VISITA DO DELEGADO DO SÁHARA EN GALICIA
Mércores 16 de xullo do 2008
Tres nenos saharauís pasarán este ano o verán en Carballo grazas a outras tantas familias de acollida que participan no programa ‘Vacacións en paz’, unha iniciativa que facilita a estadía temporal destes rapaces que escapan "do ambiente de exilio e refuxio" que viven no Sáhara. Así o explicou o delegado do Sáhara en Galicia, Ahmedu Motjar Abdalahi, que expuxo no Concello de Carballo a difícil situación que vive o seu pobo. Foi recibido polo representante de Solidariedade Galega co Pobo Saharauí, Bernardo Porto; polas Concelleiras de Emigración e Educación, Lourdes Rey e Mar Eirís; polo Alcalde de Carballo, Evencio Ferrero; e polas familias e os nenos que estarán ata principios de setembro na vila.
'TRABALLANDO EN LINGUA'
Martes 15 de xullo do 2008
O Pazo da Cultura de Carballo acolle ata o próximo xoves 17 de xullo o cursiño de verán ‘Traballando en lingua’, facendo que Carballo sexa "parte directa da vida da Universidade da Coruña", un dos organismos que promove esta iniciativa. Así o expresou Xosé Ramón Freixeiro Mato, director do Servizo de Normalización Lingüística da Universidade, no acto de inauguración destas xornadas, que contou coa presenza do Alcalde de Carballo, Evencio Ferrero; de Luís Caparrós Esperante, vicerreitor de Cultura e Comunicación da Universidade da Coruña; de Nel Vidal Barral, presidente da Coordinadora de Traballadores/as de Normalización da Lingua (CTNL) e de Xoán Manuel Sande Muñiz, deputado provincial responsable de Normalización Lingüística.
O URBANISMO: VIVENDA
Luns 14 de xullo do 2008
Malia o parón que se rexistra na construción, o primeiro semestre deste ano 2008 presenta unhas cifras de tramitación de licenzas de obra que levan trazas de superar o número das tramitadas en 2006, ata o de agora o ano no que máis se aprobaron na historia do Concello. Nese momento, os servizos urbanísticos municipais tiñan informado favorablemente 457 nos primeiros seis meses, mentres que entre xaneiro e xuño de 2008 xa se concederon 716 licenzas.
UNIVERSIDADE DA CORUÑA
Luns 14 de xullo do 2008
Do martes 15 ao xoves 17 de xullo terá lugar no Pazo da Cultura de Carballo o curso de verán ‘Traballando en Lingua’, organizado polo Servizo de Normalización Lingüística da Universidade da Coruña en colaboración co Concello de Carballo, a CTNL (a Coordinadora de Traballadores e Traballadoras de Normalización da Lingua) e a Deputación da Coruña. Ao longo de tres días pasarán por Carballo numerosos expertos en novas tecnoloxías e dinamización lingüística para participar nesta actividade, na que colaboran máis de 20 expertos chegados de lugares como Cataluña ou Estremadura.
VICEPRESIDENCIA
Venres 11 de xullo do 2008
O Concello carballés xa forma parte da rede do Voluntariado en Defensa do Monte Galego, acollendo un dispositivo comarcal que ofrece cobertura para toda a zona de Bergantiños e que abrangue unha superficie de 740 quilómetros cadrados, xa que tamén opera en concellos limítrofes como Cerceda, Arteixo, Tordoia, Zas, Vimianzo ou Santa Comba. En virtude dun acordo coa Dirección Xeral de Xuventude e Solidariedade, Carballo únese a esta iniciativa solidaria que conxuga a vixilancia contra os incendios forestais, a disuasión e o apoio aos equipos de extinción.
PRAIAS
Xoves 10 de xullo do 2008
A Demarcación de Costas continúa desenvolvendo as obras para a reposición de taludes no areal de Razo carballés. A pesares de que os noiros xa foran reforzados con anterioridade, o forte temporal da pasada primavera causou novos desprendementos que precisan reparación. Nestes momentos, as máquinas están traballando entre o posto de Protección Civil e Socorrismo do areal cara a zona da Cabreira, nunha área duns 40 metros.
SANIDADE E DEPORTE
Xoves 10 de xullo do 2008
A iniciativa Carballo Saudable pon en marcha un mecanismo que permitirá que os veciños do municipio de calquera idade e condición poidan analizar o seu estado físico e de saúde. Mediante un kit de Avaliación da Condición Física e da Composición Corporal, os carballeses coñecerán datos como o exceso de graxa que poidan ter no seu organismo ou as claves da súa constitución. Posteriormente, recibirán as instrucións necesarias para mellorar a súa condición.
OBRAS
Mércores 9 de xullo do 2008
Esta semana deron comezo os traballos de ‘Prolongación da rúa Carballo Calero’ da capital municipal carballesa. O proxecto ten un orzamento de 24.600 euros, e as obras foron adxudicadas á empresa Dámaso Ferreiro e Hijos, que ten un prazo de execución de dous meses para rematar a actuación, aínda que dende a Concellaría de Obras confían en que o proceso remate moito antes.
VERÁN CULTURAL
Mércores 9 de xullo do 2008
O Centro Coreográfico Galego chega este venres -11 de xullo- a Carballo coa súa segunda produción, ‘Kiosko das almas perdidas’, da que se ofrecerá unha función de entrada libre a partir das 22.30 horas na Praza do Concello. Esta peza, dirixida polo coreógrafo catalán Roberto Oliván e con música da coñecida artista galega Mercedes Peón, entra así na recta final dunha extensa xira que remata o 20 deste mes en Barcelona.
BENESTAR
Martes 8 de xullo do 2008
A Xunta de Goberno Local de Carballo aprobou o pasado luns -7 de xullo- as bases para a concesión de subvencións dirixidas a asociacións sen ánimo de lucro que desenvolvan actividades consideradas de interese social, contribuíndo a desenvolver actuacións que se dirixan á poboación máis desfavorecida. O obxectivo é fomentar iniciativas que, de xeito prioritario, teñan lugar no eido dos Servizos Sociais.
CAMPAMENTOS
Martes 8 de xullo do 2008
Un grupo de 32 rapaces e rapazas carballeses participarán este verán en tres actividades de lecer organizadas pola Deputación da Coruña. Trátase dos Campamentos Deportivos 2008, dos Campus de Fútbol 2008 e do programa ‘Vivir o mundo’. No primeiro caso, os doce seleccionados estarán unha semana no Colexio Calvo Sotelo da Coruña desenvolvendo todo tipo de actividades deportivas, mentres que no segundo, oito nenos adestrarán nas instalacións deportivas da Coruña e Culleredo. En ‘Vivir o mundo’, os rapaces realizarán unha viaxe á Expo Zaragoza 2008.
XUNTA DE GOBERNO LOCAL
Luns 7 de xullo do 2008
A Xunta de Goberno Local deu hoxe -7 de xullo- o visto bo a varias obras incluídas no Plan de Obras e Servizos (POS) 2008 que suman un importe que supera os 850.000 euros. As melloras supoñen a dotación de redes de saneamento e de novas depuradoras, así como a mellora de camiños en parroquias como Oza, Cances, Berdillo e Sofán. Trátase dun total de oito proxectos.
