A ACHEGA PREVISTA PARA O POS É DE 672.000 EUROS
Venres 25 de novembro do 2011
A sesión plenaria ordinaria do mes de novembro conta entre os asuntos da orde do día coa aprobación do contrato administrativo especial para a 'Concesión administrativa dos postos situados no Mercado Municipal de Carballo'. Así, mediante concurso aberto establecerase a adxudicación do dominio e uso público municipal para a explotación de: once postos destinados á venda ao público de produtos de consumo propio; seis almacéns con cámaras de frío; e cinco almacéns para outros postos, todos eles situados no mercado municipal. Aos almacéns poderán optar tanto os postos exteriores como os interiores. O prazo da concesión será de vinte anos (sen posibilidade de prórroga) para os once postos destinados á venda ao público de produtos de consumo propios; en cambio, no caso dos almacéns o prazo será o mesmo que o estipulado na concesión do posto de venda ao que sexa vinculado, tamén sen posibilidade de prórroga. No mesmo pleno está previsto, así mesmo, abordar a aprobación da modificación da Ordenanza fiscal número 11 reguladora das taxas pola prestación de servizos no mercado municipal de abastos. No seu momento presentouse unha única alegación que foi desestimada, polo que a corporación pode agora acordar o seu visto e prace definitivo.
DOMINGO 27 DE NOVEMBRO NO SEGUNDO ANDAR DO MERCADO
Xoves 24 de novembro do 2011
Ademais da exposición "Anónimas", presente no Pazo da Cultura até o 30 de novembro, e da celebración de obradoiros entre os mozos e mozas do Concello, a Concellaría de Igualdade organiza o domingo 27 unha cita xa tradicional no marco do Día Internacional da Eliminación da Violencia contra as Mulleres (25 de novembro), como é a Feira das Asociacións. Esta actividade vénse realizando desde 2004 co obxectivo de sensibilizar á poboación acerca da violencia de xénero e do labor que desempeñan as asociacións que traballan a prol da igualdade da muller. Este ano participan na feira arredor de 20 entidades, destacando as que traballan pola igualdade de xénero, como Mulleralia ou o propio Centro de Información á Muller (CIM) de Carballo. A cita conta, ademais, cunha novidade, xa que esta edición desenvólvese no segundo andar do mercado municipal. A feira estará aberta de 11.00 a 14.00 horas, aínda que a inauguración está prevista para as 12.00, e contará coa presenza de Pilar González, Xefa da Unidade de Violencia de Xénero da Subdelegación do Goberno. Estará arroupada polo Alcalde de Carballo, Evencio Ferrero; pola Concelleira de Igualdade, Silvana Castro; e por representantes das forzas de seguridade: Garda Civil e Policía Local. Está prevista, así mesmo, a lectura da Declaración institucional con motivo do 25 de novembro de 2011.
ENTRE O XOVES 24 E O DOMINGO 27 NO PAZO DA CULTURA
Mércores 23 de novembro do 2011
O xoves 24 de novembro continúan as actividades do programa Novembro con Música 2011 cun Concerto extraordinario do Conservatorio Profesional de Música de Carballo, unha oportunidade única de gozar co traballo que os alumnos e profesores desenvolven neste centro educativo musical ao longo do curso académico. Esta cita, que comeza ás 20.00 horas no auditorio do Pazo da Cultura (con entrada libre), contará coa participación da solista Julia Arca, da Orquestra Xuvenil de Corda e da Big Band do Conservatorio de Carballo. O espectáculo principa coa intervención de Julia Arca, unha alumna de 6º de Grao Profesional de violín. Esta estradense e coruñesa de adopción, asiste ás clases de violín co mestre Eduardo Coma (violinista de Luar na Lubre) e rematará este ano os seus estudos en Carballo. Logo da actuación de Julia Arca é a quenda da Orquestra Xuvenil de Corda do Conservatorio, dirixida polo mestre Juan Otero, que interpretará unha serie de temas de distintas épocas e estilos musicais. O remate pono unha das formacións máis veteranas do conservatorio, a Big Band, unha formación clásica con inspiracións da música dos anos 40, 50 e 60, cun estilo musical moi definido que tira cara a sons bailables e moi ligados aos EE.UU.
TAN SÓ FALTA PARTE DO EQUIPAMENTO E A DOTACIÓN DE PERSOAL
Martes 22 de novembro do 2011
Varios técnicos do Consorcio Galego de Servizos de Igualdade e Benestar inspeccionaron o luns 21 de novembro pola tarde as instalacións da nova Escola Infantil Municipal para avanzar na súa futura posta en funcionamento. Así, comprobaron a recepción das obras, e que o edificio xa está dotado con todos os equipos sanitarios, de cociña e incluso de mobiliario necesarios, incluíndo taquillas, baños, cámaras de frío, etc. Tamén están instaladas as medidas necesarias para garantir o benestar dos cativos e cativas da escola infantil, como son os dispositivos de seguridade das portas. Así, tan só resta que por parte do Consorcio de Igualdade e Benestar se achegue o mobiliario correspondente ás aulas e salas de profesores, así como o material didáctico necesario para abrir as instalacións. Así mesmo, o Consorcio tamén é o organismo responsable de realizar a selección de persoal. Nestes momentos, o Concello carballés xa ten cumprido con todos os requisitos para a posta en marcha do servizo, e a partir de agora os prazos de apertura dependen do organismo autonómico. Hai que lembrar que esta segunda Escola Infantil Municipal está situada na contorna da urbanización de Riotorto na estrada de Razo, nunha parcela de 2.500 metros cadrados, e que terá capacidade para 102 prazas.
ADXUDICADAS AS OBRAS PARA CREAR UNHA PRAZA PÚBLICA EN SOFÁN
Luns 21 de novembro do 2011
A Xunta de Goberno Local vén de aprobar o traslado da solicitude e da documentación do "Proxecto Anllóns-Bardoso. Posta en valor dos ríos", ao servizo de Urbanismo da Consellería de Medio Ambiente, Territorio e Infraestruturas para poder proceder á tramitación do informe ambiental e avanzar así na contratación dos traballos desta actuación, que ten como obxectivo a ampliación e mellora do subministro de auga potable de Carballo. Esta iniciativa conta cunha axuda de 2.902.057,59 euros do Fondo Europeo de Desenvolvemento Rexional (Feder), e ten un orzamento global de 4.145.796,5 euros. O proxecto, elaborado por Valora Consultaría e Innovación, suporía repartir a presión da auga entre o río Anllóns e o Bardoso, facendo a captación dende dúas canles. Estaría prevista a creación dunha nova ETAP (estación de tratamento de auga potable) no río Bardoso e a construción dun depósito regulador intermedio entre o actual depósito do Paraíso (en Berdillo) e o situado na rúa Vila de Corcubión da capital municipal. Está previsto que esta iniciativa mellore considerablemente o subministro e a calidade das augas na capital carballesa, ademais do caudal ecolóxico e a protección do Anllóns en situacións de seca, e que achegue aos veciños e veciñas información dos sistemas fluviais e proporcione educación ambiental en materia do ciclo da auga.
22, 23 E 29 DE NOVEMBRO EN HORARIO LECTIVO
Luns 21 de novembro do 2011
Os días 22, 23 e 29 de novembro, o alumnado de 1º de Bacharelato dos institutos Alfredo Brañas e Parga Pondal de Carballo participarán nos obradoiro "Ops! (O português simple)", unha actividade que ten por obxectivo principal mostrarlles aos alumnos e ás alumnas participantes que o galego é unha entrada privilexiada para acceder ao portugués. O martes 22 haberá tres sesións no IES Isidro Parga Pondal, con tres grupos diferentes de 1º de Bacharelato. A primeira sesión ten lugar ás 10.40 hoiras, a segunda ás 12.50 e a terceira, xa pola tarde, ás 16.40 horas. Cada unha das sesións dura 100 minutos. O mércores 23 ten lugar a primeira das sesións no IES Alfredo Brañas (na imaxe), ás 12.50 horas Posteriormente, o martes 29, desenvolverase o último dos obradoiros en Carballo, tamén no Alfredo Brañas, e ás 9.00 horas. Estes obradoiros, organizados polo Servizo de Normalización Lingüística do Concello de Carballo, serán desenvoltos por monitorado da Asociación Galega da Lingua (Agal). As diferentes sesións serán dinámicas, divertidas e participativas.
RETIRADOS CATRO NOVOS VERTEDOIROS INCONTROLADOS
Venres 18 de novembro do 2011
A Brigada de Medio Ambiente de Carballo está realizando traballos de limpeza no Paseo do Anllóns, retirando a herba e a maleza para evitar que invada o firme. Así mesmo, veñen de rematar os labores para limpar as marxes do río ao seu paso polo Parque do Anllóns, especialmente a maleza que xorde entre as pedras que cubren a canle, ou árbores como salgueiros ou ameneiros que medran de xeito incontrolado. Así mesmo, nos últimos días levouse a cabo a poda de varias árbores, ben para que non invadiran propiedades privadas, ben por motivos de seguridade. No marco destas actuacións téñense podado os umeiros situados no patio do CEIP Bergantiños da capital municipal, que tiñan 25 metros de altura e que podían causar problemas ao medrar por riba do pavillón municipal anexo ao centro escolar. Coa axuda do camión, limpáronse as ramas e rebaixouse a súa altura a 6 metros. Tamén se podaron dous castiñeiros e unha nogueira en Entrecruces xa que estaban invadindo a rede do alumeado público co conseguinte perigo, especialmente en inverno polo risco de temporais. Por último, podáronse dous carballos na parroquia de Bértoa, nos arredores das instalacións de Cafés Lúa, para evitar que invadiran unha propiedade privada.
SÁBADO 19 DE NOVEMBRO ÁS 21.00 HORAS
Venres 18 de novembro do 2011
O programa do Novembro con Música 2011 dedica a súa segunda fin de semana á música coral co tradicional festival que ten lugar o sábado 19 de novembro. Xa é un clásico desta cita, no que participan tres das agrupación vogais máis importantes de Carballo e, no caso dalgunha como a Coral Polifónica de Bergantiños, a súa fama traspasa, desde hai anos, as fronteiras de Galicia e incluso de España. Este mes, dedicado á música e a actividades vinculadas a ela, organízase desde o Concello de Carballo -a través da Concellería de Cultura- coa colaboración das Agrupacións Musicais de Carballo e da Deputación da Coruña. As tres agrupacións participantes neste festival son a Agrupación Polifónica de Carballo, o Coro Aires de Bergantiños e a Coral Polifónica de Bergantiños (na imaxe). A cita é de balde ata completar o aforo a partires das 21.00 horas no auditorio do Pazo da Cultura. Así mesmo, hai que lembrar que o xoves 24 de novembro ten lugar o Concerto extraordinario do Conservatorio Profesional de Música de Carballo no que intervirán a violinista-solista Julia Arca -alumna de 6º GP de violín-, a Orquestra Xuvenil de Corda e a Big Band do Conservatorio. A cita é tamén no Pazo da Cultura a partir das 20.00 horas e a entrada é libre.
DO 17 A 29 DE NOVEMBRO NOS CEIP E IES DE CARBALLO
Mércores 16 de novembro do 2011
Máis de 500 rapaces e rapazas de Primaria e Secundaria dos centros de ensino de Carballo realizarán actividades entre o xoves 17 e o martes 29 de novembro para conmemorar o Día Internacional para a Eliminación da Violencia contra as Mulleres, que se celebra o 25 de novembro desde que no ano 1999 a Asemblea Xeral da ONU escollera este día como o propio para a celebración de actividades dirixidas a sensibilizar á sociedade sobre esta problemática. A iniciativa, titulada "Medios visuais e prevención da violencia de xénero", consiste na realización de obradoiros de sensibilización e reflexión ao redor da violencia de xénero e da igualdade de oportunidades entre homes e mulleres, a través de elementos audiovisuais (vídeos, música, videoxogos, anuncios de tv, etc.) que servirán para que os rapaces e rapazas sexan capaces de analizar desde a perspectiva de xénero todos estes estímulos que día a día vemos e escoitamos en medios de comunicación ou en calquera outro elemento publicitario dirixido especificamente a mozos e mozas. Os obradoiros están dirixidos aos alumnos/as de 5º de Primaria dos CEIP e aos alumnos/as de 4º da ESO dos IES de Carballo. Tamén participan dúas asociacións sen ánimo de lucro do Concello que traballan con discapacitados e discapacitadas.
INSCRICIÓNS ATÉ O 2 DE DECEMBRO
Martes 15 de novembro do 2011
O Concello de Carballo, a través da Concellaría de Promoción Económica que dirixe Xosé Regueira, abre o prazo a partires do 16 de novembro e até o venres 2 de decembro para participar no II Plan de Mellora da Imaxe Comercial e Escaparatismo, incluído no Plan de Reactivación e Dinamización Empresarial que se está a desenvolver dentro do proxecto Fórum Carballo. Segundo esta iniciativa, os establecementos de Carballo que sexan admitidos na proposta -ata un máximo de 25- poderán contar cun informe especializado realizado por unha consultora no que cada un dos locais participantes será obxecto dun estudo individual a partir do que se elaborará un dossier no que se analizarán a faciana, o escaparate e o interior do local, así como a colocación do produto co obxectivo de mellorar a imaxe comercial do establecemento. Os comercios seleccionaranse mediante un proceso no que primarán aspectos como a antigüidade do negocio e do titular ou a contratación de persoas con minusvalías. Os establecementos seleccionados terán tamén a opción de participar nun concurso de escaparatismo, que posibilitará aos premiados a montaxe dos seus escaparates por profesionais especializados. Para consultar as bases, premer aquí.
XA PODE TRAMITARSE A OCUPACIÓN DOS TERREOS
Luns 14 de novembro do 2011
Xestur Coruña (Xestión Urbanística de A Coruña), entidade responsable do desenvolvemento da ampliación do Parque Empresarial de Bértoa, vén de escriturar as parcelas do polígono, polo que os terreos están por fin a disposición dos empresarios e emprendedores que queiran instalar as súas naves. Así, agora xa é posible comezar a ocupar as 146 parcelas dispoñibles para uso empresarial e pedir hipotecas sobre elas; en definitiva, principiar o aproveitamento do parque. A finais do pasado mes de outubro, o Concello e Xestur daban outro paso fundamental de cara á posta en marcha do polígono coa sinatura da acta de recepción das obras de urbanización, o que permite que as parcelas sexan empregadas para os usos e servizos correspondentes. Pero non é até o de agora, coa formalización da escritura, cando o parque empresarial pasa a estar realmente a disposición das empresas. Nestes momentos, o Concello carballés está xestionando cinco proxectos que poderían culminar na implantación doutras tantas empresas no polígono industrial, aínda que nalgúns casos aínda resta realizar varios trámites. Hai que lembrar que esta ampliación do polígono carballés foi inaugurada hai máis dun ano e supón a incorporación á superficie actual dun total de 718.482 metros cadrados.
ATA O 16 DE DECEMBRO NA BAIXOCUBERTA DO PAZO DA CULTURA
Venres 11 de novembro do 2011
"No time", unha mostra artística multidisciplinar creada por Peter Kramer (Copenhague, 1959) e Nils Viga Hausken (Stavanger, 1960), completa a programación do Novembro con Música na sala da baixocuberta (3º andar) do Pazo da Cultura. Esta exposición, que poderá visitarse en horario de 18.00 a 21.00 horas até o 16 de decembro, suxire no espectador un reaxuste da súa mirada co propósito de continuar cunha busca que comezou hai 20 anos, cando expuxeron xuntos por primeira vez nunha galería de arte de Valencia. O propio Kramer explicou na inauguración da mostra que naquel entón a diverxencia dos estilos dos dous artistas fixo que tiveran que traballar de forma conxunta. Porén, agora "traballamos por separado sen saber o que facía o outro" pero "atopamos un fío condutor", subliña Kramer. Así, exploran en dous grandes paneis enfrontados o concepto do tempo. Ambas propostas compleméntanse para converterse nunha única obra poñendo a proba a capacidade do espectador de ler entre liñas e a información que hai que descifrar, quedando só un concepto claro: o paso do tempo. "Unha proposta de arte contemporáneo", pero "en certo modo artesanal", segundo asegura Beatriz Fernández, que reflicte "o tempo como simple momento que pasa, como un pensamento, como unha historia, como unha época".
_(535_x_143_px).jpg)
