AMPLIACIÓN DA REPOSICIÓN DE CAMIÑOS POR 80.000 EUROS
Luns 20 de xuño do 2011
A Xunta de Goberno Local reunida en sesión ordinaria vén de adxudicar os contratos de obra para a "Rede de saneamento e rede de abastecemento de auga en San Lois, parroquia de Ardaña" e para a "Rede de traída de auga e rede de saneamento en Bas, parroquia de Goiáns", por un importe total de 117.329,94 euros, correspondendo 51.382,27 euros ás melloras que se levarán a cabo en Ardaña; e 65.947,67 euros aos traballos en Goiáns. Así mesmo, no caso de Bas as obras serán levadas a cabo por Construcciones Alejandro Martínez e Hijos, cun prazo de execución acordado de catro meses. Esta actuación está incluída no plan adicional ao Plan de Obras e Servizos (POS) de 2010. No caso do saneamento en San Lois, os traballos serán realizados por Construcciones en Piedra Sigrás, cun prazo de execución de cinco meses. Esta mellora están incluída no Plan de Obras e Servizos 2011. Por último, en materia de expedientes de contratación, a Xunta de Goberno supuxo a adxudicación do contrato de obra de "Ampliación do proxecto de reposición de camiños nas parroquias do Concello de Carballo" a Eulogio Viñal Obras y Construcciones por un prezo de 81.762,14 euros. O prazo de execución previsto é de sete semanas e os traballos están incluídos no Plan de Reinvestimento de Remanentes do PAC-2, da anualidade 2011.
ATÉ O 31 DE XULLO NO TERCEIRO ANDAR DO PAZO DA CULTURA
Xoves 16 de xuño do 2011
A sala da baixocuberta do terceiro andar do Pazo da Cultura de Carballo acolle até o 31 de xullo unha exposición colectiva de artistas de Carballo e da comarca titulada "A beleza", unha iniciativa que ten o obxectivo de promover e impulsar o patrimonio artístico local. Un total de 16 autores e autoras mostran o seu traballo caracterizado por unha grande heteroxeneidade de técnicas, tanto pictóricas (acrílico, óleo ou pastel), como de fotografía, gravado ou incluso olería; e de estilos, que pasan dende o abstracto ao figurativo ou da imaxe en branco e negro e en cor. A beleza é unha noción abstracta ligada a numerosos aspectos da existencia humana, aspectos que se reflicten na exposición a través e pequenos xestos ou de grandes paisaxes; mediante o monocromatismo ou as explosións de cor; a través da beleza do ser humano ou das sensacións que o conforman. Facendo fincapé no aspecto visual, Tomás de Aquino tamén define a beleza como aquilo que agrada á vista "quae vista placet". Tamén, e debido a que constitúe unha experiencia subxectiva, soe dicirse que "a beleza está no ollo do observador". Precisamente é o ollo destes 16 artistas o que plasma a súa particular visión de beleza, unha viaxe que pode realizarse en horario de 17.30 a 20.30 horas con tan só achegarse ao Pazo da Cultura.
APTCM RETOMARÁ A CREACIÓN DUN CONSORCIO NA COSTA DA MORTE
Xoves 16 de xuño do 2011
Vén de arrincar esta mañá no Telecentro do Pazo da Cultura de Carballo o curso da Universidade da Coruña (UDC) "A evolución do turismo no marco da sociedade global: retos para a súa planificación e xestión", unha cita que nace coa vocación de converterse nunha convocatoria anual, segundo expresou na apertura o director do curso e decano da Facultade de Socioloxía da UDC, Antón Álvarez Sousa, e de ter continuidade para tentar darlle pulo a un sector moi importante e en progresión na Costa da Morte nos últimos anos. Na inauguración tamén estiveron María José Andrade Suárez, directora do curso; o Vicereitor da Universidade da Coruña, Luis Caparrós Esperante; o Concelleiro de Promoción Económica en funcións, Xosé Manuel García Guillín; o Alcalde de Carballo en funcións, Evencio Ferrero; e Manuel Pan Collazo, presidente da Asociación de Profesionais do Sector Turístico da Costa da Morte (APTCM). Este último subliñou a importancia de que un curso destas características estea a disposición dos profesionais da comarca e anunciou que a entidade está traballando para "retomar a creación dun Consorcio de Turismo", unha idea malograda no pasado pero que agora quere recuperarse "facendo un proxecto de integración" e collendo "con forza" a tarefa de crear este organismo. O Vicereitor manifestou o compromiso da UDC de estenderse "máis aló dos campos e das aulas" con máis de 20 cursos de verán, dos que dous teñen lugar en Carballo e desexou que a actividade sexa útil e satisfactoria para os participantes.
DO 1 DE XULLO AO 31 DE AGOSTO
Luns 13 de xuño do 2011
O programa Concilia, unha iniciativa que pretende favorecer a conciliación da vida laboral e familiar dos pais e nais dos alumnos e alumnas dos centros escolares carballeses de Infantil e Primaria, únese por segundo ano consecutivo coas Escolas Deportivas e Culturais Xiria, que ofrecen actividades de lecer para os cativos e cativas do municipio nados entre 1999 e 2007 (inclusive) para ofrecer a posibilidade durante os meses de xullo e agosto de que os rapaces e rapazas estean atendidos entre as 7.30 e as 14.00 horas. Así, a través do Concilia os nenos e nenas están coidados entre as 7.30 e 10.00 horas, coa posibilidade de incluír o almorzo, que correría a cargo da empresa Xolda. E a partires das 10.00 ou das 11.00 horas e ata as 14.00 horas, segundo o horario elixido, os participantes nas Escolas desenvolven actividades deportivas e culturais no CEIP Fogar da capital municipal e no Pavillón Vila de Noia, nas que tamén se inclúen actividades alternativas como excursións, xogos populares, visitas á praia, ao monte ou ao parque acuático. As inscricións poden formalizarse dende o 6 de xuño nas oficinas do Padroado Deportivo Municipal situadas na rúa Vila de Corcubión. Pode obterse máis información, sobre horarios e prezos chamando ao 981 702 109, así como descargar a folla de inscrición en pdf nesta mesma nova.
O MARTES 14 DE XUÑO A PARTIRES DAS 9.00 HORAS
Luns 13 de xuño do 2011
A Concellaría de Obras e Servizos informa de que o martes 14 de xuño a partir das 9.00 horas comeza a retirada dos 3 vertedoiros incontrolados conformados por bidóns de pintura e de residuos perigosos atopados no mes de xaneiro deste ano nas parroquias de Sísamo e Bértoa. Así, os veciños denunciaron no seu momento a aparición deste material tóxico na contorna do Punto Limpo e na Agra de Loenzo en Bértoa, así como na contorna do lugar de Ramil, en Sísamo, onde está situado o verquido máis voluminoso. O Servizo Municipal de Medio Ambiente, a Policía Local e o Seprona (Servizo de Protección da Natureza da Garda Civil) localizaron no seu momento estes residuos, delimitaron e precintaron a zona e denunciaron os feitos á espera de rematar a investigación do sucedido e dun ditame xudicial que permitise retirar este material que implica un claro deterioro paisaxístivo e medioambiental, ademais de ser considerado perigoso. Finalmente, vénse de autorizar a retirada destes residuos por parte do Xulgado de Primeira Instancia e Instrución número 1 de Carballo. A retirada de material será executada, segundo determina o xulgado, por unha empresa especializada, con persoal e material técnico axeitados e cumprindo a normativa que determina o tratamento para este tipo de substancias, así como para as terras que soportan este tipo de contaminación.
A MAIORÍA DOS ARRANXOS REFÍRENSE AO ALUMEADO PÚBLICO
Venres 10 de xuño do 2011
O Concello de Carballo ten atendido no mandato que vai finalizar, entre 2007 e 2011, un total de 5.161 avisos acerca de demandas cidadáns para realizar servizos de mantemento e arranxos en todo o territorio municipal. Desta cantidade, un total de 2.805 refírense ao alumeado público, especialmente por lámpadas fundidas ou en mal funcionamento no medio rural, constituíndo este tipo de actuacións o 54,34 por cento das demandas dos habitantes do municipio. Hai que lembrar que en todo o territorio carballés están rexistrados máis de 8.000 puntos de luz. A Brigada de Obras é a encargada de xestionar as peticións e solucionar as posibles avarías, nun traballo que non deixa de medrar nos últimos anos. Así, os rexistros anuais de 2008 a 2010 (xa que en 2007 e 2011 os datos non abranguen os 12 meses do ano) indican que se atenderon 1.303 avisos en 2008, 1.408 en 2009 e 1.545 o ano pasado. Porén, polo de agora a evolución en 2011 é descendente, xa que de xaneiro a maio atendéronse un total de 565 demandas fronte ás 621 de 2010. Os veciños e veciñas poden denunciar deficiencias en materias como o programa Carballo Limpo, a limpeza de espazos públicos, a reparación de mobiliario urbano, o mantemento de edificios, problemas cos servizos, cos sinais de tráfico ou co arranxo de baches. Calquera cidadán pode formalizar as súas peticións no teléfono 981 704 700 ou ben no correo electrónico <infocarballo@carballo.org>.
REPARTIRANSE UN TOTAL DE 8.000 EXEMPLARES
Xoves 9 de xuño do 2011
Os Servizos de Normalización Lingüística dos concellos de Carballo, Cabana, Malpica, Ponteceso e Zas continúan colaborando no desenvolvemento de accións para a promoción do galego. Desta volta coa edición de "Un verán de lecer", unha guía con propostas de lectura, música, banda deseñada e xogos para o lecer do alumnado destas comarcas durante o verán. Trátase de recomendacións de libros recentemente publicados de distintas editoriais ordenados por franxas de idade, dende nenos e nenas que aínda están principiando a ler ata xoves adultos. A edición e maquetación desta guía, que recompila ata preto de 30 propostas, correu a cargo do Concello de Zas, mentres que a impresión fíxoa a Deputación da Coruña. Está previsto que se repartan 8.000 exemplares de "Un verán de lecer" nos centros de ensino dos concellos participantes para que os xogos, discos e libros sexan recomendados aos rapaces e rapazas como actividade de lecer durante o verán. Un total de 4.000 exemplares son para o Concello de Carballo; 800 para cada un dos concellos de Bergantiños e Terra de Soneira que colaboran na iniciativa; e 800 para que a Deputación o reparta noutros concellos da provincia.
VENRES 10 DE XUÑO ÁS 21.00 HORAS: ENTRADA DE BALDE
Mércores 8 de xuño do 2011
Carballo acolle por segundo ano consecutivo o Festival Express do Festival Mozart, unha iniciativa que leva actuacións do festival por un total de 9 vilas e cidades da provincia entre as que están As Pontes, Betanzos, Boiro, Ferrol, Noia, Ortigueira, Rianxo e Vimianzo. No caso de Carballo trátase do Grupo Instrumental Siglo XX nun repertorio que inclúe catro valses dos Strauss, ademais de dúas obras de Arnold Schoenberg: "Música de Nadal" e "A brigada de ferro", de La Sociedad Privada de Conciertos. Ademais dos músicos, a actuación está acompañada por un trío de danza. Oriol Ponsa, director do Festival Mozart, estivo en Carballo para falar desta proposta, que define como "moi rompedora" e "curiosa", nunha oportunidade para achegarse a un formato "que incluso é descoñecido nos propios círculos musicais". La Sociedad Privada de Conciertos foi fundada en 1919 como unha asociación privada para poder representar a música "sen ataduras". Sempre facendo producións de "pequeno formato", segundo Ponsa, tiñan normas moi estrictas para desfrutar a música, como ter vetado o acceso dos críticos ou prohibir aplausos ou calquera outra manifestación de aprobación ou reprobación da música para poder escoitala "libremente". O Grupo Instrumental Siglo XX recolle este xeito de entender a música que chega o venres 10 ás 21.00 horas ao Pazo da Cultura. A entrada é de balde.
SÁBADO 11 DE XUÑO
Mércores 8 de xuño do 2011
O Circuíto de Motor de Bértoa é o escenario no que se celebra o sábado 11 de xuño o III Autocross Bergantiños, unha cita organizada por Escudería Bergantiños Motor coa colaboración da Federación Galega de Automobilismo, o Concello de Carballo e a Fundación Deporte Galego da Xunta. A proba comeza a partires das 9.00 horas coas verificacións administrativas e técnicas e os primeiros adestramentos son a partires das 12.00 horas. Está previsto que as semifinais se disputen ás 15.30 horas e as finais a partires das 17.15 horas, coa entrega de premios e trofeos ás 19.30 horas. Segundo a organización, ata o día de hoxe, cando remata o prazo de inscrición, están anotados arredor de medio centenar de pilotos de todas as categorías, entre os que se atopan os primeiros de Galicia que están loitando polo campionato. Esta proba conta, así mesmo, coa novidade de que o Circuíto vén de ser obxecto dunha reforma co obxectivo "de facer as carreiras máis espectaculares para o público", en verbas do xerente do Padroado Deportivo Municipal, Francisco García Bello. Cúmprese así unha demanda xeral dos pilotos que compiten no Circuíto de Motor Municipal que ademais redundará na vistosidade das probas. Así mesmo, a organización subliña que o sábado haberá algunhas sorpresas durante a cita.
UN PROXECTO CUN ORZAMENTO DE 1,2 MILLÓNS DE EUROS
Luns 6 de xuño do 2011
A Xunta de Goberno Local, reunida en sesión ordinaria, vén de adxudicar o contrato de obra da Biblioteca de Carballo á empresa coruñesa Ogmios Proyectos SL. Un total de 42 compañías optaron á execución do proxecto, que finalmente recaeu en Ogmios cun orzamento de licitación de 1.199.588 euros. Os criterios que se seguiron durante o proceso de contratación foron: a valoración do plan de execución de obra, a redución de prazos (que a adxudicataria baixa en 45 días) e a proposta económica. Esta última supuxo unha baixa de máis de 300.000 euros sobre o orzamento de licitación, de 1,5 millóns de euros. O prazo final de execución é de 15,5 meses e a puntuación total obtida pola empresa durante a contratación foi de 89,33 puntos. Así mesmo, Ogmios tamén adquiriu o compromiso de acometer as melloras sen custo adicional que recolle o prego de condicións e que están valoradas en aproximadamente 150.000 euros. Trátase de actuacións relativas ás cualidades, aos acabados, a servizos como alarmas, mobiliario, lámpadas, proxectores ou monitores de televisión. A nova instalación estará situada nunha parcela de 1.500 metros cadrados na contorna da Rúa Pontevedra. O importe necesario para a súa construción será achegado na súa totalidade polo Ministerio de Cultura.
A NOTA MEDIA DOS ESPECTÁCULOS FOI DE 4,15 SOBRE 5
Luns 6 de xuño do 2011
A organización do Festival Internacional Outono de Teatro (FIOT) fai públicos os resultados do Premio do Público 2010, que se realiza co reconto das puntuacións emitidas tanto polos espectadores asistentes en cada espectáculo como pola valoración dos aboados. Analizadas as puntuacións dos 7 espectáculos de teatro de sala e dos 3 espectáculos do Ciclo OTNI, a proposta gañadora é "Volpone" da compañía galega Talía Teatro, cunha puntuación de 4,6 (sobre 5). Ademais do recoñecemento, o galardón consiste no compromiso de invitar a participar a esta compañía a unha futura edición do festival. Moi preto da puntuación de Talía está a compañía Atalaya con "Ricardo III", cunha puntuación de 4,5, seguida de Kamikaze Producciones con "La función por hacer" cunha puntuación media de 4,15. Produccións Teatrais Excéntricas, con "Un cranio furado (A skull in Connemara)" tivo unha puntuación de 4. A alta calidade do conxuntos das funcións programadas vén confirmada polos votos dos espectadores, xa que a puntuación media foi de 4,15 (sobre 5), a terceira máis alta na historia do festival. Esta valoración conxunta dos espectáculos cobra máis sentido tendo en conta a elevada asistencia de público durante todo festival, xa que nas 11 funcións programadas se esgotaron as localidades.
DO 22 AO 26 DE XUÑO
Sábado 4 de xuño do 2011
Chega un tempo "de festa e alegría", unha cita que "un ano máis", en verbas da Concelleira de Cultura en funcións, Belén Lendoiro, "une tradición e modernidade". Os costumes máis ancestrais e a honra do patrón mestúranse co baile, o deporte, a cultura e a música, e con citas tan esperadas como a Festa do Bosque, o Descenso do Anllóns o Concurso de Cachelas e un grande concerto, que este ano conta coa actuación da coñecida artista Chenoa. É tempo de San Xoán. Tanto Belén Lendoiro como o presidente da Comisión de Festas, Jorge Campos, ou o Alcalde en funcións, Evencio Ferrero, quixeron subliñar o carácter de austeridade dos festexos, "axustando recursos", en verbas de Campos; ou un San Xoán, que, como simboliza o cartel anunciador deste ano, "emerxe entre estes tempos difíciles e grises porque ten que ser un momento de cor, luz e alegría", segundo Ferrero. O gañador do Concurso do cartel, Juan Carlos Traba, recibiu un premio de 450 euros, patrocinado por Óptica Enríquez. Dez grandes citas deportivas con deportes tan diversos como o ciclismo, o kayaksurf, ou fútbol; 12 citas musicais con habaneras, baile tradicional, verbenas ou rock; dúas actuacións teatrais; dúas actividades artísticas; e o pregón do coñecido músico Xabier Díaz, voz de Berrogüetto, completan o programa dunhas festas "para estar coa familia, os amigos e acoller a toda a xente que queira vir a Carballo", en verbas de Evencio Ferrero.
_(535_x_143_px).jpg)
