel, pintor e carpinteiro e as actuacións a realizar serán as de continuar as obras de construcción do futuro Centro de Formación Municipal. No acto participaron o director xeral de Formación e Colocación, Pastor Fuenteseca, o concelleiro de Participación Veciñal, Emprego e Promoción Económica, Manuel Trigo, o director provincial do INEM, José Manuel Pose Mesura, o presidente da Deputación da Coruña, Salvador Fernández Moreda, e o alcalde de Carballo, Evencio Ferrero. A delegada provincial de Traballo, María Debén, non puido acudir, como estaba previsto, debido a outro compromiso.
XUNTA DE GOBERNO LOCAL
Martes 26 de decembro do 2006
A Xunta de Goberno Local procedeu á concesión, na xuntanza celebrada este luns, de dúas licenzas de obra para a construcción de dúas vivendas unifamiliares nos lugares de Guntián e Sofán. Ademáis, concedeuse a licenza para a construcción da 3ª fase dun edificio de 19 vivendas na rúa Vila de Negreira.
SESIÓN PLENARIA
Martes 26 de decembro do 2006
A corporación municipal de Carballo declarará deserto este martes, na sesión plenaria ordinaria do mes de decembro, o procedemento negociado con publicidade da concesión de obra pública para a construcción e explotación dun aparcadoiro soterrado e un edificio dotacional de carácter comercial na Praza do Concello. A adopción da medida ten lugar logo da proposta da mesa de contratación, por unanimidade dos seus membros, de declarar deserto o procedemento logo de analizar a única proposta presentada pola UTE Benal-Aldesa.
EMPREGO
Martes 26 de decembro do 2006
O Pazo da Cultura acolle este mércores, 27 de decembro, a partir das 12,00 horas, o acto de apertura do Obradoiro de Emprego Oficios>25, un programa de emprego e formación subvencionado pola Consellería de Traballo e promovido polo Concello de Carballo. As especialidades a impartir serán as de albanel, pintor e carpinteiro e as actuacións a realizar serán as de continuar as obras de construcción do futuro Centro de Formación Municipal. No acto participarán a delegada provincial de Traballo, María Debén, o director provincial do INEM, José Manuel Pose Mesura, e o alcalde de Carballo, Evencio Ferrero.
ACCESIBILIDADE
Venres 22 de decembro do 2006
O Concello de Carballo recibiu o convenio asinado co IMSERSO e coa Fundación ONCE para executar un proxecto de obras de accesibilidade e de cooperación e integración social de persoas con discapacidade. O convenio levarase á próxima Xunta de Goberno Local para a súa aprobación e o orzamento do proxecto ascende a 118.775,99 euros.
CULTURA
Venres 22 de decembro do 2006
Este sábado, a partir das 18.00 horas, os e as maiores do concello poderán gozar dunha festa baile de Nadal no Pazo da Cultura. A actividade, organizada pola Concellaría de Terceira Idade, está incluída na programación do Nadal Cultural do Concello de Carballo. O mesmo sábado, a partir das 18.30 horas, a AX Chiriminguai organiza outro festival de Nadal, con xogos e merenda, nos baixos da igrexa de San Cristovo. Son dúas das actividades máis interesantes dun programa que, ademais, oferta outros actos que se van desenvolver na fin de semana previa á Noiteboa.
MEDIO AMBIENTE
Venres 22 de decembro do 2006
A Brigada de Medio Ambiente do Concello de Carballo está a proceder, durante estes días, á limpeza e roce dos noiros e baldíos do casco urbano da localidade. Trátase da maleza dos solares que invade as beirarrúas e que pode chegar a impedir o tránsito normal dos peóns.
INDUSTRIA
Xoves 21 de decembro do 2006
Esta semana está prevista a publicación no DOG do estudo de impacto ambiental do Polígono Industrial de Bértoa. Unha vez teña lugar este requisito, só faltará o informe definitivo de Urbanismo para que o Consello da Xunta aprobe o proxecto e poidan iniciarse as obras da segunda fase. Trátase dunha superficie de 740.000 metros cadrados.
DEPORTE
Xoves 21 de decembro do 2006
O Concello de Carballo dispón de 50 entradas para os veciños e veciñas da localidade interesados/as en asistir ao partido que, o vindeiro 28 de decembro, disputarán a Selección Galega de fútbol coa de Ecuador. O encontro terá lugar no estadio de Riazor, na Coruña, e as persoas interesadas en conseguir unha entrada deberán presentar unha solicitude no Concello de Carballo, e poderán recoller o modelo destas nas propias dependencias municipais a partir do venres, 22 de decembro.
