SESIÓN PLENARIA
Mércores 28 de febreiro do 2007
A corporación municipal de Carballo aprobou por unanimidade, na sesión plenaria ordinaria deste mes de febreiro, o anteproxecto de saneamento en Razo. Segundo anunciou o alcalde de Carballo, Evencio Ferrero, Augas de Galicia acometerá a obra este mesmo ano, mentres que o concelleiro de Urbanismo, Manuel Andrade, engadiu que existe un acordo co propietario para a ubicación da depuradora e que en dúas semanas estará todo feito.
TURISMO
Mércores 28 de febreiro do 2007
Xantar, Salón Galego de Gastronomía e Turismo, adica este día 28 de febreiro ao Concello de Carballo, coincidindo coa inauguración do evento en Expourense. O Salón Galego de Gastronomía e Turismo cumple a súa oitava edición, que se prolongará até o 4 de marzo. O alcalde de Carballo, Evencio Ferrero e o concelleiro de Medio Ambiente, Manuel Pan, acudiron á inauguración, ao igual que o presidente da Asociación de Hosteleiros de Bergantiños, Manuel Gómez Eiroa.
ECONOMÍA
Mércores 28 de febreiro do 2007
O Pazo da Cultura acolle mañán xoves, 1 de marzo, a presentación do Estudo Socioeconómico da bisbarra de Bergantiños, elaborado pola Fundación para o Estudo e a Divulgación da Cuestión Social e Sindical en Galicia (FESGA), en colaboración coa Deputación da Coruña. No acto están presentes o alcalde de Carballo, Evencio Ferrero, o presidente da Comisión de Promoción Económica, Turismo e Emprego da Deputación Provincial, Pablo Villamar, Manuel Mera, director de FESGA, Paulo Carril, secretario comarcal da UC da CIG de A Coruña e Indalecio López, secretario da Unión Local da CIG de Carballo. O acto comezará ás 20,00 horas.
CULTURA
Martes 27 de febreiro do 2007
A novela Herba Moura, de Teresa Moure, segunda das propostas do programa Literactúa do Concello de Carballo, será a protagonista da charla que a autora da mesma manterá este mércores 28 de febreiro ás 20.30 h no Café Valle Inclán de Carballo, cos seus lectores. A autora estará acompañada por Mercedes Queixas, secretaria xeral da Asociación de Escritores/as en Lingua Galega. Logo da primeira experiencia do proxecto, coa obra Tres segundos de memoria de Diego Ameixeiras, tócalle o turno a esta novela, gañadora do Premio Xerais de Novela 2005, que nos traslada, da man dun personaxe contemporáneo chamado Einés Andrade, ao século XVII, onde nos atopamos coa figura dun Descartes humano e fráxil -nunha perspectiva inédita do filósofo- e, sobre todo, coa figura de dúas mulleres: a raíña Christina de Suecia e Hélène Jans, unha entráñabel meiga residente en Amsterdam.
CULTURA
Martes 27 de febreiro do 2007
O Pazo da Cultura de Carballo acolleu este martes a presentación do Circuito 4x4 que organiza a Dirección Xeral de Creación e Difusión Cultural da Consellería de Cultura e Deporte. No acto estiveron presentes o alcalde de Carballo, Evencio Ferrero, e a delegada provincial de Cultura e Deporte, Milagros Lantes. O Concello de Carballo optou polo ciclo de Canción de autor, con catro concertos a desenvolver os días 2, 16 e 23 de marzo e 20 de abril. O encargado de abrir o circuito será o grupo Nordestin@s, este venres a partir das 21,00 horas no Pazo da Cultura. Con posterioridade serán Espido, Xabier Díaz e Marful os que actúen no edificio multiusos do concello.
CONVOCATORIA
Luns 26 de febreiro do 2007
A corporación municipal de Carballo reúnese este luns, 26 de febreiro, en sesión plenaria ordinaria. A orde do día da mesma contempla a toma de posesión do concelleiro do grupo político municipal do PSdeG-PSOE, Pedro Luis Fernández Pombo, logo da renuncia ao seu cargo de concelleiro de Manuel Trigo. A sesión plenaria comezará ás 20,30 horas e a orde do día conta con nove puntos para o seu debate.
LIMPEZA
Luns 26 de febreiro do 2007
O Concello de Carballo sancionará próximamente a unha empresa da localidade pola mala distribución de publicidade. Dase a circunstancia de que o Concello xa avisara a dita empresa do mal uso da publicidade e que, nesta ocasión, se atopaba en coches aparcados nas rúas. O Concello de Carballo insiste na necesidade de cumplir a ordenanza de limpeza, na que se prohíbe a realización desta práctica.
MEDIO RURAL
Luns 26 de febreiro do 2007
O Concello de Carballo asinará este martes, 27 de febreiro, un convenio coa Consellería do Medio Rural para a participación na protección de núcleos rurais mediante a realización de traballos de prevención e defensa contra incendios forestais nas faixas de especial protección. O obxecto do convenio é o de protexer especialmente o espazo rural e os núcleos de poboación fronte a estes sinistros. Segundo recolle o mesmo, realizaranse estas actuacións alomenos en dez núcleos de poboación e nun máximo de 45 hectáreas subvencionables. A achega máxima anual da Consellería de Medio Rural será de 34.875 euros.
LITORAL
Venres 23 de febreiro do 2007
Desde o pasado día 19 de febreiro está aberto o prazo para solicitar a autorización para a colocación de Instalacións de Tempada de Praias en zona de Dominio Público Marítimo Terestre. O prazo permanecerá aberto até o 19 de marzo de 2007, para a instalación de tempada nas praias de Razo e Baldaio.
MEDIO AMBIENTE
Venres 23 de febreiro do 2007
O Concello de Carballo ven de tramitar a súa adhesión a Signus Ecovalor para que esta sociedade, sin ánimo de lucro, se faga cargo da recollida e tratamento dos neumáticos usados. Até o momento, a Brigada de Medio Ambiente encargabase da recollida dos nuemáticos no Punto Limpo e o seu desprazamento ao polígono de Lendo, en Laracha, onde se trataban.
ENSINO
Venres 23 de febreiro do 2007
Médicos do Mundo está a desenvolver nos centros de ensino de Carballo, desde principios deste mes de febreiro, diferentes obradoiros para traballar a interculturalidade. Os dous obradoiros que se están a desenvolver no concello son Educar para convivir, nos centros de primaria, e ¿Cómo falamos dos inmigrantes? Nombres, adxectivos e xenofobia, nos institutos de ESO. Durante este mes xa se celebraron obradoiros no CEIP Nétoma-Razó, Xesús San Luis e A Cristina. O luns 26 repetirá este último centro e o martes 27será o turno do CEIP Fogar. En canto aos centros de primaria, os obradoiros continuarán os días 3 e 13 de marzo, no CEIP A Cristina e CEIP Fogar respectivamente. Para os institutos de ESO, os obradoiros desenvolveranse os días 6, 12 e 19 de marzo no IES Alfredo Brañas, IES Isidro Parga Pondal e IES Monteneme respectivamente.
PLENO
Xoves 22 de febreiro do 2007
A sesión plenaria ordinaria do mes de febreiro a celebrar o vindeiro luns conta, na orde do día, coa toma de posesión do concelleiro do grupo político municipal do PSdeG-PSOE, Pedro Luis Fernández Pombo. A toma de posesión faise efectiva logo da renuncia ao seu cargo de concelleiro de Manuel Trigo. A sesión plenaria comezará ás 20,30 horas e a orde do día conta con nove puntos para o seu debate.