DO 20 AO 28 DE OUTUBRO
Xoves 11 de outubro do 2012
Carballo acolle do sábado 20 ao domingo 28 de outubro o IV Campionato Galego Absoluto de Pádel para categorías masculina e feminina convocado pola Federación Galega. O Club Padel 3D3 -que botou a andar o pasado mes de agosto e que ten as súas instalacións na rúa Cobre do parque empresarial de Bértoa- é o encargado de acoller a proba "máis importante" do calendario, en verbas do presidente da Federación, Manuel Fernández Prado, e que concede o número máximo de puntos aos xogadores para o ranking galego. Fernández Prado subliña que as instalacións carballesas "son das mellores, con pistas adaptadas para xogar por ambos lados", o que aumenta a espectacularidade dos encontros. Engade que está prevista a presenza de entre 300 e 400 xogadores entre os que se atopan os Top 20 de Galicia, así como un gran número de participantes que por primeira vez se inscriben nunha proba federada. Tamén se espera a presenza de campións galegos de edicións anteriores como Borja Yribarren, Ignacio Otero, Carmen León e Vanesa Alonso. A inscrición custa 15 euros por xogador e está previsto que os partidos se celebren de luns a venres a partires das 19.00 horas e sábados e domingos ininterrompidamente de 9.00 a 22.00 horas. O presidente da Federación subliña o interese de escoller a 3D3 como anfitrións da proba para darlle pulo a un club recén creado, con modernas instalacións e cunha grande predisposición a organizar a cita.
VENRES 12 DE OUTUBRO NOS PAVILLÓNS MUNICIPAIS
Mércores 10 de outubro do 2012
Carballo acolle o venres 12 de outubro a celebración do VIII Torneo Festas do Pilar de Baloncesto, todo un clásico e un dos torneos de básket máis antigos, non só de Carballo, senón de Galicia. Esta oitava edición chega con importantes novidades, sendo a primeira delas a do número de clubs participantes, que chega ata oito. Nas dúas pistas municipais carballesas dos Pavillóns Vila de Noia (Zona Escolar) e Carballo Calero (Zona Bergantiños) estarán xogadores dos dous clubes da vila, Carballo Básket e CB Artai, así como do ACB Costa da Morte, do Maristas da Coruña, do Básquet Coruña, do CB Laracha, do Obradoiro de Santiago e das Escolas Deportivas Municipais da Laracha. Joaquín Moreira, presidente do Artai, explica que a demanda de clubs que quixeron participar no torneo foi especialmente elevada este ano debido ao retraso no comezo da competición a nivel galego, o que fai que os equipos teñan moitos desexos de asistir. De feito, dous clubs tiveron que quedarse fóra. Outra das novidades deste ano é que no Pavillón Vila de Noia a competición desenvolverase de forma ininterrompida de 10.00 a 20.00 horas. Está previsto que se disputen 26 encontros cunha participación aproximada de entre 250 e 300 xogadores.
XOVES 11 E VENRES 12 DE OUTUBRO ÁS 21.00 HORAS
Martes 9 de outubro do 2012
Unha proposta "con visos de comedia pero que fala de algo bastante serio, como é o mercado laboral". Así resume Artur Trillo, director de Talía Teatro e un dos protagonistas do espectáculo, unha das claves de "O método Gronhölm", o texto que a compañía de Cee estrea no FIOT 2012 cunha dobre función: xoves 11 e venres 12 de outubro ás 21.00 horas. A obra do coñecido dramaturgo Jordi Galcerán "deixa ver as entrañas das grandes empresas" e reflexiona sobre as normas da sociedade "explicando ata onde podemos chegar para obter un posto de traballo", un tema de plena actualidade. Trillo lembra que Talía xa ten adaptado dous textos de Galcerán, "Dakota" e "Palabras encadeadas" -que no seu momento visitaron Carballo- e recoñece que son "uns adictos" ao seu traballo. Enfrontan os textos deste autor catalán "coma un xogo", ao igual que "o espectador ten que interpretar moitas veces o texto e entrar nese mesmo xogo". "O método Gronhölm" é a segunda coprodución teatral do FIOT, despois de "Un cranio furado" en 2010, e o presidente da Asociación Cultural Telón e Aparte, Alberto Sueiro, asegura que "conta con todos os ingredientes para ser un éxito". "Nós así o esperamos", engade, "e desexamos que cheguen polo menos a 90 ou 95 funcións e que consigan moitos premios". Trillo e Sueiro presentaron a nova coprodución do FIOT nunha rolda de prensa na que estiveron o resto dos protagonistas de "O método Gronhölm", Toño Casais, Dani Trillo e María Ordóñez, así como o Alcalde de Carballo, Evencio Ferrero.
O IMPORTE ROLDA OS 90.000 EUROS
Luns 8 de outubro do 2012
A Xunta de Goberno Local, reunida en sesión ordinaria e fóra dos asuntos recollidos na orde do día, vén de aprobar a adxudicación da Transformación da rede unitaria do polígono industrial de Bértoa en separativa de fecais e pluviais, unha actuación que afecta á primeira fase xa desenvolvida do parque empresarial e que está financiada na súa maioría por fondos Feder (Fondo Europeo de Desenvolvemento Rexional). O prezo de adxudicación, que recaeu en Construcciones Alejandro Martínez e Hijos, é de 89.873 euros, cunha baixa de máis de 35.000 euros sobre o prezo de licitación (de 125.644,80 €, sen IVE). Con esta actuación, a segunda deste tipo que se realiza na zona xa construída e en marcha do polígono industrial, ofrécese servizo ao 80 por cento desta primeira fase, quedando tan só un 20 por cento para unha futura actuación. No apartado de contratación, tamén recibiu o visto e prace o expediente para o contrato de subministro por renting (arrendamento sen opción de compra e na modalidade de pago por páxina) para a "Implantación dun servizo integral de impresión no Concello de Carballo". O prezo sería de 77.000 euros con IVE (o valor estimado do contrato por mes sería de 1.604,17 euros con IVE) por unha duración de catro anos, con pagos divididos en 48 mensualidades. O procedemento será aberto con varios criterios de adxudicación.
DOMINGO 7 DE OUTUBRO ÁS 21.00 HORAS
Mércores 3 de outubro do 2012
A compañía vasca Tantakka Teatroa regresa ao Festival Internacional Outono de Teatro seis anos despois do éxito acadado con "El Florido Pensil", que en 2006 lle valeu o Premio do Público en recoñecemento á calidade do seu traballo. O galardón seralle entregado o domingo 7 de outubro, aproveitando a súa estadía en Carballo, xusto antes do comezo da función de "Contra el viento del norte" (21.00 horas). "Contra el viento del norte" é unha adaptación da exitosa novela do austríaco Daniel Glattauer, traducida xa a 37 idiomas, que na súa versión teatral aborda o impacto das novas tecnoloxías nas relacións persoais con boas doses de humor e de ironía sen esquecer a inmediatez que ofrece Internet. Durante hora e media, os protagonistas Itziar Atienza (Emmi Rothner, unha muller casada que busca renovar a súa paixón), Joseba Apaolaza (Leo Leike, un lingüista solitario, pero con especial sentido do humor) e Pablo Viña (Bernhard Rothner, o marido que intenta recuperar á súa muller) forman un triángulo amoroso "virtual" recreando en clave contemporánea unha relación romántica epistolar que comeza de maneira fortuíta a causa dun correo electrónico enviado a un destinatario erróneo. Aínda hai entradas para asistir a este espectáculo na plataforma www.servinova.es e no 902 504 500 ata o día antes da función. Logo, se non se esgotaron, é posible adquirilas no despacho de billetes do Pazo da Cultura o mesmo día da obra de 19.30 a 21.00 horas.
ENTRE O XOVES 4 E O SÁBADO 13 DE OUTUBRO
Martes 2 de outubro do 2012
14 espectáculos en 14 espazos non teatrais para 14 anos. A Rúa dos Contos, xa un festival con vida propia dentro do Outono de Teatro (FIOT), é unha das actividades máis queridas polo público do Festival. Un ano máis, congrega a artistas coñecidos e tamén novos valores nun popular programa que, xunto a contos, historias e monólogos, ofrece espectáculos de pequeno formato, clown, música, maxia, performances musicais, novo circo e ata un chisco de cabaret. Tres dos artistas incluso escolleron o FIOT para a súa estrea, como é o caso de RedRum Producciones que abre a programación preestreando na Vinoteca La de Bur "Curriculum Vitae" o xoves 4 de outubro ás 21.00 horas. Tamén aproveitan o marco da Rúa dos Contos para presentar o seu espectáculo Antón Coucheiro, que o sábado 6 ofrece ás 22.00 horas no Bodegón O'Pescador "Hola, veño do futuro"; ou Produccións Teatrais Excéntricas, con Evaristo Calvo e Piti Sanz en "Aprende a ser feliz", en Cafetería A Bombonera o xoves 11 ás 23.30 horas. Entre as historias non faltan as máis propias do "convulso século XXI": retratos de situacións tan actuais como as entrevistas laborais, visións apocalípticas da nosa decadencia, "remedios" máxicos para ser feliz en calquera momento, filosofía en estado puro para os novos tempos, inovadoras técnicas de supervivencia como o control mental... Todo entre o xoves 4 e o sábado 13 de outubro.
DISPOÑIBLES TICKETS PARA O RESTO DAS OBRAS DO AUDITORIO E OTNI
Luns 1 de outubro do 2012
De novo, como ocorrera cos bonos para a XXI edición do FIOT 2012 (Festival Internacional Outono de Teatro), esgotáronse rapidamente os Minibonos A e B que se puxeron á venda (a través da plataforma <www.servinova.es>, e tamén no teléfono 902 504 500) a partir das 9.00 horas do luns 1 de outubro para asistir aos espectáculos de sala do auditorio do Pazo da Cultura. O Minibono A da dereito a acceder ás citas do 7 -"Contra el viento del Norte", Tantakka Teatroa-, 12 -"O método Gronhölm", Talía Teatro-, 13 -"En alta mar", La Machina Teatro- e 19 de outubro -"El Montaplatos", Animalario Teatro-. O Minibono B correspóndese coas citas do 20 -"A función do tequila", Teatro do Morcego-, 21 -"Juicio a una zorra", Kamikace Producciones-, 26 -"Acto cultural", Grupo Actoral 80-, 27 -"Viaxe a ningunha parte", Sarabela Teatro- e 31 de outubro -"El Nacional", de Els Joglars. No que respecta ás entradas soltas, xa están tamén esgotados os tickets para ver a Els Joglars, así como para desfrutar da actuación de Carmen Machi en "Juicio a una zorra". Porén, todavía hai entradas soltas dispoñibles para o resto dos espectáculos do festival, así como para as tres propostas do ciclo OTNI, que teñen lugar o 14, 25 e 28 de outubro. Seguen á venda na plataforma www.servinova.es e no 902 504 500 ata que se esgoten ou ata o día antes da función. Logo, é posible adquirilas no despacho de billetes do Pazo da Cultura o mesmo día da obra de 19.30 a 21.00 horas.
ENTRE O 27 E O 30 DE SETEMBRO NA CONTORNA DA RÚA PERÚ
Venres 28 de setembro do 2012
A terceira edición da Oktoberfest abriu onte as súas portas ofrecendo as primeiras doses de cervexa, comida bávara e actuacións musicais. Á inauguración oficial asistiron, ademais do Alcalde, Evencio Ferrero, numerosos membros da corporación, así como veciños e veciñas que dende as 19.30 horas do xoves desfrutaron dunha cita que tamén está o venres 28, o sábado 29 e o domingo 30 de setembro nunha carpa climatizada na explanada da rúa Perú, detrás da antiga estación de autobuses. Para beber as primeiras cervexas, acompañaron ao Alcalde o Concelleiro de Promoción Económica, Xose Regueira, a Tenente de Alcalde, Milagros Lantes, ou os concelleiros Marga Varela, Aurelio Núñez ou Juan Carlos Castro. Durante a inauguración a música correu a cargo de Os Revenidos e un dj, pero as actuacións seguen con Stoner Hill, o grupo carballés Versión Imposible, a banda coruñesa de pop-rock Los Mecánicos, os laxenses O tren da unha, The Gentleman Band e Djs Bogaboga para pechar as noites do venres e do sábado. Respecto da cervexa, cuxa presenza na cita é fundamental, hai Paulaner con e sen alcohol, así como refrescos de todo tipo e augas. Hai que mencionar que, dende os seus comezos, a marca de cervexa Paulaner ten estado ligada á celebración deste festival. Ademais, os asistentes poderán levar á casa ou alugar unha orixinal xerra de Paulaner por tres euros.
VALERIA GÓMEZ GAÑOU DOUS OUROS EN CATEGORÍA CADETE
Venres 28 de setembro do 2012
O Alcalde de Carballo, Evencio Ferrero, acompañado do Concelleiro de Deporte, Marcos Trigo, recibiu na Casa do Concello a representantes do Club Sysca polos bos resultados deportivos acadados nos últimos tempos polas Escolas da entidade. Así, Valeria Gómez Anido vén de proclamarse Campioa de España cadete nas categorías sprint praia e bandeiras e Adrián Martínez Cotelo, medalla de bronce tamén como cadete, aínda que o seu rendemento puido ser aínda maior ao sufrires unha rotura de fibras durante os últimos lances da competición. Os dous o fixeron no certame celebrado recentemente en Villajollosa (Alicante). Ademais, Valeria foi convocada a Madrid pola Federación Española de Socorrismo para realizar algúns adestramentos, e dende a entidade confían en que sexa chamada a participar nalgún campionato. Os responsables do Club queren subliñar o traballo de todos os membros do equipo porque, "moi poucos pasan o corte para poder asistir ao Campionato de España", en verbas do presidente do Sysca, Pedro Lantes. Así mesmo, Óscar Vázquez Abelenda, adestrador das Escolas xunto coa súa irmá, Noelia Vázquez Abelenda, quixo resaltar "o bo rollo" existente entre todos os integrantes do equipo e o apoio que recibiron Valeria e Adrián dos seus compañeiros despois dos seus éxitos. Ferrero quixo felicitar a todos os rapaces e rapazas das Escolas do Sysca porque "están moi ben os éxitos individuais, pero tamén é moi importante o espírito de equipo e de solidariedade".
INSCRICIÓNS ATÉ O MÉRCORES 10 DE OUTUBRO
Mércores 26 de setembro do 2012
O Centro Municipal de Formación do Concello de Carballo informa de que a Dirección Xeral de Formación e Colocación convoca as probas de avaliación en competencias clave para acceder ás accións formativas dos novos Certificados de Profesionalidade de nivel 2 de cualificación dentro da Formación Profesional para o emprego na Comunidade Autónoma de Galicia (publicado no DOG núm. 181 do venres 21 de setembro de 2012). Estas probas están dirixidas a traballadores e traballadoras desempregados e /ou ocupados que desexen optar nun futuro a Cursos de Formación Profesional para o emprego de Nivel 2, é dicir aquela formación onde se requira para poder participar a titulación mínima da Educación Secundaria Obrigatoria (ESO). As persoas interesadas deben entregar perfectamente cuberto o Anexo I, recollido na orde e tamén descargable nesta mesma nova, até o mércores 10 de outubro, e acudir o sábado 24 de novembro aos correspondentes exames que poden ser de lingua galega, lingua castelán, matemáticas, dixital, tecnoloxía, inglés e ciencia. Está previsto que os exames teñan lugar no Recinto Feiral de Silleda. Para máis información, os interesados e interesadas poden chamar ao Servizo de Orientación Laboral situado no Fórum Carballo (Rúa Xílgaros, s/n en Carballo) ou ben chamar ao 981 755 211 / 981 709 011 e preguntar por Milagros Antelo ou Mª Dolores Serrano.
A PRÓXIMA XUNTANZA ESTÁ PREVISTA PARA O 11 DE OUTUBRO
Mércores 26 de setembro do 2012
A Comisión de Urbanismo vén de manter unha nova xuntanza de traballo na que os asistentes centráronse en examinar as propostas presentadas polos diferentes grupos políticos para realizar achegas ou modificacións no tramado do núcleo urbano carballés incluído na documentación para a aprobación inicial do novo Plan Xeral de Ordenación Municipal (PXOM). Segundo explica a Concelleira de Urbanismo e Planificación Urbana, Milagros Lantes, o grupo de goberno coincidiu na gran maioría das apreciacións reflectidas no informe elaborado polo arquitecto municipal, a meirande parte relacionadas con cuestións técnicas. Así mesmo, o resto dos grupos expuxeron algunhas das súas propostas, aínda que outros lles farán chegar outras novas ao equipo redactor nos próximos días. O debate sobre a supresión dalgunhas vías ou a creación doutras novas centrou parte da xuntanza. Acordouse a celebración dunha nova comisión o xoves 11 de outubro, cando o equipo redactor expoñerá se as recomendacións dos distintos grupos poderán ser incluídas no planeamento. Así mesmo, nesa xuntanza principiarase coa análise do medio rural. A cita estivo presidida polo Alcalde de Carballo, Evencio Ferrero, e contou coa presenza, ademais de Lantes, do arquitecto municipal e de membros do equipo redactor, do Concelleiro de Medio Ambiente, Marcos Trigo; do Concelleiro de Obras e Servizos, Luís Lamas; dos concelleiros Alberto Sueiro e Juan Carlos Castro polo PP; de Manuel Andrade por TEGA; e de José Antonio Viña polo PSOE.
O ALCALDE RECIBIU A GRACIELA MICHELINI, XERENTE DO ORGANISMO
Martes 25 de setembro do 2012
O Alcalde de Carballo, Evencio Ferrero, vén de recibir na Casa do Concello a Graciela Michelini, coordinadora xeral do Museo do Carnaval de Montevideo, que visita Galicia por primeira vez para divulgar o labor desta institución que conserva, exhibe, difunde e valora os obxectos e tradicións que forman parte da máxima festa popular do Uruguai. Despois dun intercambio de agasallos, a maioría libros, Ferrero e Michelini asinaron un protocolo de colaboración entre o Concello e o Museo para desenvolver no futuro actividades conxuntas e realizar intercambios de información entre as dúas institucións. Michelini explicoulle ao rexedor as claves do labor no Museo, xestionado a través dun fideicomiso, e que conta cun total de nove traballadores sendo Michelini a responsable da xerencia. Para describir a importancia do Carnaval uruguaio, Michelini subliña que "reúne máis xente en 45 días que o fútbol en todo o ano". O Museo pretende fortalecer aínda máis a participación social na festa. Desa forma sae á rúa para relacionarse coa cidadanía e traballar nos barrios máis desfavorecidos, mantendo o Carnaval como algo vivo e contribuíndo a xerar a idea de que "a cultura tamén é unha parte importante para o desenvolvemento". O Alcalde interesouse por aspectos concretos do traballo no Museo, un labor eminentemente práctico xa que os datos recompilados logo atopan aplicación na realización de obradoiros e actividades, aproximando os achados á cidadanía.
_(535_x_143_px).jpg)
