XUNTANZA DO CONSELLO REITOR DO PADROADO DEPORTIVO MUNICIPAL
Xoves 18 de marzo do 2010
O Consello Reitor do Padroado Deportivo Municipal mantivo o mércores 17 de marzo unha xuntanza na que se delimitaron as directrices de actuación do organismo para os próximos anos, ademais de ofrecerse datos sobre a evolución económica e de abonados das instalacións deportivas de Carballo. As cifras indican que o Padroado conta a día de hoxe con 1.354 abonos (entre fichas familiares e individuais) e 2.562 abonados. Neste último caso houbo un incremento respecto a marzo de 2009 de 914 persoas, cunha suba dun 36 por cento. A reunión tamén serviu para aprobar un novo regulamento de uso das instalacións deportivas municipais para clubs, usuarios e público; para sacar adiante a Relación de Postos de Traballo (RPT) do Padroado; ou para aprobar unha modificación da Ordenanza de Prezos Públicos das Instalacións Deportivas, que mantén o prezo dos abonos actuais, pero engade posibilidades como o aluguer dos campos de fútbol municipais.
VENRES 19 E SÁBADO 20 DE MARZO ÁS 21.00 HORAS
Mércores 17 de marzo do 2010
A Aula Municipal de Teatro afeccionado de Carballo actúa por primeira vez diante do público levando ao escenario 'A ruleta rusa'. O texto está baseado en catro pezas breves do autor ruso Anton Chéjov tituladas 'Fin de mes', 'Petición de man', 'O oso' e 'Unha criatura indefensa'. O humor é un dos ingredientes básicos desta representación, que está adaptada e dirixida por Artur Trillo e na que participan ata 18 integrantes da Aula de Teatro, que comezou a súa andaina no ano 2009. A duración prevista do espectáculo é de 90 minutos e a entrada é de balde. Os interesados e interesadas poden recoller as invitacións nas Oficinas de Cultura en horario de de 11.00 a 14.00 horas, ou ben na Taquilla o mesmo día da función. As citas, o venres 19 e o sábado 20 de marzo a partires das 21.00 horas no auditorio do Pazo da Cultura.
HAI CINCO FERIDOS MENOS QUE EN XANEIRO
Martes 16 de marzo do 2010
O informe mensual da Policía Local carballesa indica que en febreiro de 2010 téñense rexistrado un total de 13 accidentes de tráfico -dous menos que en xaneiro deste mesmo ano-, mentres que o número de feridos ten baixado de 7 a 2 respecto do mes anterior. Hai que destacar que ningún dos lesionados é un peón. Pola contra, as forzas de seguridade detectaron 11 delictos contra a seguridade viaria, con 8 alcoholemias positivas -o dobre que no mes de xaneiro. Ademais, foron atopadas un total de tres persoas conducindo sen carné. Seguindo co apartado de tráfico, hai que subliñar, así mesmo, que se ten reducido case á metade o número de multas tramitadas polo Concello, pasándose de 274 en xaneiro a 184 en febreiro, incluíndo as tramitadas pola Xefatura Provincial de Tráfico. A grúa, por outra banda, ten retirado 4 vehículos menos que en xaneiro, con 12.
XUNTA DE GOBERNO LOCAL
Luns 15 de marzo do 2010
A Xunta de Goberno Local vén de sacar hoxe adiante a adxudicación definitiva do proxecto de 'Execución da remodelación do Mercado Municipal'. A proposta de adxudicación provisional tivo lugar durante unha xuntanza da mesa de contratación realizada hai case un mes, o pasado 17 de febreiro, e recaeu na empresa carballesa Decoraciones J. Bello. A oferta supón unha baixa dun 23 por cento sobre o prezo de adxudicación, polo que se pasa dun orzamento de 2.443.436,78 euros a un de 1.881.446,32 euros. O prazo previsto para o desenvolvemento dos traballos tamén ten sufrido unha notable redución, pasándose de 16 a 10 meses. Así mesmo, Decoraciones J. Bello ofrece melloras adicionais na súa proposta, sen custe algún, por un importe de 265.042,6 euros. A adxudicación definitiva na Xunta de Goberno axiliza tamén o prazo para o inicio das obras, que está previsto que comecen a principios de abril.
NO PAZO DA CULTURA ATÉ O 11 DE ABRIL
Venres 12 de marzo do 2010
O Concello de Carballo vén de inaugurar na sala da Baixocuberta do Pazo da Cultura (terceiro andar) a Exposición do XII Certame Fotográfico Xosé Manuel Eirís, conformada por un total de 93 obras das 196 fotografías que se teñen presentado ao concurso. Nesta selección atópanse as catro imaxes gañadoras: a que quedou en primeiro posto é 'Toda unha vida', premiada con 700 euros e realizada polo fotógrafo Marcos Rodríguez. O segundo premio, dotado con 450 euros, recaeu na fotografía 'Explosión de cor', presentada por Antonio Iglesias Núñez. O Premio Especial Carballo, que distingue as imaxes centradas no municipio e dotado con 450 euros, recaeu na fotografía 'A ponte', presentada por José López Pérez. Por último, o xurado decidiu conceder un Accésit de 250 euros á fotografía 'La ventana', de Ángel Pérez de León. Esta edición ten rexistrado un total de 76 autores participantes.
O CONCELLO CONMEMOROU O DÍA INTERNACIONAL DA MULLER
Xoves 11 de marzo do 2010
Un total de 45 persoas, a maioría mulleres, con 38 participantes, están inscritas no Banco do Tempo de Carballo. Esta iniciativa, que dou os primeiros pasos en decembro de 2008 coa sinatura dun convenio entre o Concello e a Asociación Mulleralia, e que está funcionando dende hai poucos meses no Museo de Bergantiños, pretende impulsar e favorecer os intercambios de tempo entre as persoas, apoiando a cooperación informal entre particulares para o desenvolvemento de diversas actividades. Deste xeito, alguén pode ofrecer gratuitamente traslados en coche a cambio de clases de cociña, por exemplo. Ademais, os Bancos do Tempo tamén contribúen á conciliación da vida laboral e familiar, e, no caso de Carballo, o Banco tamén pretende potenciar o II Plan de Igualdade de Oportunidades do Concello. Os interesados e interesadas en obter máis información poden chamar ao teléfono 622 566 228. O horario de atención das oficinas é de luns a venres de 9.30 a 13.30 horas.
XUNTANZA DA COMISIÓN DELEGADA EN CARBALLO
Xoves 11 de marzo do 2010
O Pazo da Cultura de Carballo vén de acoller o mércores 10 de marzo a celebración dunha xuntanza da Comisión Delegada de Deportes do Eixo Atlántico. A cita, que se desenvolveu durante toda a mañá e á que asistiron representantes da ampla maioría dos 34 concellos que forman parte do Eixo (17 de Galicia e 17 de Portugal), serviu para determinar a importancia da xestión deportiva dentro da estrutura do Eixo, amosándose como un dos seus piares fundamentais. Entre os asuntos da orde do día, tratouse sobre o balance dos Xogos do Eixo celebrados o ano pasado na cidade da Coruña, que se saldaron cunha medalla de ouro para Carballo na modalidade de natación. Precisamente un dos obxectivos do Eixo é fortalecer esta cita, que no futuro podería converterse nun novo espazo para o intercambio xuvenil.
VENRES 12 DE MARZO ÁS 21.00 HORAS
Mércores 10 de marzo do 2010
Despois da música de autor, o teatro volve ao programa dos Venres Culturais 2010. A compañía catalá Titzina Teatro presenta o espectáculo 'Exitus', unha obra na que un home na procura de emprego, un funerario, un directivo dun laboratorio farmacéutico e un avogado entremesturan as súas vidas sen que eles mesmos sexan conscientes do destino común que os une. Catro persoas que se enfrontan á morte desde puntos de vista tan diversos coma o dunha profesión, unha traxedia ou un acto irreversible da vida. A función é o venres 12 de marzo a partires das 21.00 horas. O prezo da entrada é de 3,5 euros, 2,5 euros con desconto. A taquilla está aberta o mesmo día da función de 19.00 a 21.00 horas. A duración prevista do espectáculo é de 85 minutos. Esta actuación conta coa colaboración da Agadic (Axencia Galega das Industrias Culturais).
CONMEMORACIÓN DO DÍA INTERNACIONAL DA MULLER O MÉRCORES 10
Martes 9 de marzo do 2010
Arredor de 30 mulleres asisten dende o pasado 22 de febreiro a un Curso de Ximnasia Pre parto organizado polo Centro de Información á Muller (CIM) de Carballo. A Concellaría de Igualdade e Benestar que dirixe Dores Silveira quere subliñar a elevada demanda que ten experimentado esta actividade, que está dividida en dous grupos de aproximadamente 14 alumnas. O número varía porque se rexistran novas incorporacións e baixas segundo se van producindo os partos. Unha matrona titulada imparte o cursiño os luns de 16.00 a 17.00 e de 17.00 a 18.00 horas. Ademais de practicar ximnasia relacionada co parto, tamén se inclúen coñecementos de educación maternal post parto mentres está de baixa a matrona do Centro de Saúde de Carballo. Así, o cursiño, que seguirá até o mes de xuño, consta dunha parte teórica e outra práctica.
A ACTIVIDADE CHEGA Á CAPITAL MUNICIPAL E A SETE PARROQUIAS
Luns 8 de marzo do 2010
O Concello de Carballo, a través da Concellería de Deporte, que dirixe Marcos Trigo, e da Concellaría de Terceira Idade, que dirixe Carmen Regueira, organiza, en colaboración coa Deputación da Coruña, un Programa de Exercicio Físico para Adultos Maiores de 60 anos. Na quenda do curso 2009-2010 teñen sido admitidos un total de 331 participantes, que desenvolven a actividade tanto no casco urbano como nun total de sete parroquias, incrementándose o número de grupos e participantes respecto do período anterior. Os participantes divídense en 13 grupos, seis no casco urbano e nas parroquias de Berdillo, Cances, Entrecruces, Imende, Noicela, Razo e Rus. Entre as parroquias, un dos lugares que ten apuntados máis maiores é Berdillo, con 33. Os maiores desenvolven neste programa sesións de exercicio físico de intensidade baixa ou moderada para contribuír a mellorar a súa saúde.
ATÉ O 4 DE ABRIL NO ANDAR -1 DO PAZO DA CULTURA
Venres 5 de marzo do 2010
A artista carballesa María José Costa Valiña, 'Chiña', amosa a súa primeira exposición, composta por 24 obras, a través dunha viaxe a "unha paisaxe interior" que leva por título 'Incursión ao sutil'. Aínda que Chiña xa ten colaborado nalgunha mostra colectiva realizada en Carballo con outros artistas locais e volverá a facelo este ano, esta é a súa primeira experiencia en solitario, na que agradece "a oportunidade de ver a miña obra ao completo". Nela recóllense traballos realizados dende 2002 a 2009, reflectindo, segundo explica a propia Chiña, dúas etapas diferentes: unha primeira, centrada "nunha realidade máis visible"; e unha máis recente, máis intimista. A mostra pode visitarse no andar -1 do Pazo da Cultura até o 4 de abril, en horario de 18.00 a 21.00 horas.
A FIN DE SEMANA DO 13 E 14 DE MARZO
Venres 5 de marzo do 2010
O Concello de Carballo e o Centro Comercial Aberto (CCA) da vila organizan por segundo ano consecutivo una Feira das Oportunidades na que participan un total de 30 establecementos do municipio que poñen á venda productos excedentes da temporada, moi por debaixo do prezo de mercado pero cunha excelente calidade e co prestixio engadido do comercio carballés. Esta iniciativa é a primeira e máis importante das actividades incluídas no programa do Feirón de Primavera, que, aínda que este ano cae a 30 de maio, estende no tempo as súas propostas para dinamizar o comercio e as feiras de Carballo. A Feira situarase a fin de semana do 13 e 14 de marzo nunha carpa de 1.200 metros cadrados situada no aparcamento do San Martiño e contará con 33 stands: 30 de tendas do CCA, e outros tres destinados á información e como área de descanso. O horario de apertura é de 10.00 a 21.00 horas de forma ininterrompida.
