CULTURA
Venres 5 de decembro do 2008
A exposición 'O Himno. Os tempos son chegados' e a actuación da Banda Municipal de Carballo conforman o peche do programa do 'Novembro con música 08', no que durante un mes teñen participado un total de 20 agrupacións musicais de diferentes estilos e procedencias. Aínda que a mostra sobre a composición máis emblemática para os galegos e galegas permanece no Pazo da Cultura dende o 4 de decembro ata o 7 de xaneiro, a actuación da banda que dirixe José Vicente Pérez Planells supón hoxe -5 de decembro- a fin de catro semanas dedicadas á música.
I XORNADAS CARBALLO PORTAABERTA
Venres 5 de decembro do 2008
O Concello de Carballo, a través da Concellaría de Promoción Económica que dirixe Xosé Manuel García Guillín, prepara a expansión dos espazos de acceso a Internet e dos programas de alfabetización e formación nas novas tecnoloxías ata a zona rural do municipio. Despois da posta en marcha dun proxecto que levará a conexión da banda ampla ata a maioría das parroquias no prazo aproximado dun ano, agora o obxectivo é a creación de aulas de informática a través da dotacións de puntos de conexión nos centros sociais existentes ou da creación de novos espazos que permitan que "a xente que non está no casco urbano poida acceder ás novas tecnoloxías en igualdade de condicións", en verbas do concelleiro.
INAUGURACIÓN
Mércores 3 de decembro do 2008
Arrincaron no Telecentro de Carballo as I Xornadas Carballo PortaAberta, unha iniciativa destinada a "abrir unha fiestra ao mundo" a través das novas tecnoloxías da información e a comunicación, segundo expresou o Delegado Provincial de Industria, José Luis Barcia Picos, durante o acto de inauguración. Cun programa centrado na administración dixital e a conectividade no Concello de Carballo -o 3 de decembro- así como na xestión territorial e a dinamización -o 4 de decembro- as xornadas complétanse cunhas olimpíadas lúdicas destinadas a promover entre os veciños e veciñas o emprego de ferramentas relacionadas co uso de Internet e a difundir información sobre das características e peculiaridades do municipio carballés.
TRÁFICO
Mércores 3 de decembro do 2008
Os semáforos situados na travesía de Bértoa da capital municipal carballesa veñen de entrar en funcionamento. Dende o martes 2 de novembro os veciños e veciñas da parroquia contan con este servizo que ten como obxectivo mellorar a seguridade viaria -especialmente para os peóns- e facilitar que os habitantes da zona poidan cruzar a travesía co menor risco posible. Dende a Concellería de Tráfico que dirixe Benedito Viña queren, así mesmo, subliñar que os semáforos funcionan mediante o sistema de pulsador, polo que os peóns deben premer un botón e esperar a que o sinal se poña en verde para eles para poder cruzar.
CULTURA
Mércores 3 de decembro do 2008
A Concellaría de Cultura de Carballo xa ten gañadores ou gañadoras para o Concurso de Cartel e Postal de Nadal 2008. Na mañá do 3 de decembro, catro rapaces e rapazas de Primaria dos centros escolares do municipio, coa axuda dun representante dunha das asociacións do Concello e da propia Concelleira de Cultura, Belén Lendoiro, elixiron os debuxos -de entre os arredor de 1.200 presentados- que servirán para seleccionar a tarxeta de felicitación do Concello de Carballo e o cartel que anunciará as vindeiras festas do Nadal. Os debuxos e o nome dos gañadores daranse a coñecer a próxima semana durante a presentación do programa de actividades do Nadal.
30 DE NOVEMBRO
Luns 1 de decembro do 2008
A pesar do mal tempo, o Feirón de Outono celebrado o 30 de novembro na Praza do Concello de Carballo rexistrou unha elevada afluencia, tanto no stand de 'Merca-do bo' como na carpa de 275 metros cadrados de 'Pasea a túa saúde', que permaneceu todo o día diante da casa consistorial. Neste último caso, preto de 250 veciños e veciñas -entre eles o Alcalde da vila, Evencio Ferrero- comprobaron a súa condición física e de saúde neste circuíto instalado pola Dirección Xeral de Saúde Pública -e incluído en 'Carballo Saudable'- no que se realizaron probas e se fixeron recomendacións sobre o exercicio físico e o desenvolvemento dunha dieta axeitada.
SANTA CECILIA
Venres 28 de novembro do 2008
O programa do 'Novembro con música 08' está a piques de dar os seus últimos compases, neste caso coa música dos acordeóns da man do profesor do Conservatorio de Carballo, Manuel Bello, e tamén co tradicional festival de corais Santa Cecilia 2008, que organiza a Coral Polifónica de Bergantiños. O venres 28 e o sábado 29 de novembro ás 21.00 horas o auditorio do Pazo da Cultura dará paso á recta final dun mes dedicado á música, que terá o peche definitivo coa actuación da Banda Municipal de Carballo o 5 de decembro.
30 DE NOVEMBRO
Venres 28 de novembro do 2008
Unha carpa de 275 metros cadrados cun equipo de 30 persoas, un concurso de produtos do agro, unha 'pulpeira', unha exposición audiovisual, animación de rúa, o pan, as castañas e outros produtos de tempada serán os protagonistas do Feirón de Outono que Carballo celebra o domingo 30 de novembro. Así, 'Pasea a túa Saúde' e 'Merca-do bo' son dous programas que contarán con cadansúa carpa na Praza do Concello co obxecto de promover os estilos de vida saudable, a dieta atlántica e a compra de produtos do agro do municipio e da comarca. Durante todo o día haberá un amplo abano de actividades destinadas a dinamizar a feira e a redundar na saúde dos veciños e veciñas.
OBRAS E SERVIZOS
Xoves 27 de novembro do 2008
O Alcalde de Carballo, Evencio Ferrero, e o Concelleiro de Obras e Servizos, Luís Lamas, informan aos usuarios e usuarias do parque infantil situado no entorno do Centro Social de Sofán de que os xogos e aparellos desas instalacións cumpren con todas as medidas de seguridade requeridas e contan con todos os certificados oficiais precisos para o seu emprego público. O Concello quere aclarar que esta actuación, realizada ante a demanda dos veciños e veciñas de Sofán, fíxose con todas as garantías por parte da empresa adxudicataria -Galopín Parques SL- e que contou coas ferramentas de seguimento pertinentes para asegurar o seu bo funcionamento dende a súa instalación.
PROMOCIÓN DO COMERCIO
Xoves 27 de novembro do 2008
O Concello de Carballo contará un ano máis, e por cuarta vez consecutiva, cunha pista de patinaxe sobre xeo que estará situada nunha carpa no aparcadoiro do Centro Comercial Bergantiños dende principios de decembro ata o 11 de xaneiro. A pista, de 15 por 30 metros, ten capacidade para 150 persoas patinando e terá un horario de 10.00 a 14.00 horas e de 16.00 a 22.00 horas. O Concello carballés resalta a importancia destas instalacións "como motor para o comercio" e como un medio para atraer a xente de toda a Costa da Morte, ou incluso de Santiago ou A Coruña, segundo subliña o Concelleiro de Promoción Económica, Xosé Manuel García Guillín.
CULTURA E DEPORTE
Mércores 26 de novembro do 2008
O Concello de Carballo vén de aprobar en Xunta de Goberno un convenio de cooperación entre a Xunta de Galicia e o Concello para a creación de infraestruturas de deporte tradicional. Mediante este acordo, será posible a creación de dous campos de chave semicubertos na zona verde do polígono urbano número 26 da capital municipal, situado na rúa Perú no entorno de Rego da Balsa. O convenio inclúe o proxecto básico e de execución realizado por encargo da Consellería de Cultura e Deporte, que financia o proxecto na súa totalidade con máis de 57.000 euros.
XUNTA DE GOBERNO LOCAL
Martes 25 de novembro do 2008
A Xunta de Goberno Local -reunida o luns 24 de novembro- deu a aprobación definitiva ao proxecto de urbanización do polígono 9 da capital municipal, situado no entorno da rúa Gravador Manuel Facal. O desenvolvemento desta área supón a creación de beirarrúas en ámbalas dúas marxes desta vía e a dotación de servizos na marxe esquerda, coa implantación de redes de augas pluviais e residuais, alumeado público e mobiliario urbano. Así mesmo, o polígono inclúe a urbanización dos primeiros metros dunha nova rúa perpendicular ás rúas Gravador Manuel Facal e Pintor Urbano Lugrís, unha vía que alindaría coa Avenida de Bergantiños e transcorrería paralela á Gran Vía e á Vila de Negreira. O orzamento global para o desenvolvemento da urbanización é de 147.234 euros.
