VENRES 11 E SÁBADO 12 DE MARZO ÁS 21.00 HORAS
Xoves 10 de marzo do 2011
Música e teatro conforman a proposta do programa Venres Culturais para a segunda fin de semana de marzo. Aínda coa resaca do Antroido, o Pazo da Cultura volve á actividade con música e teatro, con dous espectáculos ben distintos. O venres 11 de marzo tócalle ás notas musicais co concerto Rock Carballo, que volve con toda a forza dos grupos noveis xunto con outros xa consolidados no panorama musical carballés. Estilos con diferentes influencias, que van dende o rock clásico ata o metal, pasando por un pop máis electrónico, o blues ou o grunge. Un repertorio con temas de composición propia xunto a algunha versión dos grandes clásicos. Bandas que dan os seus primeiros pasos nos escenarios e outras que empezan a deixarse ver no mundiño discográfico. Así é Rock Carballo, unha proposta da Concellaría de Cultura, que decidiu incluír de forma voluntaria, a todos os grupos de música que están a ensaiar nos locais do Pazo da Cultura, nun concerto co obxectivo de promocionar a estes artistas do municipio, integrándoos na programación xeral desta Concellaría a través da sinatura do Convenio Musical co Concello de Carballo. Desta volta, os grupos que ofrecerán no Pazo o mellor da súa música e do seu directo, son os seguintes: Lowcos, Falso Joker, Tramitess, Snots, Versión Imposible e Killer Cats. A entrada para asistir ao concerto é de balde, ata completar o aforo. A cita, ás 21.00 horas.
SÁBADO 12 E DOMINGO 13 DE MARZO NO PAVILLÓN VILA DE NOIA
Mércores 9 de marzo do 2011
O Pavillón da Zona Escolar da capital municipal carballesa acolle o sábado 12 e o domingo 13 de marzo a Fase final provincial da categoría infantil masculina de baloncesto, que organiza o Club Artai coa colaboración do Padroado Deportivo Municipal e a Delegación Coruñesa de Baloncesto. Nesta cita participan os seguintes equipos: Gayolo Begacar de Betanzos; CB Arteixo Valoriza; Liceo La Paz A de A Coruña; e o CB Artai A de Carballo. O cadro para a disputa dos partidos é o seguinte: o sábado 12 as semifinais con dous partidos, o que enfronta ao Liceo La Paz e ao Gayolo Begacar e o que disputan o Artai e o Arteixo Valoriza ás 10.30 e ás 12.30 horas respectivamente; o domingo 13 celébranse os encontros polo 3º e 4º posto ás 10.30 horas e a final ás 12.30 horas. Esta fase final ten como premio para o campión o poder participar na Copa Galicia desta tempada. Os catro equipos participantes lograron quedar entre os catro primeiros na primeira volta da liga, o que lles deu a posibilidade de disputar esta fase provincial. Hai que subliñar que o CB Artai A de Carballo quedou primeiro nesta clasificación, sen encaixar ningunha derrota despois de 9 partidos. O Concelleiro de Deporte, Marcos Trigo, quixo subliñar a boa marcha do deporte de base e a satisfacción porque Carballo poida acoller unha proba destas características, sendo ademais, o Artai, o favorito despois dos bos resultados da primeira volta.
O ENTERRO DA SARDIÑA DESPIDE A DON CARNAL
Luns 7 de marzo do 2011
O bo tempo e as temperaturas agradables favoreceron que a Praza do Concello de Carballo se enchera o Domingo de Antroido con centos e centos de persoas que presenciaron o Concurso de Disfraces, Comparsas e Carrozas, no que se repartiron máis de 6.000 euros entre premios e subvencións. Como é habitual, a mirada de Don Carnal ofreceu unha panorámica da actualidade, coa presenza da Garda Civil e o seu límite a 110 quilómetros por hora, dos mineiros de Chile, do Papa Benedito XVI con botafumeiro incluído, ou coa visita do resucitado Michael Jackson. Durante o desfile, os veciños e veciñas viron barcos xigantes, esconxuros de vudú, tribus africanas, abellas, flores xigantes ou populares bonecos infantís. Finalmente, o xurado entregou os premios, que foron os seguintes. Na categoría de comparsas infantil: 1º Waka Waka Garda Civil de Tráfico; 2º Grupo Abba; 3º A selección do Alto de Arteixo. En grupos infantil: 1º Indios; 2º As doncelas francesas. En individual infantil: 1º Transformer; 2º El Cuco; 3º Astronauta; 4º O próximo Alcalde de Carballo; 5º Al Retrete. En comparsas adultos: 1º Os mineiros de Chile; 2º Paraiso Floral; Accésit: Montouse o Circo na Lúa. En grupos adultos: 1º Os electrodomésticos; 2º Hello Kitty!. En individual adultos: 1º A Ra. E por último, en carrozas: 1º O Papa Benedito XVI chega a Carballo; 2º El león y su tribu; Accésit: El último adiós de Michael Jackson.
PRETO DE 11 MILLÓNS DE EUROS SÓ NA CREACIÓN DE NOVOS EDIFICIOS
Sábado 5 de marzo do 2011
O Goberno de Carballo vén de facer balance das obras realizadas nos último catro anos no ámbito da capital municipal porque "temos o dereito e o deber de dicirlles aos cidadáns o que fixemos" neste período, segundo subliña o Tenente de Alcalde, José Antonio Viña. Foi un mandato no que se xestionaron fondos propios, pero, tamén e sobre todo, procedentes "de todas as administracións posibles" co obxecto de "contentar a todos, aínda que na acción individual sexa imposible contentar a todo o mundo" e "actuando nos catro puntos cardinais e no corazón de Carballo", segundo subliña o Alcalde, Evencio Ferrero. O Concelleiro de Obras, Luís Lamas, destaca que "durante este tempo procurouse detectar as necesidades dos carballeses e carballesas e darlles resposta", a través, en verbas de Viña "dunha xestión moi intensa que nos permite poñer este catálogo de actuacións enriba da mesa". Entre este catálogo, hai que subliñar a ampliación do polígono empresarial de Bértoa -onte foi publicada no DOG a normativa do proxecto sectorial-, o investimento máis elevado da historia do Concello, con 25 millóns de euros; pero tamén o investimento destinado só á creación e planeamento de novos edificios e espazos no casco urbano, con preto de once millóns de euros para planificar a construcción e reforma de once edificios e espazos da vila, sen contar o preto dun millón de euros que se investiu na reforma integral da piscina Vila de Noia. Xestións "para vivir ben en Carballo" e para poñer en marcha unha concepción da vila "para sentirse orgullosos de ser de Carballo e desfrutar del", segundo Lamas.
ENTREGA DE PREMIOS O 23 DE MARZO
Sábado 5 de marzo do 2011
A primeira coprodución teatral do Festival Internacional Outono de Teatro (FIOT), "Un cranio furado", vén de acadar dez nomeamentos nos XV Premios María Casares, incluído o de Mellor Espectáculo, alzándose como a obra que chega como finalista a un maior número de categorías. A listaxe de galardóns aos que opta, é a seguinte: Mellor Espectáculo; Mellor Dirección: Quico Cadaval; Mellor Actor Protagonista: Evaristo Calvo; Mellor Actriz Secundaria: Dorotea Bárcena; Mellor Actor Secundario: Víctor Mosqueira; Mellor Actor Secundario: Santi Romay; Mellor Música Orixinal: Piti Sanz; Mellor Adaptación/Tradución: Avelino González; Mellor Iluminación: Baltasar Patiño; e Mellor Escenografía: Marcelino de Santiago "Kukas". Todos os intérpretes que participan no espectáculo optan a alzarse cun dos premios, ademais de que esta adaptación dun texto do irlandés Martin McDonagh ten programada unha apertada axenda de actuacións nunha extensa xira na que xa ten visitado cidades como Santiago, A Coruña, Vigo, Ourense ou Pontevedra con grande éxito de público. O FIOT ten agora a oportunidade de recoller unha das máximas distincións do teatro galego coa súa coprodución con PT Excéntricas. A entrega de premios é o mércores 23 de marzo no Teatro Rosalía de Castro da Coruña.
"O.V.+G.V.": ATÉ O 3 DE ABRIL NO ANDAR -1 DO PAZO DA CULTURA
Venres 4 de marzo do 2011
O artista carballés Manuel Pazos expón por primeira vez na súa vila cunha escolma de obras que mesturan a vida mariña e a urbana a través dos colores cambiantes dos polbos da lonxa de Malpica que vía de mozo, como el mesmo explicaba na inauguración da mostra, e a influenza urbanita da cidade de Madrid, onde vive na actualidade. Baixo o nome de "O.V.+G.V.", conta con dúas partes ben diferenciadas. A primeira, "O.V." en referencia ao Octopus Vulgaris, nome científico do polbo, sitúa ao espectador no límite da abstracción e a figuración, utilizando unha peculiar temática na que poden observarse caixas repletas de polbos entrelazados. A segunda, "G.V.", ve a luz por primeira vez en Carballo, e refírese á rúa Gran Vía de Madrid, unha das principais arterias da capital de España que, precisamente en 2010, cumpriu cen anos de vida. Edificios emblemáticos e algunha das vistas máis famosas da cidade quedan plasmadas nun estilo máis realista. A exposición forma parte dunha iniciativa para "fomentar a creatividade e dar a coñecer a artistas locais", segundo explica a Concelleira de Cultura, Belén Lendoiro, que lembrou as palabras do xornalista carballés Henrique Mariño para describir ao autor: "un creador poliédrico, versátil e disperso, dificilmente enmarcable nunha disciplina, nunha técnica, nunha temática".
A CATA TEN LUGAR O XOVES 10 DE MARZO ÁS 19.00 HORAS
Xoves 3 de marzo do 2011
Os veciños e veciñas de Carballo que queiran saber un pouco máis sobre enoloxía tan só teñen que anotarse e participar na cata virtual que ten lugar o próximo xoves 10 de marzo en vídeo conferencia e retransmitida de xeito simultáneo a varios Telecentros de Comunicación en toda Galicia, entre os que se atopa o de Carballo. A cita desenvolvése a partires das 19.00 horas na Aula Aberta do 1º andar do Pazo da Cultura e a solicitude de participación pode formalizarse alí mesmo ata que se cubran as prazas. Os participantes poderán participar na II Cata por Videoconferencia de España, despois da celebrada o ano pasado, tamén coa colaboración do Telecentro carballés, e na que participaron os telecentros de Chantada, Santiago de Compostela, Tui, O Barco de Valdeorras, Monforte de Lemos, Oroso, e Catoira. Ademais, os asistentes poderán degustar varios viños seguindo as indicacións dun experto que, dende Chantada, onde celebran a XXIX Festa do Viño, irá indicando os pasos que se deben seguir, nos que se inclúe un exame visual, ulir o viño ou unha degustación final. Os interesados e interesadas en inscribirse tamén poden facelo chamando ao Telecentro no 981 704 300.
OS VENRES CULTURAIS INCORPORAN A OBRA "0,7% MOLOTOV"
Xoves 3 de marzo do 2011
O Antroido arrinca o venres 4 de marzo en Carballo con animación e actividades para os máis cativos e cativas. Así, a Ludoteca Municipal acolle un obradoiro para os máis pequenos, que poderán elaborar diferentes elementos para disfrazarse a partir das 18.00 horas. Xa a partires das 19.30 horas, comezará a ambientación musical das rúas de Carballo coa actuación da Charanga Os Chinchorros que nos achegará a música ata pasada a medianoite. Porén, a cita máis importante do Antroido carballés é o tradicional Concurso e Desfile de disfraces, comparsas e carrozas, o domingo 6 ás 18.00 horas na Praza do Concello. Nestes momentos xa están inscritas 8 carrozas e 20 comparsas en total entre as categorías de infantil e adulto. Os que aínda queiran participar poden inscribirse ata mañá venres 4 de marzo para as modalidades de comparsas e carrozas, e ata o día 6 de marzo ás 17.00 horas na porta do Concello para as modalidades de grupos, parellas e individual tanto en categoría adulto como infantil. Ademais, esta nova edición do será presentado pola actriz e humorista Patricia Vázquez, moi popular nestes momentos pola súa participación na popular serie "Padre Casares", onde interpreta a Lidia.
DENTRO DO PROGRAMA EUROPEO: XUVENTUDE EN ACCIÓN
Xoves 3 de marzo do 2011
O Concello de Carballo, a través da Concellaría de Xuventude que dirixe Marcos Trigo, participa como socio no proxecto "B-movie: a star in the EU" dentro do Programa Europeo 'Xuventude en Acción', concretamente dentro da Acción 1.1, de proxectos de Intercambio de xóvenes, e nel participarán xóvenes de 4 países diferentes. O promotor é o Departamento de Políticas Xuvenís e o Centro Xuvenil OFF do Concello de Tortona (Piamonte, Italia), o cal xa colaborará como socio co Concello de Carballo no proxecto de democracia participativa 'Participando: os concellos e a mocidade', tamén do Programa Europeo 'Xuventude en Acción', que promoveu o Concello de Carballo durante o ano 2010. Ademais do Concello de Carballo, participan a entidade Human Integra Alapitvany (Hungría) e o Colegiul National Mircea Cel Baltran da cidade de Constanta (Rumanía). O obxectivo do proxecto é ensinar aos xóvenes a usar o vídeo como instrumento de comunicación social de calidade: para reflexionar sobre a participación e contar as experiencias dos xóvenes que tratan de acadar unha cidadanía activa, para difundir entre a mocidade do resto de Europa a importancia da participación, tendo en conta que non só é difícil participar, senón aínda máis dar visibilidade e impacto a esa participación.
PROPOSTA ORZAMENTARIA PARA 2011: UNHAS CONTAS DE 20,5 MILLÓNS
Martes 1 de marzo do 2011
O pleno da corporación vén de aprobar a estimación dunha alegación presentada polo PP carballés sobre a modificación dos prezos da Ordenanza fiscal nº 11 da taxa pola prestación de servizos no mercado municipal de abastos con motivo das obras de reforma realizadas na praza. O pasado mes de novembro, o propio pleno sacou adiante a aprobación inicial desta modificación, na que se acordaba a aplicación do IPC acumulado dende o anterior axuste dos prezos, un importe que se considerou suficiente para cubrir o mantemento do servizo despois da reforma, incluíndo tamén as tarefas de limpeza do edificio, entre outros labores. Porén, na súa alegación, o PP oponse á aprobación inicial desta modificación, e esixe que se realice un novo estudo económico financeiro para determinar as cantidades que deben abonar os concesionarios, en aras da legalidade. O Goberno accede a paralizar a tramitación e reiniciar o proceso máis adiante á vista dos resultados do estudo, que sería realizado por técnicos da Cámara de Comercio, para evitar que exista dúbida algunha sobre a legalidade da normativa. Polo tanto, finalmente acordouse a suspensión do procedemento de aprobación da modificación da ordenanza e encargar formalmente a elaboración do novo informe económico financeiro.
ABERTO O PRAZO ATÉ O 8 DE ABRIL
Luns 28 de febreiro do 2011
O Concello de Carballo, desde o seu Servizo de Normalización Lingüística (SNL) e en colaboración con varios medios de comunicación, convoca por sétimo ano consecutivo o Premio a artigos xornalísticos normalizadores, un certame xa consolidado que ten como obxectivos promover a reflexión sobre a situación social da lingua galega, crear espazos nos xornais para analizar e promocionar o uso e prestixio do idioma galego e promover o uso do galego na prensa. Ao certame pódense presentar artigos xornalísticos inéditos de opinión que traten algún tema concreto relacionado coa situación sociolingüística do noso país, coa defensa e promoción da lingua galega, co seu estatus, co argumentario en defensa do uso do galego, coa lexislación e os dereitos lingüísticos, con experiencias sociolingüísticas concretas, con propostas para o impulso do uso e prestixio social do galego, con experiencias útiles ou favorábeis para a dinamización da lingua, coa política lingüística en xeral ou nalgún ámbito ou situación determinada, etc. Os artigos deberán ter entre 2.000 e 3.500 caracteres con espazos incluídos (entre 350 e 600 palabras, aproximadamente). O prazo está aberto até o 8 de abril.
XUNTA DE GOBERNO LOCAL
Luns 28 de febreiro do 2011
A Xunta de Goberno Local vén de adxudicar o contrato administrativo especial de 'Concesión de bens de uso público municipal para a colocación de tres puntos dixitais de información pública en Carballo'. Trátase dun contrato para instalar pantallas de comunicación visual exterior e pantallas táctiles que estarán situadas na Praza do Concello, no Museo de Bergantiños e no Centro de Promoción Económica do polígono de Bértoa (CPEC). No primeiro caso, ofrecerase información xeral sobre o Concello; no segundo caso o punto informativo estará orientado a ofrecer información turística e de ocio, incluíndo a maqueta sobre a Costa da Morte (na imaxe) situada no Museo de Bergantiños; e no terceiro caso o punto informativo centrarase na información económica e no parque empresarial de Bértoa. A empresa responsable deste servizo será Linea Turística de Galicia SL (Litur) que abonará ao Concello un canon en forma de tempo de emisión nas pantallas de comunicación panorámicas do servizo, sendo a porcentaxe dun 75 por cento do espazo total en táctil cunha duración de 24 horas; e dun 30 por cento en plasma nas pantallas exteriores en horario de 7.00 a 23.00 horas. A duración do contrato outórgase por un prazo de catro anos sen posibilidade de prórroga.
_(535_x_143_px).jpg)
