SUBVENCIÓNS
Martes 5 de agosto do 2008
O Concello de Carballo acaba de recibir axudas por parte da Consellería de Presidencia da Xunta que permitirán reforzar o servizo de Protección Civil do municipio. Así, a agrupación, que conta cun total de quince compoñentes, recibirá 5.705 euros -para a posta en marcha e o desenvolvemento do servizo-, ademais de doce novos vestiarios para socorrista masculino; cinco para socorrista feminino; cinco xogos de bandeiras; seis floppys -ou flotadores de rescate-; e un desfibrilador.
CULTURA
Luns 4 de agosto do 2008
Con motivo da campaña de fomento da lectura ‘Máis libros, máis libres’ que está desenvolvendo a Consellería de Cultura da Xunta, a praia carballesa de Razo acolle o martes 5 de agosto unha acción promocional itinerante que está visitando as principais cidades galegas. Así, un autobús percorrerá as proximidades do areal desenvolvendo actividades para incentivar o hábito da lectura, especialmente entre os máis cativos. A iniciativa desenvolverase entre as 12.00 e as 14.00 horas pola mañá, e entre as 16.00 e as 20.00 horas pola tarde.
VERÁN CULTURAL
Venres 1 de agosto do 2008
A programación do Verán Cultural do Concello de Carballo continúa este venres 1 de agosto coa actuación de Lipan & Company, unha compañía de maxia que presenta o seu espectáculo ‘Traspasando fronteiras’. A Praza do Concello acolle, a partir das 22.30 horas, un show no que teñen cabida a imaxe, a luz, o son, o teatro ou incluso a danza.
URBANISMO
Venres 1 de agosto do 2008
A xunta de compensación do polígono 19 da capital municipal carballesa acaba de facer entrega da urbanización desta área situada no entorno da estrada de Razo. Esta actuación implica a creación de oito novas rúas que xa contan con alumeado público, mobiliario urbano e todo tipo de servizos. As vías están abertas ao tráfico dende hoxe -1 de agosto-, cando o Alcalde, Evencio Ferrero; o tenente de Alcalde, José Antonio Viña; o Concelleiro de Obras, Luís Lamas; e Jesús Lamas, xerente do Grupo Riotorto, cortaron a cinta inaugural.
EMIGRACIÓN
Xoves 31 de xullo do 2008
O Concello de Carballo e o Goberno de Uruguai estreitan as súas relacións coa recepción por parte do Alcalde, Evencio Ferrero, do representante nacional do Parlamento do Goberno de Uruguai e membro da Comisión de Defensa deste país, Luis Rosadilla Pereira. A cita é o venres 1 de agosto a partires das 20.30 horas e está previsto que numerosos representantes do colectivo de uruguaios no municipio e na comarca de Bergantiños asistan a este acto de confraternidade que terá lugar na Casa do Concello.
MEDIO AMBIENTE
Mércores 30 de xullo do 2008
O Concello carballés, a través da Concellaría de Medio Ambiente que dirixe José Antonio Viña, pon en marcha unha iniciativa que pretende educar na sustentabilidade e no coidado da natureza coa organización de varios circuítos experimentais e obradoiros educativos dirixidos para toda a cidadanía, sen límite de idades. As actividades -organizadas pola empresa 'Ciencia divertida’- pretenden que os cidadáns tomen conciencia da situación e problemática medioambiental, buscando a súa participación e fomentando actitudes responsables.
SESIÓN PLENARIA DE XULLO
Martes 29 de xullo do 2008
A Corporación carballesa deu o visto bo á solicitude de adhesión do Concello de Carballo á Rede de municipios pola sustentabilidade nunha sesión plenaria celebrada o luns, 28 de xullo. Todos os grupos políticos apoiaron a proposta por unanimidade, nunha sesión na que tamén se aprobou un suplemento de crédito de 1,2 millóns de euros ou un crédito extraordinario que permitirá abrir as partidas necesarias para a execución do Proxecto Fórum Carballo, no que está incluída a construción da Casa dos Oficios no barrio da Milagrosa.
MEDIO AMBIENTE
Luns 28 de xullo do 2008
O Concello de Carballo vén de colocar unha serie de paneis informativos ao longo da beira do Paseo do Anllóns que atravesa a capital municipal. Trátase dunha serie de carteis divulgativos que ofrecen información medioambiental en varios puntos da senda fluvial e dos que xa poden desfrutar tanto os veciños como os visitantes.
VICEPRESIDENCIA
Luns 28 de xullo do 2008
O Alcalde de Carballo, Evencio Ferrero, vén de asinar hoxe -luns 28 de xullo- en Santiago o convenio que permitirá a inclusión da Escola Infantil As Landras na rede de Galescolas do Consorcio Galego da Igualdade e do Benestar a partir do próximo curso. A incorporación do centro será efectiva no mes de setembro, momento en que as instalacións pasarán a depender da Xunta de Galicia.
ENSINO
Luns 28 de xullo do 2008
A Consellería de Educación iniciará os trámites para proceder á ampliación do centro escolar CEIP Bergantiños da capital municipal carballesa. Así o expresou o Delegado provincial deste departamento autonómico, José Manuel Mouriz Cabalo, despois dunha entrevista co Alcalde de Carballo, Evencio Ferrero, e coa Concelleira de Educación, Mar Eirís. O obxectivo desta ampliación é solucionar os posibles problemas de escolarización que poidan xurdir no futuro no municipio.
RUTA DE AUTOMÓBILES APÓSTOLO 2008
Xoves 24 de xullo do 2008
A Praza do Concello de Carballo fará por unhas horas unha viaxe ao pasado ao acoller a Ruta Vigo-Costa da Morte-Santiago en Automóbiles Antigos Apóstolo 2008. Esta exposición itinerante, organizada polo Club Galego de Automóbiles Antigos -e coa que colabora o Concello de Carballo-, partiu o 23 de xullo dende a praia de Samil (en Vigo) coa intención de chegar ata Santiago e facerlle unha ofrenda ao Apóstolo. Polo camiño, fan parada en distintos puntos da Costa da Morte como Caión, Laxe, ou Muxía, e entre o xoves 24 de xullo e o venres 25 fondean en Carballo.
SESIÓN PLENARIA DE XULLO
Xoves 24 de xullo do 2008
O Goberno carballés presenta na sesión plenaria do mes de xullo a aprobación dun crédito extraordinario que permitirá abrir as partidas necesarias para a execución do Proxecto Fórum Carballo, unha iniciativa de dinamización socio-económica e sostible que permitirá rematar o complexo da Casa dos Oficios no barrio da Milagrosa, ademais de impulsar outras actuacións. O custo global deste proxecto é de 4.658.185 euros, dos que a Unión Europea, a través dos Fondos Feder, aporta 3.260.729.
