MEDIO AMBIENTE
Venres 23 de marzo do 2007
A área recreativa do Polígono Industrial de Bértoa acolleu este venres, 23 de marzo, a prantación de 25 carballos e un sementeiro de 365 landras para pechar os actos programados para conmemorar o día da árbore. O alumnado de varios centros de ensino da comarca, concretamente do CEIP Bergantiños de Carballo, o CEIP Otero Pedraio de A Laracha e o CEIP de Bormoio-Agualada de Coristanco, e que participan no programa Voz Natura de La Voz de Galicia, foron os encargados de simbolizar, en palabras do alcalde de Carballo, "o novo futuro que queremos para Carballo e Galicia". A prantación dos carballos e das landras foi a continuidade ao reparto de 110.000 landras que o Concello, coa colaboración de La Voz de Galicia, a Consellaría de Medio Rural da Xunta de Galicia, Xestur e Sogama, fixo o pasado mércores, coincidindo coa celebración do día da árbore.
NORMALIZACIÓN LINGÜÍSTICA
Xoves 22 de marzo do 2007
O alcalde de Carballo, Evencio Ferrero, e a concelleira de Cultura, Ensino e Normalización Lingüística anunciaron en conferencia de prensa diversas actividades que se van desenvolver nos próximos meses desde o Servizo de Normalización Lingüística. O segundo trimestre de Literactúa, Obradoiros Máis Alá!, Programa para a multiculturalidade e a integración lingüística e cursos de galego foron algunhas das actividades presentadas.
OBRAS
Xoves 22 de marzo do 2007
O alcalde de Carballo, Evencio Ferrero, asinou este xoves, 22 de marzo, o contrato para a ampliación de beirarrúas e dotación de equipamento urbano na rúa Gran Vía. O obxectivo da actuación é o de facer a circulación maís segura, racional e adaptala ás necesidades e exixencias actuais; mellorar a estética xeral que presenta o conxunto, con solucións actualizadas e adecuadas ás características da localidade; potenciar as zonas peonís, ordenando aducuadamente o tráfico rodado; e adecuar as infraestructuras existentes e instalación daquelas das que carece. O orzamento ascende a 193.384,38 euros, sendo o prazo de execución de tres meses.
MEDIO AMBIENTE
Xoves 22 de marzo do 2007
A área recreativa do Polígono Industrial de Bértoa acolle este venres, 23 de marzo, a prantación de 25 carballos e un sementeiro de 365 landras para pechar os actos programados para conmemorar o día da árbore. O alumnado de varios centros de ensino da comarca, concretamente do CEIP Bergantiños de Carballo, o CEIP Otero Pedraio de A Laracha e o CEIP de Bormoio-Agualada de Coristanco, procederán á prantación dos 25 carballos ás 12,00 horas. O alumnado estará acompañado por membros do programa Voz Natura de La Voz de Galicia.
CULTURA
Mércores 21 de marzo do 2007
Este mércores, 21 de marzo, ten lugar a primeira das citas anuais do ciclo Xoves Intérpretes, cun Concerto de primavera impartido polo alumnado do Conservatorio Profesional de Música de Carballo. Trátase dun tradicional ciclo de concertos no que se pode contemplar e escoitar unha serie de temas musicais que interpreta o alumnado do Grao Elemental de Música do Conservatorio carballés. A actuación ten lugar no Pazo da Cultura, a partir das 20,00 horas.
CULTURA
Mércores 21 de marzo do 2007
Este xoves, 22 de marzo, inaugúrase no Pazo da Cultura a exposición O mar nos fondos da colección Caixa Galicia. A mostra está incluida no programa A Culturaeduca do Concello de Carballo, co ánimo de proporcionar ao profesorado e alumnado un recurso didáctico máis, a través de representacións teatrais, concertos didácticos, exposicións, etc., ofrecendo oportunidades de formación en aspectos culturais menos desenvoltos na escola e achegando as manifestacións culturais á súa vida cotiá. A mostra está dirixida ao alumnado de Educación Primaria e Secundaria e persegue os obxectivos de dar a coñecer a obra dalgúns dos máis importantes artistas plásticos galegos dos séculos XIX e XX e a evolución da arte neste período, coñecer as diferentes técnicas pictóricas e as súas características principais e, ademáis, aproximar ao alumnado á diversidade do mar como elemento de inspiración e creación artística.
MEDIO AMBIENTE
Mércores 21 de marzo do 2007
Baixo a organización do Clube Remontes 4x4, a colaboración da Asociación de Usuarios del Todoterreno e o patrocinio do Concello de Carballo, este sábado, 24 de marzo, haberá unha saída de vehículos para a localización e recollida de vertedoiros incontrolados no municipio. Como xa se fixera hai tres anos, o Concello tenta erradicar eses puntos de lixo, en colaboración co Clube e a Asociación, localizando os vertedoiros aos que o Concello e a poboación non chegan. A iniciativa suporá unha avaliación con respecto a hai tres anos, localizándose por aquel entón 300 vertedoiros incontrolados. O goberno está convencido de que ese número reduciuse moitísimo, ademáis do volume do lixo que se atopou por aquel entón.
MEDIO AMBIENTE
Martes 20 de marzo do 2007
O Concello de Carballo repartirá este mércores, día 21 de marzo, coincidindo coa celebración da Día da Árbore, 110.000 landras de carballo en colaboración co diario La Voz de Galicia. Os lectores do períodico recibirán neste día, con cada exemplar, unha landra envasada e etiquetada polos traballadores de Aspaber.
EMPREGO
Martes 20 de marzo do 2007
O Concello de Carballo ven de solicitar á Consellería de Traballo a concesión dunha subvención para a contratación de traballadores desempregados. Faino vista a Orde do 21 de xaneiro de 2007 da Consellería de Traballo, pola que se establecen as bases que regulan, para o exercicio do ano 2007, as axudas e subvencións para o fomento do emprego a través dos programas de cooperación, no ámbito de colaboración coas entidades locais.
CULTURA E LINGUA
Martes 20 de marzo do 2007
O Concello de Carballo, desde o Servizo de Normalización Lingüística, ven de convocar para o vindeiro martes 27 de marzo, ás 20.30 h, a todas a persoas interesadas a unha xuntanza para o inicio dun Programa para a multiculturalidade e a integración lingüística, na que se pretende acordar, conxuntamente coas persoas asistentes, o inicio de diversas actividades. O programa estará especialmente dirixido a todas aquelas persoas que viven aquí pero que naceron fóra de Galiza e a aquelas que estiveron moito tempo fóra e que regresaron non hai moito. O obxectivo é facilitarlles a todas estas persoas o coñecemento, dun xeito práctico, lúdico e atractivo, da lingua, da cultura, da sociedade, da historia, da xeografía, etc., de Galiza. A xuntanza terá lugar no Pazo da Cultura.
XUNTA DE GOBERNO LOCAL
Luns 19 de marzo do 2007
A Xunta de Goberno Local, reunida en sesión ordinaria este luns, 19 de marzo, ven de aprobar dúas licenzas para a construcción doutras tantas vivendas unifamiliares nos lugares de Forno, en Sofán, e Charrúa, Queo de Abaixo, en Bértoa. Ademáis, aprobouse a concesión de licenza para a construcción dun edificio de 35 vivendas na rúa Pino, ademáis da licenza para a demolición dun edificio na rúa Amapola.
CULTURA
Luns 19 de marzo do 2007
A música e o teatro volverán a ser protagonistas a finais desta semana, con dúas actuacións incluidas na programación dos Venres Culturais do Concello de Carballo. O venres 23, e dentro do Circuito 4x4 da Dirección Xeral de Creación e Difusión Cultural, dependente da Consellería de Cultura, será o turno de Xabier Díaz, cun proxecto resultado do encontro musical dunha voz do norte, a de Xabier Díaz, e un guitarrista do sur, Guillermo Fernández. O domingo 25, e dentro do ciclo Teatro en Familia, a compañía ceenseTalía Teatro representará O merlo branco, unha obra recomendada a partir dos 6 anos.
