COMEZA O PROCESO PARA OBTER OUTRAS 15 CERTIFICACIÓNS
Mércores 9 de maio do 2012
A Xunta de Galicia vén de acreditar ao Concello de Carballo para impartir oito especialidades formativas no recinto Fórum Carballo polo que o complexo poderá funcionar ao cen por cen. Así, concedeuse a homologación para emitir os seguintes certificados de profesionalidade: cociña, caldereiro industrial, deseñador web e multimedia, ebanista, soldador de estruturas metálicas, xefe de sala-maître, informática de usuario e cachoteiro. Con estas oito especialidades todas as naves do Fórum equipadas con talleres contarán con actividade formativa. Está previsto tamén achegar nova documentación para poder acadar outras cinco especialidades xa solicitadas. Así mesmo, a Concellaría de Formación que dirixe Marcos Trigo informa de que está previsto iniciar os trámites para obter a certificación doutras 15: soldadura oxigás e mig/mag, montador de estruturas metálicas, soldadura con electrodo revestido e tig, operacións básicas de cociña, operacións básicas de restaurante-bar, servizos de bar e cafetería, control de proxectos e obras de construción, colocación de pedra natural, administración de servizos de Internet, programación de sistemas informáticos, instalación de mobles, montaxe de mobles e carpintaría, mantemento de elementos non estruturais de carrocería de vehículos, operador auxiliar de montaxe de instalacións electrotécnicas e telecomunicacións en edificios e montaxe e mantemento de instalacións eléctricas de baixa tensión.
SÁBADO 12 DE MAIO ENTRE AS 10.00 E AS 19.00 HORAS
Mércores 9 de maio do 2012
Os pavillóns Carballo Calero, Vila de Noia e Fogar da capital carballesa acollen o sábado 12 de maio a fase final do Campionato provincial de balonmán en categorías alevín mixta, benxamín mixta e infantil masculina e feminina no que participan as Escolas de Balonmán Xiria. Arredor de 400 nenos e nenas de entre 6 e 12 anos distribuídos en 30 equipos disputarán máis de 40 partidos nunha xornada intensiva entre as 10.00 e as 19.00 horas. O Concelleiro de Deporte Marcos Trigo, subliña a importancia de que Carballo acolla unha fin de semana máis un evento deportivo deste nivel e o Alcalde, Evencio Ferrero, afirma que é "un privilexio poder ver de forma tan continuada a actividade das escolas deportivas", e especialmente das Escolas de Balonmán Xiria que son "un modelo a seguir". Respecto da competición, o delegado territorial da Federación Galega de Balonmán, Bruno López, explica que pertence ao programa Xogade (Xogos Galegos Deportivos en Idade Escolar) e que conta coa colaboración da Xunta de Galicia, da propia Federación e tamén de Carballo Deporte. Serán "nove horas case ininterrompidas de balonmán", segundo López, pero tamén, en verbas do presidente das Escolas de Balonmán Xiria, Álex Cousillas "unha xornada estupenda de convivencia para os rapaces e rapazas". Os interesados e interesadas poden descargar os horarios da cita ao completo, premendo aquí.
LUZ VERDE PARA UN RECOÑECEMENTO EXTRAXUDICIAL DE CRÉDITO
Martes 8 de maio do 2012
O pleno da corporación, reunido nunha sesión extraordinaria o luns 7 de maio vén de darlle o visto e prace por unanimidade á aprobación inicial do Regulamento do Mercado Municipal de Abastos, así como á adxudicación da concesión administrativa de tres postos de alimentación do primeiro andar. No primeiro caso, o Regulamento é unha norma tipo que recolle moitos dos puntos do anterior, aínda que actualizando certos elementos como o canon ou as taxas. Así mesmo, a normativa conta con algunhas novidades, como o establecemento dunha sinalización e un equipamento común por gremios nos postos da praza de abastos, con cores identificativas: azul-peixerías, vermello-carnicerías, verde-froiterías, amarelo-panaderías. A sinalización estaría complementada cun vestiario para os praceiros acorde, nas mesmas cores. Outra das novidades refírese ao apartado de promoción e publicidade, coa inclusión dun apartado na páxina web municipal con información relativa aos postos, aos produtos que teñen á venda, á inclusión de reparto a domicilio, a promocións que queiran poñer en marcha, etc. No que respecta á adxudicación, un dos postos será para peixe con 7 metros cadrados; outro para froitas e verduras con 16,9 metros; e un terceiro estaría destinado a carnicería con 11,7 metros. O importe total da adxudicación dos tres supera os 46.000 euros.
AS LETRAS EN VOCES: O DÍA 17
Luns 7 de maio do 2012
Carballo celebra o Día das Letras do 17 de maio a través dun programa de actividades que dura todo o mes e que se centra nunha serie de citas arredor da promoción da lingua, o libro e a lectura con propostas moi diversas como teatro, concertos, exposicións ou festivais. O Programa das Letras 2012 está organizado pola Concellaría de Cultura, pero tamén conta coa colaboración das asociacións culturais do municipio, que contribúen coa celebración de diversos actos, e de organismos como a Deputación provincial. Como cada ano, o acto máis esperado é o maratón "As letras en voces", o día 17 de 11.00 a 13.30 horas, unha lectura pública e colectiva dos autores homenaxeados no Día das Letras na que cada participante le un fragmento literario de calquera dos cincuenta autores que teñen sido recoñecidos este día, con especial atención ao escollido este ano, o pontevedrés Valentín Paz-Andrade. O obxectivo da cita é "realizar unha homenaxe á lingua galega como vehículo de expresión e creación, e como un dos expoñentes esenciais da nosa cultura", en verbas da Concelleira de Cultura, Mar Eirís. Os interesados e interesadas en reservar horario poden facelo no teléfono 981 704 300; no fax 981 704 302 e no correo <cultura@carballo.org>.
CONVENIO DE ACTUACIÓNS MUSICAIS PARA O ANO 2012
Luns 7 de maio do 2012
A Xunta de Goberno Local vén de aprobar o expediente de contratación para a "Concesión demanial da utilización privativa de bens de uso público municipal no casco urbano para a colocación de postos durante as festas patronais de San Xoán 2012-2013". A adxudicación realizarase mediante procedemento aberto utilizando como único criterio de valoración das ofertas o prezo e afecta á instalación de barracas, carruseis e demais postos, elementos e xogos exclusivos e típicos da festa. A cantidade que o concesionario deberá pagar ao Concello será, como mínimo, de 24.183, 25 euros ao ano por cinco días de ocupación cada anualidade (4.836,65 euros/día), realizándose as ofertas á alza. O contrato terá unha vixencia bianual para os anos 2012 e 2013 e poderá ter unha prórroga dun ano por acordo expreso do órgano de contratación. A sesión supuxo así mesmo a aprobación do Convenio marco de Actuacións Musicais a favor de grupos de música e danza tradicional, masas corais, orquestras, conxuntos e bandas de música para o ano 2012, que ten por obxecto contribuír á promoción da música e o folclore que se desenvolve no Concello de Carballo e a difundir o labor que realizan as agrupacións musicais do municipio.
COMPARECENCIAS DE BELÉN LENDOIRO E EVENCIO FERRERO
Venres 4 de maio do 2012
A corporación carballesa celebra o luns 7 de maio un pleno extraordinario no que dous dos principais puntos da orde do día refírense ao novo mercado. Así, está previsto abordar a aprobación inicial do Regulamento do Mercado Municipal de Abastos, un documento que foi estudado durante o mes de abril por todos os grupos da corporación e que inclúe novidades como o establecemento dunha sinalización e un equipamento común por gremios nos postos da praza ou a inclusión de mecanismos de publicidade como un apartado na páxina web municipal con información relativa aos postos, aos produtos que teñen á venda, á inclusión de reparto a domicilio, a promocións que queiran poñer en marcha, etc. No decorrer da comisión informativa houbo discrepancias entre os grupos políticos municipais sobre o artigo do regulamento referido ao emprego do galego na rotulación e sinaléctica do edificio, polo que haberá que esperar á resolución plenaria para despexar as dúbidas neste punto. O outro asunto relacionado co mercado municipal aborda a adxudicación da concesión administrativa de tres postos de alimentación do primeiro andar: un para peixe de 7 metros cadrados; un de froitas e verduras de 16,9 metros; e un destinado a carnicería de 11,7 metros. O importe total da adxudicación dos tres supera os 46.000 euros.
PAÍSES COLABORADORES: ALEMANIA, ITALIA, POLONIA E REINO UNIDO
Venres 4 de maio do 2012
O Concello de Carballo fai pública a listaxe definitiva de candidatos/as admitidos/as para participar no programa Carballo en movemento. Un total de 24 mozos e mozas de entre 18 e 35 anos con titulación en FP ou universitaria poderán realizar prácticas profesionais no estranxeiro de 12 semanas de duración ao longo do ano 2012 en Alemania, Italia, Polonia ou Reino Unido. O período de prácticas realizarase entre os meses de setembro e decembro de 2012, aínda que todavía non se coñecen as datas concretas. Polo tanto, a pesares de que o apartado 3.2. das bases da convocatoria establece que os admitidos/as deberán confirmar a súa participación nas prácticas no prazo de dez días dende que se fan públicas as datas, ata que non se concreten exactamente os días estipulados non comezará a consumirse o prazo e non será necesario realizar esta confirmación. As datas definitivas das prácticas faranse públicas proximamente na páxina web do Concello de Carballo. O programa "Carballo en movemento: fomento da mobilidade no proceso de formación da xuventude local" está incluído no programa europeo Leonardo da Vinci de aprendizaxe permanente e está financiado polo Organismo Autónomo de Programas Educativos Europeos (Agencia Nacional). Para consultar a listaxe de admitidos/as, premer aquí.
ENTRE O DOMINGO 6 E O VENRES 11 DE MAIO
Venres 4 de maio do 2012
Máis de 1.200 nenos e nenas dos centros de ensino do Concello carballés participan entre o domingo 6 e o venres 11 de maio na VII Semana do Libro e a Lectura, que nesta edición, e despois de ter abordado o medo, o amor, o mar ou a mentira, ten como temática a superstición e como lema "12+1". O obxectivo desta cita é, ademais de favorecer a difusión da lectura "crear un lugar de encontro para os mais pequenos e espertar a súa curiosidade polos libros", segundo a Concelleira de Cultura, Mar Eirís. Organizada pola AS-PG (Asociación Socio-Pedagóxica Galega), o programa conta coa colaboración do Concello de Carballo e da Xunta a través do programa Letras Vivas, así como co patrocinio da Obra Social de La Caixa e Conservas Calvo. Segundo Eirís "nunha situación de crise hai que seguir mantendo a educación e a cultura como dous piares básicos". En canto ás actividades previstas, ademais da inauguración, o domingo 6 de maio ás 12.30 horas, celebraranse de luns a venres obradoiros para alumnos e alumnas de Infantil e Primaria dos centros de ensino do municipio de 9.30 a 14.00 horas. Ademais, o público en xeral pode desfrutar, tamén de luns a venres ás 18.30 horas, de contacontos e haberá exposicións permanentes de libros e de materiais elaborados polo alumnado que poden visitarse cada día de 18.00 a 20.00 horas. Todas as actividades son no Pazo da Cultura.
O EQUIPO DE BALONMÁN ESTÁ ENTRE OS OITO MELLORES DE ESPAÑA
Venres 4 de maio do 2012
O Alcalde de Carballo, Evencio Ferrero, vén de recibir no Concello e de felicitar en nome de todos os veciños e veciñas do municipio aos xogadores de categoría xuvenil das Escolas de Balonmán Xiria, o Ifecgás Pereira Xiria; e aos de categoría júnior do Club Baloncesto Artai polos seus logros deportivos. Así, os primeiros, ademais de proclamarse campións galegos tiveron un balance na Liga de División de Honra Xuvenil de 20 vitorias, 1 empate e tan só unha derrota. Así mesmo, logo de proclamarse campión, o equipo carballés vencía no sector estatal celebrado en Carballo deixando na cuneta a clubs de gran tradición no mundo do balonmán como Bidasoa e Valladolid e colándose entre os oito mellores de toda España. En próximas datas loitará polo Campionato de España medíndose a dous dos clubs máis importantes no mundo do balonmán: o FC Barcelona e o Ciudad Real. Os júnior do Club Baloncesto Artai foron, pola súa banda, campións da Liga Provincial cun balance de 17 vitorias e unha derrota na fase regular, ademais de campións da liga de ascenso á Liga Galega cun balance de seis vitorias e ningunha derrota. É a primeira vez na historia do Club que se acada este ascenso. Durante o acto, no que tamén estiveron presentes os adestradores dos rapaces, Fernando Vázquez e Joaquín Moreira, así como os concelleiros Marcos Trigo e Belén Lendoiro, Ferrero quixo subliñar o labor dos equipos, especialmente "porque estades levando o nome de Carballo ao máis alto nivel".
EN HORARIO DE 18.00 A 21.00 HORAS NO ANDAR -1 DO PAZO DA CULTURA
Xoves 3 de maio do 2012
A exposición "Nicaragua: unha realidade viva" pode visitarse desde o mércores 2 de maio e até o día 14 do mesmo mes no Pazo da Cultura dentro do seu percorrido polas diferentes Deputacións e Concellos socios do Fondo Galego de Cooperación e Solidariedade. A mostra reúne as imaxes tomadas polo recoñecido fotógrafo vilagarcián Eduardo J. Castro no marco do proxecto "A formación sociosanitaria como vía de desenvolvemento" que levou a cabo a ONGD Solidariedade Galega co cofinanciamento do Fondo nos municipios de Ocotal (Nueva Segovia) e Puerto Cabezas (Región Autónoma del Atlántico Norte). Eduardo J. Castro, que ten exposto en diferentes cidades españolas e estranxeiras, conviviu cos voluntarios e voluntarias e mais co pobo nicaraguano durante o tempo do proxecto. O resultado son máis de 50 imaxes, tanto en cor como en branco e negro, que reflicten dun xeito sutil e artístico non só as actividades realizadas pola ONGD, senón tamén a problemática sanitaria e social dos mergulladores, así como a cultura e a sociedade do país centroamericano. A exposición pode visitarse en horario de 18.00 a 21.00 horas no andar -1 do Pazo da Cultura. Estiveron presentes na inauguración da mostra o Alcalde de Carballo, Evencio Ferrero; a Concelleira de Benestar, Silvana Castro; e a de Cultura, Mar Eirís.
NO PAVILLÓN DA ZONA ESCOLAR O SÁBADO 5 DE MAIO
Xoves 3 de maio do 2012
As xogadoras do Xiria Gestiber de voleibol pelexan o sábado 5 de maio na Fase interprovincial para tentar acadar un dos dous postos que da acceso a disputar a eliminatoria polo ascenso á Liga Galega Infantil Feminina deste deporte. A cita é no Pavillón da Zona Escolar (Vila de Noia), no que o Xiria, que xa é campión provincial, deberá enfrontarse ao C Vigo Voleibol (campión de Pontevedra) nunha das semifinais ás 12.30 horas, mentres que no outro encontro ás 10.30 horas loitarán pola final o CV Liceo La Paz (subcampión coruñés) e o CV Pontevedra (subcampión de Pontevedra). Está previsto que as gañadoras destes encontros disputen o partido decisivo a partires das 18.30 horas. O encontro polo 3º e 4º posto ou final de consolación celébrase ás 16.30 horas. O adestrador do equipo carballés, Rosalino Mariño, que presentou esta cita xunto co Alcalde de Carballo, Evencio Ferrero, e o Concelleiro de Deporte, Marcos Trigo, asegura que o obxectivo é acadar a final, xa que o segundo posto tamén da dereito a loitar pola Liga Galega. Mariño mostrou confianza nas posibilidades do seu equipo, especialmente coa axuda do público carballés ao tratarse das anfitrionas. A participación na Liga Galega, na que compiten dez clubs, devolvería as categorías inferiores do voleibol carballés á elite deste deporte en Galicia.
A DECISIÓN TOMOUSE POR UNANIMIDADE NO PLENO DE MARZO
Sábado 28 de abril do 2012
A Praza do recinto Fórum Carballo é a partires de hoxe a Praza dos Bombeiros Voluntarios. Nun emotivo acto que contou coa presenza de representantes das corporacións carballesa, larachesa e malpicana, así como dos propios Bombeiros Voluntarios e familiares e amigos dos que non están, descubriuse unha placa na que figura o nome de todos eles, trece persoas, en verbas do Alcalde, Evencio Ferrero, que foron "pioneiras no traballo a favor da seguridade da xente": Ricardo Vilas Otero, Basilio Fraga Suárez, Juan Manuel González Regueira, José Antonio Porteiro García, José Manuel Lavandeira Lorenzo, Pedro Manuel González Porteiro, Joaquín de las Heras Medina, Celestino Alonso García, José Cameán Cotelo, Manuel de las Heras Medina, Eulogio Dubra Cabeza, Juan Manuel López Reyes e José Manuel Casal López. Ricardo Vilas falou no seu nome, lembrando que a historia dos voluntarios comezou nos anos 75 e 76 cando houbo unha serie de incendios na vila carballesa. Deuse a coincidencia de que sempre aparecían as mesmas persoas para apagar os lumes, polo que ao final trece deles se constituíron nun grupo que traballaba regularmente, non só na extinción de incendios, senón tamén axudando en accidentes de tráfico ou en labores de salvamento e socorrismo nos areais coa axuda "dunha corda e un flotador", "constituíndo a semente do que hoxe é Protección Civil".
_(535_x_143_px).jpg)
