CULTURA
Martes 6 de marzo do 2007
Carballo será unha das oito sedes da Semana do Libro e a Lectura que promove a Consellería de Cultura da Xunta de Galicia. O director de Creación e Difusión Cultural, Luís Bará, presentou en Pontevedra esta iniciativa, que baixo a temática do medo se estenderá por oito concellos galegos até o mes de xuño. No caso de Carballo, a Semana do Libro e a Lectura será inaugurada o domingo 22 de abril, ás 12.30 horas no Pazo da Cultura, co espectáculo Que medo, que medo!.
OBRAS
Martes 6 de marzo do 2007
O Concello de Carballo ven de asinar, este martes, tres contratos para mellorar os servizos nas parroquias de Berdillo, Sofán e Ardaña. Trátase, en concreto, da primeira fase da rede de saneamento no lugar de Añón, en Berdillo, tamén no lugar de Zarrallo, en Sofán, e a dotación de beirarrúas en Ardaña. As dúas primeiras actuacións están incluidas no Plan Adicional de Investimentos Locais, mentres que a última forma parte das melloras incluidas no Plan de Obras e Servizos. O Concello pretende, con estas actuacións, dar continuidade ao plan deseñado polo grupo de goberno nestes anos de dotar aos diferentes lugares das parroquias da rede de saneamento, co obxectivo de coidar o entorno e mellorar a calidade de vida da veciñanza, dándolle de xeito progresivo o acceso aos servizos que dispón o casco urbano.
MEDIO AMBIENTE
Martes 6 de marzo do 2007
O Concello de Carballo, dentro da campaña Carballo Limpo, está a visitar a todos os comercios do casco urbano, informando sobre a recollida de lixo, a reciclaxe, o Punto Limpo e a campaña Sácalle o aire, sobre a recollida de cartón. Logo de informar destas cuestións, a cada empresario fáiselle un pequeno inquérito sobre cuestións relacionadas cos servizos de Medio Ambiente. Neste sentido, e sobre a nota que lles merece a campaña Carballo Limpo, os comerciantes puntúan a campaña cun 7,68 sobre 10 puntos. A recollida de lixo é puntuada cun 7,88 e a limpeza viaria cun 8,28.
ENSINO
Luns 5 de marzo do 2007
Este luns, 5 de marzo, remata o prazo de matrícula das probas para a obtención do ciclo elemental de inglés, que a Escola Oficial de Idiomas de Carballo abrira o pasado 15 de febreiro. É requisito indispensable ter superado o Graduado Escolar, 2º de ESO ou equivalentes.
EMPREGO
Luns 5 de marzo do 2007
A Escola Obradoiro Casa dos Oficios, clausurada a finais de 2006, alcanzou unha tasa de emprego do 81,25%, segundo se desprende do balance de actividade que o Centro Municipal de Formación Ocupacional de Carballo remitiu ao conselleiro e á delegada provincial de Traballo, Ricardo Varela e María Debén, e aos directores xerais de Formación e Colocación e Promoción do Emprego. Os mellores resultados de inserción laboral déronse na especialidade de carpintería de aluminio, logrando emprego nove dos dez alumnos que completaron a súa etapa formativa. En carpintería de madeira, o índice foi do 87,50%, sendo do 75% en cantería e do 67,7% en albanelería e pladur.
XUNTA DE GOBERNO LOCAL
Luns 5 de marzo do 2007
A Xunta de Goberno Local de Carballo aprobou, na sesión ordinaria celebrada este luns, o convenio de colaboración entre o Concello de Carballo e a Consellería de Cultura e Deporte para a substitución da herba artificial e rede de rego no campo de fútbol das Eiroas. Sobre a mesa quedou o convenio coa Consellería de Política Territorial, Obras Públicas e Transportes para o acondicionamento da estrada Carballo - Malpica, no tramo que afecta ao concello, xa que a Xunta de Goberno Local entende que as condicións que recolle o convenio non son asumibles para o Concello. Si saiu adiante o convenio con Manuel Jesús Souto para a participación no Campionato Galego de autocross e Campionato de España de Rallys e deuse conta do acordo de prórroga ao convenio de cooperación entre a Consellería de Sanidade, o Sergas e o Concello de Carballo que desenvolve programas de tratamento de drogodependencias.
BALANCE MENSUAL
Venres 2 de marzo do 2007
O Grupo Municipal de Intervención Rápida de Carballo tivo que participar en 20 emerxencias durante o pasado mes de febreiro, que arroxou un total de 114 intervencións. No tocante ás emerxencias, destacan en Carballo 5 por accidentes de tráfico e limpezas, 8 por limpezas de estradas, 3 por incendios urbáns, un escape de gas, un incendio nun colector e outro nun vehículo. Ademías, o Grumir participou dun rescate dun afogado no concello de Coristanco.
CULTURA
Venres 2 de marzo do 2007
Este venres, 2 de marzo, continúa a programación dos Venres Culturais en Carballo, co inicio dun novo ciclo que se integra neste programa , o Circuito 4x4 da Dirección Xeral de Creación e Difusión Cultural da Consellería de Cultura e Deporte. Inicia este ciclo Nordestin@s, grupo revelación de éxito da música en Galicia, que ofrecerá un concerto ás 21,00 horas no Pazo da Cultura. Este grupo está formado por tres dos músicos máis relevantes da nova escea galega: Abe Rábade, Guadi Galego (Berrogüetto) e Ugía Pedreira (Marful).
MAIORES
Venres 2 de marzo do 2007
A Vicepresidencia da Xunta inventirá 168.513 euros en diversas actuacións coas que se mellorará a seguridade e habitabilidade da residencia de maiores de Carballo. Así se puxo de manifesto na comparecencia que, na propia residencia, facían este venres o secretario xeral e de Relacións Institucionais, Antón Losada, a delegada provincial, Tereixa Novo, e o alcalde de Carballo, Evencio Ferrero. O proxecto de mellora está na actualidade en fase de redacción e terá un prazo de execución de seis meses. A Xunta de Goberno Local ven de aprobar a permuta do terreo próximo á residencia, que porá a disposición da Vicepresidencia da Xunta para a acometer a ampliación do edificio. As previsión falan da posibilidade de facer a obra no ano 2008.
ENSINO
Xoves 1 de marzo do 2007
A profesora da Universidade de Vigo, María Xesús Enguídanos Floriani, especialista en educación infantil e psicomotricista, ofrecerá este venres, 2 de marzo, a cuarta das charlas do ciclo Aprender para Educar, que o Concello de Carballo, a Asociación Socio-Pedagóxica Galega e a Deputación da Coruña están a por en funcionamento na localidade. O programa supón un lugar de encontro e formación dirixido a pais e nais e que ten como obexctivo o reforzo da familia como marco fundamental da educación e como elemento de desenvolvemento da personalidade. A cuarta conferencia do ciclo celebrarase no Pazo da Cultura, a partir das 20,00 horas.
MULLER
Xoves 1 de marzo do 2007
O Clube Emprego Muller organiza, para este mes de marzo, dous obradoiros sobre a Búsqueda de emprego a través de internet e O autoemprego como alternativa. O primeiro celebrarase no Clube Emprego Muller os días 6, 8 e 9 de marzo, a partir das 10,00 horas. O segundo terá lugar no Pazo da Cultura o día 14 de marzo, a partir tamén das 10,00 horas. Neste obradoiro de O autoemprego como alternativa participará a axente de emprego e desenvolvemento local do Concello de Carballo, Paula Lema, ademáis dunha empresa de mulleres de lechadoras de Santa Comba.
CONVOCATORIA
Xoves 1 de marzo do 2007
A Xunta de Goberno Local de Carballo obordará o vindeiro luns, 5 de marzo, a partir das 13,30 horas, unha nova sesión ordinaria na que se contempla a aprobación do convenio de colaboración entre o Concello de Carballo e a Consellería de Cultura e Deporte para a substitución da herba artificial e rede de rego no campo de fútbol das Eiroas. Na relación de convenios, tamén figura outro coa Consellería de Política Territorial, Obras Públicas e Transportes para o acondicionamento da estrada Carballo - Malpica, no tramo que afecta ao concello. A orde do día recolle tamén outro convenio con Manuel Jesús Souto para participación no Campionato Galego de autocross e Campionato de España de Rallys e a dación de conta do acordo de prórroga ao convenio de cooperación entre a Consellería de Sanidade, o Sergas e o Concello de Carballo que desenvolve programas de tratamento de drogodependencias.
