A PROBA É PUNTUABLE PARA O CAMPIONATO GALEGO
Venres 17 de xullo do 2009
Carballo acolle o sábado 18 de xullo o I Autocross de Bergantiños, a primeira proba que se celebra no Circuíto Municipal de Motor de Bértoa dende o ano 2003 e que ten lugar unha vez rematados os traballos para o acondicionamento do espazo destinado ao autocross. A cita é a sétima proba do presente Campionato Galego, e está organizada pola recentemente constituída Escudaría Bergantiños Motor, coa colaboración co Concello. A organización espera que esta cita reúna aos principais pilotos da comunidade, ademais dalgún que outro foráneo, con vistas a disputar a primeira carreira sobre este remodelado circuíto municipal que prevé albergar unha cita do Campionato de España de Autocross este mesmo ano. Dende a Escudaría Bergantiños, o seu responsable, Francisco Rojo, informa de hai un total de 102 pilotos inscritos.
CONCELLARÍA DE EDUCACIÓN
Mércores 15 de xullo do 2009
Nestes días veñen de principiar os traballos para rehabilitar e acondicionar o CEIP Fogar da capital municipal de Carballo para poder crear dúas novas unidades destinadas a Educación Infantil. O obxectivo destas melloras é ampliar a oferta de cara ao próximo curso 2009-2010, atendendo a alta demanda de solicitudes de escolarización nos centros de ensino carballeses, e especialmente na zona do colexio Fogar da capital municipal. Está previsto que as obras poidan rematarse durante o transcurso dos meses de verán, para que todo estea listo para o comezo do próximo curso escolar.
PRETENDE CONSTRUÍR ARGUMENTOS EN PROL DA LINGUA GALEGA
Mércores 15 de xullo do 2009
O Pazo da Cultura de Carballo acolle dende hoxe a celebración do V Curso de verán sobre Dinamización Lingüística 'Traballando en lingua', que este ano se centra na análise do compromiso individual aos argumentos para a defensa e promoción da lingua galega. Nesta quinta edición participarán arredor de 80 persoas, aínda que teñen solicitado a inscrición máis de 100. No acto de inauguración, no que participaron o secretario xeral de Política Lingüística da Xunta de Galicia, Anxo M. Lorenzo; o deputado de Normalización Lingüística da Deputación, Xoán M. Sande; o alcalde de Carballo, Evencio Ferrero; a directora do Servizo de Normalización Lingüística da Universidade da Coruña, Goretti Sanmartín; e o presidente da Coordinadora de Traballadores/as de Normalización da Lingua (CTNL), Nel Vidal, subliñouse a necesidade de "crear un argumentario claro, concreto e sinxelo que sexa entendido polo conxunto da cidadanía", co obxectivo de "que se use máis e mellor a lingua galega", en verbas de Nel Vidal e Goretti Sanmartín.
ENTRE O MÉRCORES 15 E O VENRES 17 DE XULLO
Martes 14 de xullo do 2009
Entre o mércores 15 e o venres 17 de xullo ten lugar no Pazo da Cultura de Carballo o V Curso de verán sobre Dinamización Lingüística 'Traballando en lingua', que este ano se centra na análise do compromiso individual aos argumentos para a defensa e promoción da lingua galega. O curso está organizado pola Universidade da Coruña, en colaboración co Concello de Carballo e a Coordinadora de Traballadores/as de Normalización da Lingua (CTNL). Nalgunhas das actividades do curso tamén colabora a Área de Normalización Lingüística da Deputación da Coruña. A inauguración ten lugar o mércores 15 ás 10.15 horas, e nela interveñen o secretario xeral de Política Lingüística da Xunta de Galicia, Anxo Lorenzo Suárez; o deputado responsábel de Normalización Lingüística da Deputación da Coruña, Xoán Sande Muñiz; o alcalde de Carballo, Evencio Ferrero; a directora do Servizo de Normalización Lingüística da Universidade da Coruña, Goretti Sanmartín Rei; e o presidente da Coordinadora de Traballadores/as de Normalización da Lingua (CTNL), Nel Vidal Barral.
ABERTO O PRAZO DE INSCRICIÓN ATÉ O VENRES 17 DE XULLO
Martes 14 de xullo do 2009
O Concello abre o prazo de inscrición ata o vindeiro venres 17 de xullo para os locais interesados en participar na I Ruta de Pinchos de Carballo, que se levará a cabo os sábados e domingos entre o 8 e o 30 de agosto de 2009, e que busca promocionar os produtos, a gastronomía e os locais hostaleiros do casco urbano carballés. Esta iniciativa enmárcase dentro da programación de Feiróns de Tempada, que principiou no verán de 2008. Entre as características desta Ruta de Pinchos, destaca que cada establecemento colaborador presentará unha tapa distinta cada día de celebración desta cita, excepto o 30 de agosto que a tapa será común para todos os locais e conterá produtos da zona. As tapas serviranse de forma gratuíta con cada consumición.
A EMPRESA É A CORUÑESA ABADEUS ARQUITECTURA SLP
Luns 13 de xullo do 2009
A mesa de contratación para a redacción do proxecto básico e de execución da obra de remodelación do mercado municipal do Concello de Carballo vén de adxudicar esta actuación, de xeito provisional, á empresa Abadeus Arquitectura SLP, que conta con domicilio social na Coruña. A proposta presentada por Abadeus Arquitectura SLP recibiu a máxima puntuación despois de ser avaliada e de terse elaborado un informe por parte dun grupo de expertos, formado polo arquitecto municipal carballés, por un profesor titular da Escola de Arquitectura da Universidade da Coruña e por dous dos arquitectos responsables da recente remodelación do mercado das Conchiñas, situado tamén na capital provincial coruñesa.
O ENTE PROVINCIAL COLABORA NA FINANCIACIÓN DESTES PROXECTOS
Venres 10 de xullo do 2009
O Vicepresidente da Deputación Provincial da Coruña, Pablo Villamar, e o Deputado provincial Xoan Manoel Sande veñen de realizar unha visita institucional ao Concello de Carballo. Despois de ser recibidos polo Alcalde, Evencio Ferrero, e outros membros da corporación, na casa consistorial, realizaron un percorrido por dous puntos do municipio onde se están a desenvolver proxectos que contan con financiamento por parte do ente provincial: a piscina Vila de Noia da capital municipal e a parroquia de Cances. Tanto Villamar como Sande estiveron na piscina onde está prevista a colocación de paneis solares e que está en pleno proceso de remodelación, e na parcela de Cances onde está prevista a construción dun centro socio cultural. O pleno da Deputación provincial vén de aprobar o acordo para poder financiar nun 80 por certo o custe destas actuacións, con cargo a un plan de investimentos en instalacións deportivas e a un plan para edificios culturais.
O EQUIPO DE FÚTBOL 7 ACADOU O SEXTO POSTO
Venres 10 de xullo do 2009
Os preto de 70 rapaces e rapazas de Carballo que formaron parte dos equipos que participaron por primeira vez nos Xogos do Eixo Atlántico, que acadaron desta volta na Coruña á súa oitava edición, chegaron ao Concello cunha medalla de ouro en natación e con boas clasificacións en fútbol 7, baloncesto e balonmán. A expedición carballesa chegou á Praza do Concello o venres 10 de xullo ao mediodía, despois de case unha semana na Coruña participando nunha cita que pretendeu constituír un tempo de convivencia, diversión, intercambio e lecer entre preto de 2.000 mozos e mozas do noroeste peninsular que representaron aos concellos máis poboados de toda Galicia e o norte de Portugal.
OS EQUIPOS DE FÚTBOL 7 E BALONCESTO LOITAN POLO 5º POSTO
Xoves 9 de xullo do 2009
Os deportistas carballeses que participan nos VIII Xogos do Eixo Atlántico asisten hoxe xoves 9 de xullo á cerimonia de clausura da competición, que ten lugar a partires das 21:00 horas no Palacio de Deportes da Coruña. De seguido a organización ten previsto facer unha cea de despedida para os xogadores e xogadoras na polideportiva de Riazor, polo que pola tarde non está previsto que se dispute ningunha proba ou partido. Para mañá, venres, están previstas as xornadas finais e a expedición carballesa regresará a partires das 13.00 horas, despois dunha semana de convivencia e competición, nesta primeira participación por parte do Concello de Carballo nos VIII Xogos do Eixo Atlántico.
CON LA BARRACA, O MAGO DANI GARCÍA E O GRUPO VALACAR
Xoves 9 de xullo do 2009
Despois da interculturalidade e a música da pasada fin de semana, que achegou Galicia e Uruguai, esta fin de semana o programa do Verán Cultural 2009 céntrase na maxia e o teatro, na súa faciana máis clásica. Lope de Vega chega da man de Las Rutas de la Barraca 2009, que representarán La Gatomaquia, o xoves 9 de xullo na Praza do Concello, nunha adaptación especialmente dirixida para os máis cativos e cativas. Así mesmo, Federico García Lorca estará presente o sábado 11 de xullo co Grupo de Teatro afeccionado Valacar da ONCE, coa obra 'Amor de don Perlimplín con Belisa no xardín', adaptada para deficientes visuais. A maxia, neste caso dirixida especialmente a nenos e nenas vén da man de Dani García, o venres 10 de xullo.
PROXECTO INCLUÍDO NO FONDO ESTATAL DE INVESTIMENTO LOCAL (FEIL)
Xoves 9 de xullo do 2009
O Concello principiou o pasado 1 de xuño os traballos para reformar a piscina Vila de Noia da capital carballesa. Nestes momentos, as obras de reforma avanzan a bo ritmo, xa que os operarios veñen de retirar as bancadas das instalacións (na imaxe pode observarse parte do desenvolvemento deste proceso). Xusto no lugar do graderío está previsto construír unha zona lúdica con spa, jacuzzi, sauna, vapor, banco quente e unha piscina de chapoteo para cativos e cativas. Así mesmo, dende a Concellaría de Deporte que dirixe Marcos Trigo informan de que o Concello aproveitará estas bancadas para situalas no campo anexo do Complexo Deportivo das Eiroas. O obxectivo é aproveitar os recursos existentes para seguir mellorando as instalacions deportivas do Concello.
OS DE BALONMÁN MASCULINO PELEXAN POLO 5º POSTO
Mércores 8 de xullo do 2009
Na terceira xornada dos VIII Xogos do Eixo Atlántico A Coruña 2009, por parte do Concello de Carballo entraron na competición os equipos de balonmán masculino, baloncesto masculino, fútbol 7 e baloncesto feminino. De entre todos eles hai que subliñar a actuación do combinado de Fútbol 7, que non perdeu ningún dos seus partidos nin ten encaixado un só gol no que vai de competición, con tres xornadas disputadas. No seu último encontro, o equipo de Carballo enfrontouse ao equipo portugués de Maceda de Cabaleiros. Claramente superior tanto técnica como tacticamente o equipo de Carballo marchou ao descanso cun resultado de 3-0. O final deste partido foi un claro 5-0, rubricando ata o momento unha traxectoria inmellorable.
