NOVAS TECNOLOXÍAS
Xoves 24 de xullo do 2008
O Concello de Carballo vén de elaborar un estudo sobre a cobertura de internet de banda ampla no rural para poder detectar os baleiros existentes e lograr que todo o territorio municipal conte con este servizo. De feito, no mes de agosto estará listo un Plan de Viabilidade para a implantación de banda ampla que permitirá que as empresas de comunicación interesadas en ofrecer este servizo poidan acordar co Concello os mecanismos necesarios para a realización dos traballos.
VERÁN CULTURAL
Mércores 23 de xullo do 2008
A Praza do Concello de Carballo acolle o xoves 24 de xullo a representación do último espectáculo posto en marcha pola coñecida música Cristina Pato e a cantante Rosa Cedrón, que levarán aos espectadores carballeses a maxia de ‘Soas’. A partires das 22.30 horas deixarán no escenario unha combinacion íntima e de luxo proposta por dous dos grandes nomes da música que son, sen ningunha dúbida, as artistas galegas con máis proxección internacional.
CARBALLO SAUDABLE
Mércores 23 de xullo do 2008
O programa ‘Carballo Saudable’ pon en marcha a iniciativa ‘En vacacións móvete’, unha proposta dirixida especialmente aos rapaces e rapazas de entre 14 e 18 anos e que pon en marcha actividades relacionadas coa natureza. O obxectivo é a fidelización do deporte entre a mocidade con iniciativas atractivas e de aventura que incrementen o nivel de actividade física dos rapaces durante os períodos vacacionais.
CAMPAÑA CONTRA O LUME
Martes 22 de xullo do 2008
A Concellaría de Medio Ambiente que dirixe o tenente de alcalde José Antonio Viña, en cumprimento dun convenio de colaboración asinado entre a Consellería de Medio Rural e o Concello de Carballo para a participación na protección dos núcleos rurais do municipio, acaba de emprender a limpeza de terreos para traballar en prol da prevención dos incendios forestais.
PRAIAS
Luns 21 de xullo do 2008
Ao longo de toda a mañá de hoxe -21 de xullo- os operarios teñen realizado os traballos de derrubo do bar situado no entorno das Saíñas, no areal carballés de Baldaio. Trátase dunha construción situada na zona de protección do dominio publico marítimo terrestre da Demarcación de Costas e que supuña un importante impacto visual negativo para a zona costeira da praia. O negocio leva pechado algún tempo e son os donos os que están procedendo a realizar os labores de demolición.
XUNTA DE GOBERNO LOCAL
Luns 21 de xullo do 2008
A sesión ordinaria da Xunta de Goberno Local de Carballo deu hoxe -21 de xullo- o visto bo definitivo ás certificacións finais de varias obras no Concello. En primeiro lugar aos traballos de ‘Acondicionamento de praza municipal en Ramil’; en segundo aos de ‘Apertura de camiños en Baldaio’; e, por último, á ‘Ampliación da ponte da Casilla’. En total, a inversión realizada nestas tres actuacións ascende a máis de 291.500 euros, sendo a obra máis cuantiosa a ponte da Casilla con 143.564 euros.
XUNTA DE GOBERNO LOCAL
Venres 18 de xullo do 2008
O Concello de Carballo vén de presentar a súa proposta para poder formar parte da Rede de Concellos pola Sostibilidade que a Consellería de Medio Ambiente está creando en Galicia. De ser aceptada esta iniciativa, o goberno local espera obter axudas para seguir poñendo en marcha actuacións destinadas a favorecer un uso racional dos recursos, a protección do medio ambiente e que contribúan á mellora da calidade de vida dos veciños.
VERÁN CULTURAL
Venres 18 de xullo do 2008
O grupo de danzas e de música tradicional ‘O Fiadeiro’ de Vigo presenta na Praza do Concello de Carballo o seu espectáculo "Esta noite hai unha fía". ‘O Fiadeiro’ é unha das agrupacións folclóricas máis importantes de Galicia, como testemuñan os numerosos premios recibidos e as colaboracións que teñen emprendido con importantes artistas, como Carlos Núñez ou o grupo Ávalon, co que elaboraron un espectáculo para as galas do Xacobeo 2004. O seu traballo pode verse o domingo 20 de xullo a partir das 22.30 horas.
CULTURA E XUVENTUDE
Venres 18 de xullo do 2008
A praia, a música e o deporte van da man na terceira edición do Festival Sereas e Piratas que acolle o areal de Razo o sábado 26 de xullo, unha cita que xa é un referente para a música galega independente e que se vai consolidando cada ano. Baixo o epígrafe de ‘Galicia Bizarra’ grupos como Franc3s, Los Santos, Novedades Carminha, Telephones Rouges, Schizophrenic Housewives ou Jimenez Los Santos animarán a noite, que abrirán os locais John Marvellous e que pecharán os portugueses X-Wife.
INFRAESTRUTURAS
Xoves 17 de xullo do 2008
O Plan Director de Estradas de Galicia recolle o cambio de titularidade da estrada que comunica a capital de Carballo e Santiago de Compostela, a denominada como CP-1914. Esta vía -cunha lonxitude de 28,9 quilómetros e que enlaza coa comarcal AC-453 ata a capital de Galicia- depende na actualidade da Deputación provincial da Coruña, aínda que, tan pronto o Plan reciba o visto bo, pasaría a ser unha estrada autonómica.
EDUCACIÓN
Xoves 17 de xullo do 2008
A Escola Oficial de Idiomas (EOI) de Carballo incorpora o alemán á súa oferta educativa. A partires do próximo curso 2008-09 os interesados poderán cursar por primeira vez o nivel Básico 1 deste idioma, á espera de que a incorporación de alumnos permita ir ampliando os niveis en anos sucesivos. Por outra banda, dende o próximo mes de setembro xa estarán dispoñibles na Escola todos os niveis de inglés, ademais de que en francés poderá cursarse o grao Intermedio 1. Medra deste xeito a oferta do centro, que ten ido incorporando paulatinamente idiomas e alumnado dende a súa posta en marcha, no ano 2004.
NOITES DE CINE
Mércores 16 de xullo do 2008
O cursiño de verán da Universidade da Coruña ‘Traballando en lingua’ e o programa ‘Noites de cine’ do Verán Cultural 2008 conflúen en Carballo o xoves 17 de xullo en torno á película ‘Pradolongo’. O director do filme, Ignacio Vilar, os actores protagonistas, Rubén Riós e Roberto Porto, e a actriz protagonista, Tamara Canosa, presentarán o seu traballo ante o público carballés no Xardín Municipal a partir das 22.30 horas.
