30 DE NOVEMBRO
Martes 25 de novembro do 2008
O domingo 30 de novembro o Concello de Carballo celebra o Feirón de Outono, dentro da campaña da Concellaría de Promoción Económica para potenciar as feiras e o comercio local da vila. As actividades céntrase en dúas carpas correspondentes con dous programas: 'Merca-do-bo' e 'Pasea a túa saúde'. No primeiro caso, o obxectivo é fomentar a dieta atlántica e os produtos locais; no segundo, promover hábitos de vida saudables e a práctica do exercicio físico a través do programa 'Carballo Saudable', que chega así á súa fin despois de varios meses de actividades.
PLENO ORDINARIO DO MES DE NOVEMBRO
Martes 25 de novembro do 2008
O Goberno carballés aprobou o luns 24 de novembro en sesión plenaria ordinaria o Plan de Obras e Servizos (POS) e o Plan Complementario da Deputación para 2009 por un importe global de máis de 850.000 euros. A maioría das actuacións están destinadas a saneamentos en parroquias como Bértoa Sofán ou Oza, aínda que tamén se inclúe o ensanche e mellora da travesía de Bértoa -nunha primeira fase dende o cemiterio cara a igrexa- por 181.604 euros, ou a creación de accesos ao porto de Razo -na imaxe- por 143.621 euros, entre outras.
INSTITUTO ENERXÉTICO DE GALICIA
Luns 24 de novembro do 2008
O Concello de Carballo vén de solicitar a colaboración do Inega (Instituto Enerxético de Galicia) para elaborar unha auditoría enerxética dos equipamentos municipais que permita desenvolver un plan de aforro e de eficiencia que facilite a redución do consumo enerxético e a posibilidade de aplicar tanto as enerxías renovables, como políticas para optimizar os recursos, na construción de futuras edificacións e equipamentos, así como na contratación de novos proxectos.
28 DE NOVEMBRO
Luns 24 de novembro do 2008
O Concello, a través da iniciativa Carballo Integra, achégase o vindeiro venres 28 de novembro ao fenómeno da emigración coa celebración dunha Xornada sobre os Desafíos e Influenzas dos Movementos Migratorios na Galicia actual e contemporánea. O obxectivo desta actividade, segundo explica a Concelleira de Emigración, Lourdes Rey, "é comprender mellor a nosa historia como emigrantes e como vila que acolle a novas persoas cada día". Os interesados e interesadas poden inscribirse de balde ata o 26 de novembro e os asistentes recibirán un diploma acreditativo.
SESIÓN ORDINARIA DE NOVEMBRO
Venres 21 de novembro do 2008
A corporación de Carballo celebra o luns 24 de novembro unha sesión ordinaria do pleno no que o principal punto da orde do día é a aprobación do Plan de Obras e Servizos (POS) da Deputación de 2009 por un importe total de 685.972,16 euros, dos que o Concello aporta 47.020. O plan recolle seis proxectos, a maioría dos cales están destinados a completar a rede de saneamentos en parroquias nas que nestes momentos non se están desenvolvendo actuacións nese sentido por parte da Xunta a través de Augas de Galicia.
ADMINISTRACIÓN ELECTRÓNICA
Venres 21 de novembro do 2008
Entre o 28 de novembro e o 4 de decembro o Concello de Carballo organiza as I Xornadas Carballo PortaAberta que nacen co obxectivo principal de fomentar o uso das novas tecnoloxías e da administración electrónica entre os veciños e veciñas do municipio. Así mesmo, durante o desenvolvemento das xornadas presentaranse os resultados da iniciativa territorio.net, que pretende ofrecer ao Concello unha ferramenta de xestión territorial dende a que se poida obter información sobre calquera punto do ámbito municipal. O prazo de inscrición para as xornadas é de balde, e está aberto dende o 17 de novembro.
FORMACIÓN E EMPREGO
Xoves 20 de novembro do 2008
O Telecentro de Carballo acolle o martes 25 de novembro a celebración do seminario 'Atrévete a innovar', no que se tentarán ofrecer claves para mellorar a competivividade e produtividade das empresas abordando o reto da innovación dende un enfoque práctico, presentando conceptos e ferramentas útiles que lles permitan aos emprendedores afrontar o proceso de cambio cara a unha cultura empresarial aberta á creatividade e á innovación. A convocatoria está dirixida ao persoal directivo ou técnico das empresas, así como a outros axentes do territorio, e a cita é a partir das 16.00 horas.
CULTURA
Xoves 20 de novembro do 2008
O venres 21 de novembro continúa, na súa terceira fin de semana, o programa do 'Novembro con Música 08', neste caso coa Agrupación Lírica de Ofelia Nieto que presentará o concerto 'No bico un cantar', no que os veciños e veciñas poderán desfrutar dunha homenaxe a Manuel Curros Enríquez. O sábado 22 chegan os 'Sons de aquí' cun festival de música tradicional de grupos carballeses. As dúas citas son de balde, ás 21.00 horas no Pazo da Cultura.
25 DE NOVEMBRO
Mércores 19 de novembro do 2008
Un ano máis volta á Praza do Concello de Carballo a Feira das Asociacións para conmemorar o 25 de novembro, Día Internacional para a Eliminación da Violencia de Xénero. O domingo 23 deste mes, e coincidindo coa celebración da feira, un total de 16 entidades amosarán durante toda a mañá o seu apoio e solidariedade coas vítimas da violencia contra as mulleres. Pero ademais, este ano o programa da Concellaría de Igualdade inclúe a arte, coa organización dunha exposición urbana de sensibilización; o teatro, cunha representación que ten recibido o premio Rafael Dieste; e a prevención, con obradoiros entre os nenos de Primaria dos colexios da capital municipal. Todo destinado a acadar a "unidade fronte á violencia machista", en verbas do Alcalde, Evencio Ferrero.
28 DE NOVEMBRO
Martes 18 de novembro do 2008
O Concello de Carballo, a través da Concellaría de Emigración que dirixe Lourdes Rey, organiza unha Xornada sobre os desafíos e influenzas dos movementos migratorios na Galicia actual e contemporánea. Esta cita, que se desenvolve na tarde do 28 de novembro, abordará temas como a integración laboral dos inmigrantes, os primeiros pasos da súa acollida ou a integración do alumnado inmigrante. Dende hoxe, e ata o 26 de novembro está aberto o prazo de inscrición.
CARBALLO LIMPO
Martes 18 de novembro do 2008
Unha cuadrilla de rapaces e rapazas do centro especial Aspaber do Concello de Carballo comezou esta semana cos traballos de limpeza do Paseo do Anllóns na parroquia de Bértoa, en concreto dende a zona de Muíño do Quinto ata as cercanías da capital municipal. Os labores consisten na retirada de herbas e vexetación dos bordes do paseo mediante medios manuais, de xeito que se evita o emprego de herbicidas perxudiciais.
SECRETARÍA XERAL DE POLITICA LINGÜÍSTICA
Luns 17 de novembro do 2008
Arredor de 1.500 nenos e nenas dos centros escolares de Carballo participarán ao longo do mes de novembro e ata o 18 de decembro nunha campaña de animación lingüística en galego promovida pola Secretaría Xeral de Política Lingüística, en colaboración co Concello de Carballo e as editoriais Kalandraka, Galaxia e Edicións Xerais. A actividade está dirixida fundamentalmente aos alumnos de Infantil e Primaria e percorrerá non só os centros da capital municipal, senón tamén os dalgunhas parroquias, ademais do Pazo da Cultura.
