A BANDA DO CONSERVATORIO DA CORUÑA E TALÍA TEATRO
Xoves 28 de xaneiro do 2010
Os Venres Culturais 2010 seguen esta fin de semana, o venres 29 e o domingo 31 de xaneiro, con dúas apostas ben distintas: música clásica e teatro. O venres está previsto o concerto da Banda Sinfónica do Conservatorio Superior de Música da Coruña, que presentará un programa moi variado, dende composicións destinadas ao cine até a música clásica. A cita é a partires das 21.00 horas no Pazo da Cultura, e a entrada é de balde. En cambio, o domingo é a quenda para a representación da función infantil 'Valentino Rufini e Âkil Pillabán de viaxe a Milán (e van sen un can)', dirixida ao público familiar. Neste caso, a representación é a partires das 18.00 horas, dentro do ciclo 'En familia' e custa 2,5 euros -2 euros prezo especial con desconto-.
PROTECCIÓN CIVIL ATENDEU UN TOTAL DE 349 EMERXENCIAS
Mércores 27 de xaneiro do 2010
O balance da Policía Local respecto da actividade desenvolvida durante 2009 indica unha tendencia positiva en canto á mellora da seguridade e que baixaron tanto o número de accidentes de tráfico (con 30 menos respecto de 2008) como os peóns feridos en accidentes de circulación (con 10 menos respecto ao ano anterior). Así mesmo, o balance de actividades do servizo municipal de Protección Civil indica que se teñen rexistrado 2.686 intervencións, un total de 652 máis que en 2008. Javier Souto Facal, responsable do servizo, indica que este incremento é debido fundamentalmente ao ciclón Klaus e ao forte temporal que se rexistrou no Concello a finais de 2009. En canto ás emerxencias, téñense rexistrado un total de 349, tanto en Carballo como noutros puntos de Bergantiños.
LUZ VERDE PARA O FONDO ESTATAL
Martes 26 de xaneiro do 2010
A sesión plenaria ordinaria do mes de xaneiro saldouse, despois de máis de tres horas de duración, coa aprobación dos orzamentos do Concello para 2010, que suman 23,2 millóns de euros (incluíndo os 884.000 euros das contas do Padroado Deportivo Municipal) e que implican 5,5 millóns de euros de investimentos reais, una cifra que rolda o 25 por cento do importe total do presuposto. Entre as partidas recollidas, destaca unha achega 1.172.562,55 euros para culminar o proxecto Fórum Carballo no barrio da Milagrosa (a maqueta, na imaxe); ou unha de 1.500.000 euros para a construción dunha biblioteca comarcal. O pleno tamén supuxo a aprobación do Fondo Estatal para o Emprego e a Sostenibilidade Local 2010, que implica un investimento de 3.313.745,73 euros.
NO POLÍGONO DE BÉRTOA A PARTIRES DAS 11.00 HORAS
Martes 26 de xaneiro do 2010
O circuíto de cross do polígono de Bértoa de Carballo acolle o domingo 31 de xaneiro a celebración do Campionato Galego Absoluto de Campo a través. Trátase da competición atlética máis antiga de Galicia, xa que a súa primeira edición disputouse en Vigo no ano 1916 con 43 corredores sobre dunha distancia de 5.000 metros. Está será a LXXV edición en homes e a XLIII en mulleres, mentres que as categorías serán júnior, promesa e sénior (absoluta) individual e por equipos. O Presidente da Federación Galega de Atletismo, Isidoro Hornillo, subliñou que a proba será decisiva para conformar a selección galega que participará no Campionato de España que terá lugar na Torre de Hércules da Coruña. Tamén servirá para conformar a selección de clubes.
DOMINGO 30 DE XANEIRO DE 9.30 A 14.30 HORAS
Martes 26 de xaneiro do 2010
O domingo 30 de xaneiro Carballo acolle o Feirón de Inverno, a décima cita enmarcada dentro da iniciativa dos Feiróns de Tempada, nacida en 2008 co obxectivo de impulsar o comercio local e consolidar e dinamizar as feiras tradicionais. Nesta ocasión haberá novas actividades, centradas especialmente na dinamización do edificio do novo mercado. Así, desenvolverase unha campaña durante a fin de semana na que se sortearán, entre os clientes da praza de abastos que realicen as súas compras no mercado o sábado 29 e o domingo 30 de xaneiro, tres lotes de compra de 50 euros (divididos en vales por un importe de 10 euros) para gastar nos establecementos da praza, tanto os exteriores como os de alimentación do interior. Ademais, o domingo 30 entre as 9.30 e as 14.30 horas, no foro do primeiro andar do mercado municipal (andar 0 dende o acceso da Gran Vía) haberá un punto de información sobre Merca-do bo, unha iniciativa que pretende fomentar o consumo de produtos da terra e de produtos de calidade para acadar unha dieta sa. Nese mesmo espazo realizarase o sorteo das rifas ás 13.30 horas. Así mesmo, está prevista unha actuación musical, tamén na praza de abastos e nos postos e espazos do Feirón, a cargo do Dúo Sobre Rodas.
FEIRÓN DE INVERNO 2010
Sábado 23 de xaneiro do 2010
Despois da exitosa experiencia da I Ruta do Pincho de Verán, o Concello de Carballo, a través da Concellaría de Promoción Económica, e en colaboración cos locais hostaleiros do casco urbano, pon en marcha a I Ruta do Pincho de Inverno, que ten lugar entre o 30 de xaneiro e o 28 de febreiro. Un total de once establecementos de restauración participan na iniciativa, que comeza coincidindo coa celebración do Feirón de Inverno 2010 o último domingo de xaneiro. O horario da iniciativa é os sábados e domingos de 13.00 a 15.00 e de 20.00 a 22.00 horas, cunha pequena variación respecto do Pincho de Verán (en que era de 12.00 a 14.00 horas). Tamén está previsto mellorar os premios para os veciños e veciñas que participen, xa que poderán gañar unha estadía no Balneario de Carballo, ou ben unha cea por valor de 100 euros nun dos locais hostaleiros que colaboran na ruta.
O PLENO ABORDA A APROBACIÓN DO ORZAMENTO DE 2010
Venres 22 de xaneiro do 2010
A sesión plenaria ordinaria de xaneiro, que ten lugar o luns 25 ás 20.30 horas, recolle a aprobación dos proxectos de investimentos do Concello de Carballo incluídos no Fondo Estatal para o Emprego e a Sostenibilidade Local 2010. Trátase dun total de 20 actuacións que suporán a creación de 112 postos de traballo e que contan cun orzamento global de 3.313.745,73 euros. Os proxectos irán destinados na súa maioría a saneamentos, con 1.957.000 euros e a aforro enerxético, con 843.000 euros. O resto investirase en melloras en centros educativos municipais, como na creación dun pavillón polideportivo no CEIP Nétoma-Razo, con 284.306,33 euros; ou noutras melloras, como o proxecto básico de execución de rehabilitación para a conservación do local social da Brea.
INAUGURACIÓN DAS ACTUACIÓNS DO FONDO ESTATAL (FEIL) 2009
Xoves 21 de xaneiro do 2010
A colaboración entre o Concello de Carballo e a Administración do Estado ten "unha nota de dez". Así o ten expresado o Delegado do Goberno, Antón Louro, nunha visita na que percorreu as principais obras realizadas con cargo ao Fondo Estatal de Investimento Local (FEIL) 2009 e na que inaugurou estas actuacións nun acto nas novas instalacións da piscina Vila de Noia. Louro subliña que a colaboración entre o Concello e o Estado está dando moi bos resultados e que "Carballo é o mellor exemplo". En total, entre 2009 e 2010 o Goberno central terá realizado un investimento de 12,5 millóns de euros entre os Fondos Locais (con 8,6 millóns de euros: 5,5 en 2009 e 3,3 previstos para 2010) e as achegas para a creación dunha biblioteca comarcal (1,5 millóns), o novo mercado (1,8 millóns), saneamentos (2,8 millóns), 250.000 euros para infraestruturas rurais, e 30.000 a través do Imserso.
SÁBADO 23: ANIVERSARIO DO CORO AIRES DE BERGANTIÑOS
Mércores 20 de xaneiro do 2010
O programa dos Venres Culturais 2010 arrinca con teatro na forma de monólogo co humorista carballés Rober Bodegas. O espectáculo, titulado 'E un condón por se pillo', está escrito, dirixido e interpretado por el mesmo. Nel, relata o seu espertar sexual e os traumas adolescentes e inseguridades propias dese momento e a importancia na súa vida de personaxes tan dispares como Lorena Verdún ou Bruce Lee. Despois de presentar, no marco do Nadal Cultural, o seu primeiro libro 'Novedades souvenirs, artículos de coña', regresa a Carballo para seguir ofrecendo mostras do seu espectáculo, que ten visitado xa cidades como Lalín, ou León, e salas como o Teatro Colón da Coruña. A citá é o venres 22 de xaneiro ás 21.00 horas no Pazo da Cultura.
DOMINGO 23 DE XANEIRO ÁS 18.00 HORAS
Mércores 20 de xaneiro do 2010
O domingo 23 de xaneiro comeza no Pazo da Cultura a programación En Familia dos Venres Culturais cun espectáculo destinado ao público máis novo, de entre 1 e 5 anos, a cargo da compañía Títeres Trompicallo. Presentan "O día que chegou unha nube e choveu", unha historia que achega os máis cativos e cativas á natureza. Teatro para gozar cos cinco sentidos, teatro para os que comezan a explorar o mundo, para os que descobren as cousas por primeira vez e poñen o corazón en todo canto fan. Títeres Trompicallo é unha das compañías máis exitosas dentro do panorama de monicreques galego, comprometida coa procura de novas linguaxes teatrais para o público infantil e presente en escenarios de toda España. Esta función comeza ás 18.00 horas no Auditorio do Pazo da Cultura. O prezo ordinario da entrada é de 2,5 €, con 2 € de prezo reducido para estudantes con carné de estudante, maiores de 65 anos e menores de 12 anos. O número de espectadores é reducido xa que poderán entrar tan só 50 nenos e nenas e 50 adultos. Ademais da reserva anticipada da entrada, é posible mercala no despacho de billetes do Pazo dende dúas horas antes do inicio da función.
XUNTA DE GOBERNO LOCAL
Luns 18 de xaneiro do 2010
A Xunta de Goberno Local celebrada o luns 18 de xaneiro vén de aprobar o expediente de contratación do contrato administrativo de servizos para a 'Dirección da execución e coordinación de seguridade e saúde da obra de Remodelación do Mercado Municipal do Concello de Carballo'. O prezo estimado do servizo é de 56.000,16 euros e o expediente tramitarase de urxencia. Así mesmo, fóra da orde do día, a Xunta de Goberno serviu para solicitar tres subvencións relacionadas coa área de Servizos Sociais, todas elas no marco das axudas da Deputación Provincial da Coruña e referidas á política de igualdade entre homes e mulleres; a programas de servizos sociais de atención primaria; e a programas de envellecemento activo.
A INAUGURACIÓN OFICIAL SERÁ O XOVES 21 DE XANEIRO
Sábado 16 de xaneiro do 2010
Dous dos abonados máis veteranos e máis constantes das piscinas municipais de Carballo, acompañados do titular do abono número 1.000 e da abonada número 2.000, puideron ver de primeira man as novas instalacións da piscina Vila de Noia, antes da súa apertura ao público, prevista para a próxima semana. María Dolores Varela e Daniel Canedo Añón, usuarios rexistrados dende xaneiro de 2004, xunto con Mónica García, abonada número 2.000 con data de 12 de xaneiro de 2010, e José Manuel Suárez, titular do abono número 1.000 con data de 23 de decembro de 2009, examinaron a nova zona de spa das instalacións, que conta con chorros de hidroterapia, vaso de chapoteo, jacuzzi, tres duchas de cabina, baño de vapor, banco térmico, sauna e unha fonte de auga fría. Unha piscina completamente nova realizada coa achega do Fondo Estatal de Investimento Local (FEIL) 2009, con 892.182,16 euros.
