ATÉ O 31 DE XULLO NO PAZO DA CULTURA
Luns 21 de xuño do 2010
Un total de 13 artistas carballeses e da comarca de Bergantiños participan na exposición Formas-Carballo, unha homenaxe a Luis Seoane, "un dos artistas plásticos galegos máis influíntes e importantes de todos os tempos', en verbas de Mon Lendoiro, un dos integrantes da mostra xunto con Milagros Cotelo Rama, Lola Oviedo, Emilia Rodríguez de las Heras, Mª José Costa 'Chiña', Miguel Anxo Calvo 'O'Mighelo', Fernando Mourón Bouzas, Marilá Gómez Caamaño, Santi Picos, Antonio Taracido, Jacobo Veiga García, Vicky Vilariño e Cristina Castro Santiago. Trátase da terceira ocasión en que as Festas de San Xoán acollen unha mostra creativa de creadores de Carballo e Bergantiños co obxectivo de "fomentar a creación artística" e de que os artistas podan presentar os seus traballos, segundo explica a Concelleira de Cultura, Belén Lendoiro. Os interesados e interesadas en visitar a exposición poden facelo até o 31 de xullo no terceiro andar (sala da baixocuberta) do Pazo da Cultura en horario de 17.30 a 20.30 horas.
O VENRES 18 E O SÁBADO 19 DE XUÑO
Mércores 16 de xuño do 2010
Máis de 200 deportistas participan no IV Torneo Escola Lubiáns de Hóckey a patíns Concello de Carballo que se celebra o venres 18 e o sábado 19 de xuño no Pavillón Carballo Calero (Zona Bergantiños) da capital municipal. A cita conta con catro categorías: Escola de patinaxe, Prebenxamín, Benxamín e Sénior, disputándose dúas liguillas diferentes, A e B, no caso de Prebenxamín. O presidente de Escola Lubiáns, Fernando Fidalgo, explica que se trata dun torneo esencialmente de "nivel autonómico", que conta coa presenza de todos os grandes clubs galegos, tan só coa ausencia dos equipos de Vigo. A organización tamén subliña a incidencia na crise nesta cita, que, a pesares diso, espera non baixar o nivel e manter a arela de poder "facer algo máis grande o ano que vén". Cada rapaz ou rapaza participante na cita recibe unha bolsa con agasallos, ademais dunha medalla e un trofeo para os vencedores.
DOMINGO 20 DE XUÑO A PARTIRES DAS 11.00 HORAS
Mércores 16 de xuño do 2010
O domingo 20 de xuño o Circuíto de Motor de Bértoa acolle a terceira proba do Campionato Galego de Quadcross, que constitúe tamén a terceira proba nesta modalidade que se celebra no circuíto carballés dende a súa reapertura, e xa se están ultimando os detalles para que se celebre unha cuarta proba, neste caso de enduro. Até o momento a escudaría organizadora, Ecoquad Galicia, explica que se teñen inscrito preto de 30 pilotos, unha media por debaixo da cifra que se acadou na recente proba do Campionato de España, con 90 inscricións, pero en todo caso dentro das previsións, especialmente, como apuntan dende a organización, pola crise. A cita, que conta coa colaboración do Concello, principia ás 9.30 horas coas primeiras verificacións técnicas, aínda que os adestramentos libres non serán até as 11.00 horas. Xa pola tarde, a partires das 16.00 horas, comezarán a disputarse as mangas, coa entrega de premios prevista para as 20.00 horas. Os interesados e interesadas poden obter máis información na páxina web de Ecoquad Galicia.
DURANTE O SEGUNDO SEMESTRE NA PARROQUIA DA BREA
Luns 14 de xuño do 2010
De aquí a final de ano o Pazo da Cultura e a parroquia da Brea serán o escenario onde se impartirá un Curso de Panadería-Bolería que servirá para formar a 18 alumnas desempregadas da Comarca de Bergantiños e Arteixo pertencentes aos sectores con maior taxa de desemprego. Este curso enmárcase no proxecto Rede Xiana (Xestión Integral, Accesibilidade, Novas Tecnoloxías e Adaptabilidade no mercado laboral galego) promovido pola Deputación da Coruña e enmarcado nas Axudas do Fondo Social Europeo durante o período de intervención 2007-2013 a través do Ministerio de Administracións Públicas. Tanto o Alcalde de Carballo, Evencio Ferrero, como a Concelleira de Formación, María Manso, presentes da apertura do curso xunto cunha técnica da Deputación, subliñaron a tradición panadeira de Carballo, "que hai que desexar que se mellore e perpetúe" mantendo "a sona de bo pan", en verbas do Alcalde.
O ARTIGO PUBLÍCASE A PARTIR DO SÁBADO 12 DE XUÑO
Venres 11 de xuño do 2010
O xurado do VI Premio a Artigos Xornalísticos Normalizadores decidiu concederlle o premio, dotado con 1.200 euros e a publicación en once medios de comunicación galegos ao artigo titulado "A procura do tesouro", de Marica Campo. A galardoada, que vén de recibir hoxe a distinción de mans do Alcalde de Carballo, Evencio Ferrero, e baixo a mirada da Concelleira de Cultura, Belén Lendoiro, subliñou a "satisfacción" de ter gañado este premio, "moi consolidado e prestixiado por quen o gañaron antes". Campo, mestra e autora de narrativa, poesía e teatro, ademais de escribir habitualmente en El Progreso de Lugo e A nosa terra, explica que no seu texto quixo "conxugar as razóns do corazón e as razóns prácticas" para constatar que "o tesouro é a lingua galega, na que se apoian plantas invasoras que non deixan que xermole convenientemente", denunciando as "aldraxes para a nosa lingua". O artigo será publicado a partires do sábado 12 de xuño nos once medios locais e de toda Galicia que colaboran na iniciativa.
XUNTA LOCAL DE SEGURIDADE
Venres 11 de xuño do 2010
A Garda Civil de Carballo vén de informar na reunión da Xunta Local de Seguridade do Concello de Carballo dun descenso dos delictos e faltas e das infraccións penais no municipio ao longo do ano 2009. Así mesmo, e no apartado de Tráfico, experimentouse unha baixada no número de feridos graves e leves, así como no número de accidentes rexistrados respecto do ano anterior. Outra das conclusións derivadas da xuntanza, é que en Carballo non existen puntos negros nas estradas locais, mentres que a grande maioría dos problemas rexístranse na estrada comarcal AC-552. Este punto é, así mesmo, o lugar onde a Garda Civil de Tráfico realiza máis controis e desenvolve máis tarefas de vixilancia. Noutro dos asuntos tratados durante a reunión, que se desenvolveu na Sala de Xuntas do Concello a partir das 12.30 horas, informouse de que ao longo de 2009 téñense tramitado un total de 51 expedientes en locais de hostalería por exceder o horario de peche estipulado.
SÁBADO 12 ÁS 21.30 HORAS
Xoves 10 de xuño do 2010
A Praza do Concello convértese un ano máis, e por terceiro ano, nunha grande sala onde o rock and roll volverá a estar presente no seu estado máis puro co festival Rockin'. Trala edición de 2009 na que participaron bandas como Chesterfield Kings ou Roy Loney & Señor No, nesta nova cita continúase nesta mesma liña na que as formacións internacionais máis clásicas danse a man con algunhas das bandas galegas máis interesantes do momento. Neste Rockin' pasearanse polo escenario os carballeses Killer Cats, os galegos Dr. Gringo e os norteamericanos Sour Jazz, acompañados de Daniel Rey -productor de Los Ramones ou Iggy Pop-, e Barrence Whitfield, acompañado de Petti & The Bloodyhotsak. Como peche, a presenza de dous grandes pinchadiscos Elbarracudo & Bigaszekene, responsables das mellores veladas que se recordan nas máis emblemáticas cabinas dos locais de Ponferrada. Un cartel para vibrar de balde dunha auténtica noite de rock and roll: o sábado 12 de xuño na Praza do Concello a partires das 21.30 horas.
ENTRADAS Á VENDA NO MUSEO DE BERGANTIÑOS
Mércores 9 de xuño do 2010
Bengala Produccións SL presenta 'Master Class', unha obra teatral na que a recoñecida actriz galega Mabel Rivera encarna a unha das divas da ópera máis célebres, a "divina" María Callas. Esta obra de teatro é unha adaptación ao galego do musical de Terrence McNally, que toma como pretexto as famosas clases maxistrais (ou 'master classes') que impartiu María Callas na academia neoiorquina Juilliard. Nestas ensinanzas María Callas fixo un acercamento a algúns dos seus mellores éxitos, como 'Lady Macbeth' ou 'Tosca', a través das interpretacións dos seus alumnos durante unha audición, e nesta proposta tamén se realiza unha incursión na Callas máis íntima, máis lonxe da súa imaxe pública. Este espectáculo, incluído no programa das Festas de San Xoán 2010, represéntase o sábado 12 de xuño no Pazo da Cultura a partir das 21.00 horas. As entradas custan 6 euros e poden mercarse e reservarse no Museo de Bergantiños ata o día da función. Máis información no 981 702 077.
DO 1 DE XULLO AO 31 DE AGOSTO
Martes 8 de xuño do 2010
Xa está aberto o prazo para anotarse nas Escolas Deportivas de Verán de Básket Xiria e Escola Lubiáns, dúas entidades que se unen por primeira vez este ano para completar a oferta das actividades que os máis cativos e cativas que se anoten poderán desenvolver entre o 1 de xullo e o 31 de agosto. Así, os rapaces e rapazas poderán practicar indistintamente hóckey ou baloncesto, ademais de contar cunha aula de estudo e unha ampla oferta de actividades relacionadas coa natureza, como sendeirismo ou deporte na praia. De feito, tanto dende Básket Xiria como dende Escola Lubiáns subliñan o feito de que a súa colaboración ten fructificado nun incremento na calidade das actividades e número de saídas fóra do Pavillón do IES Isidro Parga Pondal, onde se desenvolven as escolas. O horario é de luns a venres de 10.00 a 14.00 horas, coa posibilidade de deixar aos asistentes a partires das 9.30 horas para tentar axudar a conciliar a vida laboral e familiar. Máis información nos teléfonos 981 758 554, 630 691 416 e 626 913 051.
ENTRE O 14 E O 16 DE XULLO
Luns 7 de xuño do 2010
A Universidade da Coruña, en colaboración co Concello de Carballo, a Coordinadora de Traballadores/as de Normalización da Lingua (CTNL) e a Deputación da Coruña, organiza a sexta edición do curso de verán sobre dinamización lingüística, que terá lugar no Pazo da Cultura de Carballo os días 14, 15 e 16 de xullo e que se centrará na análise e debate da promoción social da lingua nos espazos de lecer e nas accións culturais. O curso, no que poden participar un máximo de 60 persoas, está dirixido ás persoas que traballan no ámbito da normalización lingüística, tanto en entidades públicas como no ensino ou en entidades privadas. A preinscrición no curso pode facerse até o día 23 de xuño a través do sitio web do Servizo de Normalización Lingüística da Universidade da Coruña (www.udc.es/snl). A edición deste ano centrarase na creatividade para a lingua e analizará a relación entre a política cultural, o lecer e a política lingüística.
CONVENIO COA DEPUTACIÓN PARA O SOSTEMENTO DO GRUMIR
Luns 7 de xuño do 2010
A Xunta de Goberno Local vén de acordar, en sesión ordinaria, a adxudicación provisional do contrato de obra de 'Reposición de camiños nas parroquias do Concello de Carballo'. Esta actuación está incluída na segunda fase do Plan Provincial de Axuda contra a Crise, PAC-2 2009 da Deputación provincial. A empresa adxudicataria é Eulogio Viñal Obras y Construcciones SA. O prezo de adxudicación é de 188.895,53 euros, IVE incluído, e o prazo de execución da obra é de doce semanas, a contar dende ao día seguinte á sinatura da acta de replantexamento. Así mesmo, a Xunta de Goberno serviu para aprobar un convenio de colaboración coa Deputación provincial para o sostemento do Grupo Municipal de Intervención Rápida (Grumir). O organismo provincial contribuirá ao financiamento da actividade cunha achega máxima de 45.000 euros, que irán destinados a financiar os gastos de persoal, así como parte dos materiais. O acordo terá vixencia dende a súa sinatura até o 31 de marzo de 2011 e ten efectos retroactivos dende o 1 de xaneiro de 2010. O convenio poderá ser prorrogado por acordo expreso de ambas partes.
LUCIANO CALVO LE O PREGÓN DAS FESTAS O MARTES 22
Sábado 5 de xuño do 2010
As Festas de San Xoán 2010 nacen coa arela de unir tradición e modernidade e con ese obxectivo presentouse un programa no que os principais protagonistas da semana grande serán a coñecida cantante de boleros Tamara, as Cantareiras de Ardebullo cun espectáculo humorístico e musical e a xa tradicional Festa do Bosque. Antes, e para abrir a festa, volve este ano unha nova edición do Rockin, con artistas locais e norteamericanos o 12 de xuño. Non faltan as actividades culturais, coa presentación de 'Master Class' de Mabel Rivera, ou as deportivas, entre as que destaca a celebración do VI Torneo Internacional de Fútbol 7 Concello de Carballo. E por suposto tamén están as verbenas, continuadas dende o mércores 23 e até o domingo 27 de xuño. Trátase dun programa feito "axustando o orzamento e buscando novas fontes de financiamento para que non se resinta", segundo a Concelleira Belén Lendoiro. Un programa que abre o pregoeiro deste ano, Luciano Calvo Pumpido, recoñecido en verbas do Alcalde, Evencio Ferrero, porque "moita da actividade recreativa, social e deportiva de Carballo non sería posible sen o contributo de Conservas Calvo".
