OS INGRESOS POR VENDAS ACADARON OS 17.000 EUROS
Luns 30 de agosto do 2010
O Concello de Carballo, a través da Concellaría de Cultura e Normalización Lingüística que dirixe Belén Lendoiro, fai unha valoración positiva da Praza dos Libros, que tivo lugar desde o xoves 26 ao domingo 29 de agosto no Xardín Municipal da capital bergantiñá, e na que se mantiveron tanto os niveis de venda como os niveis de participación da edición de 2009 que, pola súa vez, incrementara o volume de vendas con respecto á edición de 2008. Ao longo dos catro días de feira pasaron pola Praza dos Libros arredor de 10.000 persoas e unhas 1.500 persoas participaron nas case 20 actividades programadas, entre presentacións de libros, actos de sinatura por parte dos/as autores/as, actividades de animación, concertos, monicreques, maxia,etc. Actividades que mesturaron a expresión oral, cos libros, os escritores e a música durante catro dias.
DO 26 AO 29 DE AGOSTO NO XARDÍN MUNICIPAL
Mércores 25 de agosto do 2010
Libros, actividades lúdicas, regueifas, presentacións, actuacións, música, autoras e autores da comarca e do país, pan e moitas outras propostas encherán de vida, imaxinación e creatividade o Xardín Municipal de Carballo durante catro días. Unha nova edición da Praza dos Libros que cada ano pretende promocionar a lectura e achegarlle á cidadanía o libro e os produtos culturais galegos. Ademais, esta Praza dos Libros convivirá o xoves e o domingo coa feira tradicional de Carballo, polo que haberá moito máis que libros. A cita ten lugar desde o xoves 26 ao domingo 29 de agosto no Xardín Municipal coa participación de nove stands: un do Concello de Carballo, un espazo infantil e sete librarías: Brañas e Trasgo (de Carballo), Como unha novela (da Laracha), Roget (de Vimianzo), Couceiro e Orizales (da Coruña) e Pedreira (de Santiago). Estarán abertas, o xoves e o domingo de 10.30 a 14.30 e de 17.30 a 21.30 e o venres e sábado de 11.00 a 14.00 e de 17.30 a 22.00 horas. Durante os catro días, todos os libros terán un desconto do 10 por cento sobre o seu prezo habitual. Ademais, todas as persoas que merquen na feira participarán en sorteos diarios de lotes de libros.
FINS DE SEMANA DO 7 AO 29 DE AGOSTO
Venres 30 de xullo do 2010
Un total de seis locais hostaleiros do centro carballés participan na II Ruta do Pincho de Verán, unha iniciativa posta en marcha a través da Concellaría de Promoción Económica que dirixe Xosé Manuel García Guillín co obxecto de promocionar os establecementos do núcleo urbano, así como os produtos típicos da zona. Xa é a cuarta convocatoria da Ruta do Pincho e a segunda que se celebra en verán en torno ao feirón do quinto domingo de agosto. Segundo explica García Guillín, participan seis establecementos que respectan a filosofía da iniciativa, que é ofrecer de xeito gratuíto "un pincho de calidade, diferente e único". A ruta terá lugar os sábados e domingos, entre os días 7 e 29 de agosto, en horario de 13.00 a 15.00 horas e de 20.00 a 22.00 horas. Os locais incluídos na Ruta son os seguintes: Habanos 79, O Xabarín, Restaurante Bergantiños, Ánfora Vinoteca, Cafetería El Juzgado e Kasa Klandestino, este último únese por primeira vez á iniciativa. Cada un deles anunciará cada día da ruta o pincho que se corresponde con esa xornada.
VENRES 30 DE XULLO ÁS 22.30 HORAS
Xoves 29 de xullo do 2010
O palco da Praza do Concello acolle o venres 30 de xullo ás 22.30 horas a presentación do quinto traballo de Berrogüetto, 'Kosmogonías', nunha das citas máis importantes incluídas no Verán Cultural 2010. Berrogüetto é un dos grupos galegos de música folk máis prestixiosos e con maior repercusión a nivel internacional. Con este disco, de novo, o grupo introduce matices de innovación e experimentación na música tradicional galega, utilizando como argumento a reflexión sobre a relación da humanidade co universo. Unha chamada optimista cara a consecución dun sistema máis xusto. Por primeira vez, nos seus quince anos de traxectoria, editan un álbum con voz masculina, a de Xabier Díaz, novo integrante da formación desde o ano 2008, que describe 'Kosmogonías' "unha pequena reflexión de mirar ao ceo para darnos conta do minúsculos que somos". Ademais, atopamos colaboracións nas letras de Manuel Rivas e Rosa Aneiros. Este espectáculo, gratuíto, conta coa colaboración da Deputación da Coruña.
A EXPEDICIÓN ITALIANA VISITARÁ CARBALLO EN SETEMBRO
Mércores 28 de xullo do 2010
Os participantes no proxecto europeo 'Participando: os concellos e a mocidade', financiado polo programa europeo 'Xuventude en Acción', que ten como obxectivo fomentar a participación activa dos mozos e mozas na vida da súa comunidade local, e que reúne a 24 mozos e mozas de entre 18 e 30 anos do Concello de Carballo e dos concellos italianos de Turín e Tortona, asistiron ao primeiro encontro que se celebrou nestas cidades italianas do 13 ao 17 de xullo. Os integrantes do proxecto tomaron parte nun seminario e nunha serie de visitas aos principais centros de participación da xuventude nestes dous concellos do norte de Italia. O programa comezou en Turín, cunha visita ao InformaGiovani da cidade (na foto), que é o máis antigo de Europa despois do de París con máis de trinta e tres anos de actividade. Pola súa banda, a expedición carballesa, acollerá no mes de setembro aos participantes italianos para o desenvolvemento da segunda parte do proxecto.
ESTARÁ SITUADA NUNHA PARCELA DE 2.500 METROS NA ESTRADA DE RAZO
Mércores 28 de xullo do 2010
O Presidente da Deputación da Coruña, Salvador Fernández Moreda, e o Alcalde de Carballo, Evencio Ferrero, veñen de subscribir na sede da institución provincial un acordo para a construción dunha escola infantil no municipio de Carballo. De acordo co convenio, a institución provincial destinará 550.000 euros para a edificación do novo centro infantil para nenos e nenas menores de tres anos, que se situará nunha parcela de 2.591 metros cadrados situada no entorno da urbanización de Riotorto na estrada de Razo. A aprobación da achega provincial para poder emprender a actuación realizouse na sesión plenaria ordinaria do mes de maio, e está previsto que as obras comecen antes de que remate 2010. Segundo se recolle no proxecto, o novo edificio distribuirase en dúas zonas principais: unha zona infantil composta por aulas e un espazo central de xogo e multiusos, na que se busca o contacto co terreo exterior para os xogos; e unha zona de adultos, que inclúe o espazo para o profesorado, un cuarto de servizo e outras instalacións.
O XOVES 29 REMATA O PRAZO DE INSCRICIÓN
Martes 27 de xullo do 2010
O Circuíto de Motor de Bértoa acolle a próxima fin de semana unha nova proba, tan só unhas semanas despois da celebración por todo o alto da cuarta proba puntuable para o Campionato de España da modalidade de autocross nesta tempada. Neste caso trátase do II Autocross Bergantiños, organizado pola Escudaría Bergantiños Motor en colaboración do Concello e coa axuda de Escudaría La Coruña, EcoQuad Galicia, Remontes 4x4 e Protección Civil. O sábado 31 de xullo a partir das 10.00 horas comezan as verificacións técnicas, aínda que, segundo a organización, as carreiras principiarán cara ao mediodía, nunha proba dunha soa xornada. Está previsto que participen pilotos especialmente de Galicia, pero tamén da zona e incluso con solicitudes de participación dende Zamora. Bergantiños Motor espera de que aquí a que remate o prazo de inscrición, o xoves 29, poida chegarse aproximadamente aos 60 inscritos. A proba acolle as categorías 4x4, unha das máis espectaculares, II, IIA e Carcross.
SESIÓN PLENARIA ORDINARIA DE XULLO
Martes 27 de xullo do 2010
A corporación vén de sacar adiante na sesión plenaria ordinaria do mes de xullo a aprobación inicial da Ordenanza xeral municipal sobre tráfico, circulación de vehículos a motor e seguridade vial que na sesión de xuño quedou sobre da mesa para que os grupos da oposición puidesen examinala en profundidade e realizar propostas. O obxectivo desta normativa é o de "regular e compatibilizar os distintos usos da vía pública no casco urbano carballés para darlle máis fluidez á circulación e mellorar a seguridade", en verbas do Concelleiro de Tráfico, Benedito Viña. O pleno deu luz verde a un conxunto de emendas presentadas polo Goberno en nome de todos os grupos da corporación, despois dunha reunión en pasados días da xunta de voceiros municipais. A ordenanza consta de 80 artigos e un anexo onde se recolle o cadro de sancións, que coincide punto por punto co cadro da Lei de Seguridade Vial e inclúe directrices de comportamento para os peóns, as bicicletas e ciclomotores, ademais doutros vehículos a motor, así como os límites de velocidade vixentes no casco urbano.
O CONCELLO ACADOU EN 2009 42 DOAZÓNS POR CADA 1.000 HABITANTES
Martes 27 de xullo do 2010
O Concello de Carballo, Protección Civil e o Centro de Transfusión de Galicia (CTG), impulsan unha campaña que ten como obxectivo promover a participación dos veciños e veciñas nas campañas de doazón de sangue e, deste xeito, garantir o axeitado desenvolvemento do labor asistencial nos centros sanitarios galegos. Nos últimos días e tamén ao longo da próxima fin de semana, os usuarios e usuarias das praias do municipio recibirán información cumprida da próxima campaña de doazón do CTG, especialmente a través dos altofalantes dos areais. Carballo rexistrou en 2009 un total de 1.185 doazóns, con 42 por cada 1.000 habitantes e ano, o que supera as recomendacións da Organización Mundial da Saúde (OMS). Aínda así, "facemos este chamamento para que os veciños e veciñas respondan e sigan manténdose ou aumentándose os resultados", explica o Alcalde, Evencio Ferrero. As persoas que desexen participar poden acudir á unidade móbil do CTG que estará situada na rúa Cervantes (fronte ao Súper Froiz) o luns 2 e o martes 3 de agosto en horario de 10.00 a 14.00 e de 16.00 a 21.00 horas.
OBRADOIROS DE 11.30 A 14.00 E DE 18.00 A 21.00 HORAS
Luns 26 de xullo do 2010
Caixanova e o Concello de Carballo colaboran para achegar á Praza do Concello da capital municipal a cúpula Caixanova na Rúa, na que se realizarán obradoiros de ciencia e tecnoloxía dirixidos aos máis cativos e cativas baixo o nome de 'Ciencia Máxica!'. A citá é o mércores 11 e o xoves 12 de agosto e está incluída no programa do Verán Cultural 2010. Pretende "unir ciencia e tecnoloxía e transmitir unha realidade cercana a pesar de parecer ciencia ficción", segundo explica Borja Crespo, responsable da oficina de Caixanova en Carballo. Pola súa banda, o Alcalde, Evencio Ferrero, que asinou hoxe o convenio de colaboración que fará posible esta actividade, subliña que "o obxectivo é achegar a ciencia a todos os cidadáns" a través de nove actividades que presentan un conxunto de tecnoloxías que en poucos anos estarán presentes na vida diaria, pero que a día de hoxe semellan sorprendentes. A entrada na cúpula é de balde e o horario é de 11.30 a 14.00 e de 18.00 a 21.00 horas.
O ÍNDICE DE SATISFACCIÓN DOS USUARIOS/AS É DE 7,49 SOBRE 10
Venres 23 de xullo do 2010
A enquisa realizada por un total de 398 usuarios e usuarias do Padroado Deportivo Municipal sobre o seu grao de satisfacción no uso das instalacións dos Centros Deportivos realizada en xuño de 2010 reflicte unha valoración de 7,49 sobre 10 sobre a xestión, limpeza e uso das instalacións, así como sobre as actividades, a atención dos monitores e o persoal ou os horarios dos cursos desenvolvidos. Así mesmo, a evolución dos ingresos do Padroado Deportivo no primeiro semestre de 2010 (até o 1 de xullo) indica que o crecemento do saldo respecto do mesmo período de 2009 é dun 67,87%, cuns ingresos de 235.192,20 euros fronte aos 140.105,35 do ano anterior, con 95.086,85 euros máis. Ademais, o 2010 comezou con 1003 abonos e 1916 abonados para chegarse a finais de xuño á cifra de 1486 abonos e de 2818 abonados. Deste xeito supéranse amplamente as previsións para 2010, xa que, segundo o Alcalde, Evencio Ferrero, esperábase contabilizar arredor de 1.250 abonos a final de ano, mentres que agora as expectativas indican que podería chegarse aos 1.500 abonos.
APROBACIÓN INICIAL DA NOVA ORDENANZA DE TRÁFICO
Venres 23 de xullo do 2010
A sesión plenaria ordinaria do mes de xullo aborda, entre os asuntos, a aprobación da terceira fase do traslado provisional dos postos do mercado municipal de abastos. Esta medida afecta a once postos que están nestes momentos na planta alta do edificio e que volverían a ocupar os postos exteriores. Este cambio está previsto que teña lugar arredor do mes de setembro. Trátase do terceiro traslado que sofren os postos, despois do inicial que fixo que os concesionarios dos postos exteriores se mudasen á segunda planta para permitir o desenvolvemento das obras; e dun segundo que facilitou o traslado dos postos da primeira planta á planta baixa, onde permanecen nestes momentos. Outro dos principais asuntos da orde do día refírese á aprobación inicial da Ordenanza xeral municipal sobre tráfico, circulación de vehículos a motor e seguridade vial que na sesión de xuño quedou sobre da mesa para que os grupos da oposición puidesen examinala en profundidade e realizar propostas e suxerencias, algunhas das cales serán incorporadas á normativa.
