A PREVISIÓN DAS CONTAS PARA 2013 ROLDA OS 21 MILLÓNS
Venres 15 de febreiro do 2013
O avance da liquidación do orzamento de Carballo do exercicio de 2012, xunto cos números do remanente de tesourería derivados dese período ofrecen un resultado orzamentario de 3.698.658,01 euros, así como un remanente de tesourería positivo para gastos xerais de 5.069.501,70 euros, o máis alto da historia do Concello. Así o explican a Concelleira de Facenda, Belén Lendoiro, e o Alcalde de Carballo, Evencio Ferrero, que subliñan que estes datos "amosan a boa situación económica" do municipio, en verbas de Lendoiro, e que os axustes do ano 2012 foron algo "conxuntural", a causa da liquidación do orzamento de 2011, que contou cun remanente de tesourería negativo de 1.801.326,55 euros debido a que os fondos europeos FEDER non ingresaran os 2.798.717,77 euros polas obras do Fórum Carballo, pagamento que finalmente se formalizou o 31 de decembro de 2012. Segundo Lendoiro, as directrices tomadas polo goberno en 2012, insistindo na "prudencia" e no "control rigoroso" do gasto son a causa desta boa situación, na que a carga financeira -tamén a 31 de decembro- reflicte unha débeda de 3.667.616 euros. O Alcalde non quixo facer "manifestacións triunfalistas" polos cinco millóns do remanente, mais salientou a "transparencia" das contas e que "Carballo ten diante un horizonte diáfano", xa que "se todas as administracións do Estado presentasen os mesmos datos, o panorama sería ben distinto".
ABORDARON UN POSIBLE CAMBIO NA ORDENANZA DE DEPURACIÓN
Mércores 13 de febreiro do 2013
Os voceiros de todos os grupos políticos con representación na corporación veñen de manter unha xuntanza na que abordaron varios asuntos relacionados coa actualizade municipal. Estiveron na reunión o Alcalde, Evencio Ferrero, polo BNG; Alberto Sueiro, polo PP; Manuel Andrade, en representación de TEGA; e José Antonio Viña, polo PSOE. Entre os acordos acadados, hai que subliñar o de elaborar unha moción conxunta en defensa da permanencia da base do Grumir (Grupo Municipal de Intervención Rápida) de Carballo. Así, segundo a nova reordenación dos servizos de emerxencias prevista pola Xunta, desaparecerían os actuais Grumir existentes na Costa da Morte en Carballo, Vimianzo e Cee para crearse unha única base en Ponteceso. Este novo servizo único cubriría todo o territorio, unha distribución que algúns dos implicados consideran insuficiente para atender as necesidades da poboación da comarca. Así mesmo, acordouse o texto definitivo dunha moción a prol dos afectados polas participacións preferentes e obrigacións subordinadas. Así, a Plataforma de afectados compareceu no último pleno da corporación para expoñer a súa situación e naquel momento todos os grupos estiveron dacordo en explicitar o seu apoio a través dunha moción que será aprobada no próximo pleno.
O EXÉRCITO DE "DANZATEKA" ACADOU O SEGUNDO PREMIO
Luns 11 de febreiro do 2013
Preto de 600 persoas participaron o domingo 10 de xaneiro no Concurso e desfile de disfraces, comparsas e carrozas do Antroido 2013, que debido ás condicións meteorolóxicas adversas -con vento, saraiba e choiva durante toda a tarde- tivo lugar no Pavillón polideportivo Carballo Calero da Zona Bergantiños. Pitufos, piratas, pitiños, elefantes, vampiros, revolucionarios e ata a mesmísima Raíña Isabel de Inglaterra encheron o recinto que se quedou pequeno para acoller ao elevado número de público que quixo acceder ás bancadas. Como cada ano, resultou difícil determinar os gañadores en cada categoría, especialmente na de carrozas, xa que os participantes tiveron que deixalas fóra do pavillón debido ás súas grandes dimensións. Porén, finalmente o gañador foi un grupo de Sofán con "Xara e sedal. Casa en Botswana" (1º premio con 450 €, na imaxe), unha proposta coa que representaron con moita retranca e humor a accidentada viaxe da súa maxestade o Rei Don Juan Carlos ao país africano, con perdón incluído. O 2º premio (295 €) foi para "Danzateka" de Vimianzo, que contaba con máis de 100 membros dos exércitos de terra, mar e aire. Ademais, o xurado concedeu un accesit a "Os British da raíña", un grupo "moi inglés" chegado da Coruña.
OUTÓRGASE UN GALARDÓN DE 1.000 EUROS
Luns 11 de febreiro do 2013
O Concello de Carballo, desde o seu Servizo de Normalización Lingüística (SNL) e en colaboración cunha ducia de medios de comunicación, convoca o IX Premio a artigos xornalísticos normalizadores, un certame xa consolidado que ten como obxectivos promover a reflexión sobre a situación social da lingua galega, crear espazos nos xornais para analizar e fomentar o uso e prestixio do idioma galego e promover o seu uso na prensa. Ao certame pódense presentar artigos xornalísticos inéditos de opinión que traten algún tema concreto relacionado coa situación sociolingüística do noso país, co fomento da lingua galega, co seu estatus, co argumentario a prol do uso do galego, coa lexislación e os dereitos lingüísticos, con experiencias sociolingüísticas concretas, con propostas para o impulso do uso e prestixio social do galego, con experiencias útiles ou favorables para a dinamización da lingua, coa política lingüística en xeral ou nalgún ámbito ou situación determinada, etc. Os artigos deberán ter entre 1.800 e 3.300 caracteres con espazos incluídos. O prazo de admisión está aberto ata o 11 de abril de 2013. Outorgarase un premio económico ao artigo gañador, dotado con 1.000 euros, ademais da difusión nos doce medios colaboradores coa iniciativa.
O CONCELLO FOMENTA UN SERVIZO DE RECOLLIDA DE ROUPA USADA
Luns 11 de febreiro do 2013
A Xunta de Goberno Local reunida en sesión ordinaria vén de aprobar o expediente de contratación para a "Limpeza de Colexios Públicos de Ensino Infantil e Primaria do Concello de Carballo". A proposta conta cun orzamento de adxudicación por contrata de 299.999,99 euros (IVE engadido) por un período inicial de 4 anos sendo o custo anual previsto de 75.000 euros coa posibilidade de dúas prórrogas dun ano cada unha. Os criterios de adxudicación previstos son a proposta técnica e organizativa recollida na memoria e as melloras sobre a proposta dos pregos, así como a oferta económica, o número de horas de atención para o servizo de limpeza e o mellor prezo por hora. Tamén no apartado de contratación, e fóra da orde do día, a sesión supuxo a aprobación do Contrato privado de arrendamento do local destinado a bar-cafetería no Mercado de Carballo, que xa ten sido adxudicado á única oferta presentada. A Xunta de Goberno aprobou, así mesmo, un Convenio de colaboración entre o Concello e Humana Fundación Pueblo para Pueblo para o fomento da reciclaxe e o comportamento sostible. O obxectivo do acordo é o de poñer en marcha un servizo de recollida selectiva de roupa usada poñendo a disposición dos veciños e veciñas colectores específicamente destinados a este fin.
DOMINGO 10 DE FEBREIRO A PARTIR DAS 18.00 HORAS
Venres 8 de febreiro do 2013
O domingo 10 de febreiro ás 18.00 horas ten lugar unha das actividades máis importantes e esperadas do Antroido en Carballo, o tradicional Concurso e desfile de disfraces, comparsas e carrozas, unha cita que cada ano congrega a numeroso público que segue as evolucións dos participantes polo centro da vila. En caso de que as condicións meteorolóxicas o permitan, o percorrido transcorrerá polas rúas Coruña, Desiderio Varela, Gran Vía, Rúa do Lagarto, Valle Inclán e Colón, rematando no palco da Praza do Concello. Porén, e dado que este ano as prediccións avanzan choiva para o domingo pola tarde, a organización quere lembrar que ten a facultade de suspender ou trasladar o desfile ao Pavillón Polideportivo Bergantiños. No caso de traslado, poderanse ver afectadas para o acceso a este recinto as carrozas que sobrepasen as dimensións de 2,65 x 2,65 metros. Unha vez rematado o venres 8 o primeiro prazo de inscrición, o total de anotados para participar na edición deste ano ascende a 9 carrozas, 9 comparsas da categoría infantil e 5 comparsas de adultos. Con todo, hai que lembrar que estes datos non son definitivos, xa que para a maioría das modalidades o prazo para anotarse remata o mesmo día do desfile ás 17.00 horas, que é, por exemplo, cando se formalizan a maioría das inscricións para grupos e individual.
AS MELLORAS NO CEIP GÁNDARA-SOFÁN REALIZARANSE EN SEMANA SANTA
Xoves 7 de febreiro do 2013
O Alcalde de Carballo, Evencio Ferrero, acompañado do director do CEIP Gándara-Sofán, Mariano Dopico, e de dúas representantes da Asociación de Nais e Pais de Alumnos (ANPA) do centro (na imaxe) vén de manter unha entrevista co Xefe Territorial de Educación, Indalecio Cabana Leira, na que se lle expuxeron varias demandas para o colexio de Sofán, pero tamén para outros centros do municipio. Así, o rexedor relatou as deficiencias na cobertura de Internet nos CEIP do medio rural, non só no Gándara-Sofán, senón tamén noutros colexios carballeses, que ven limitada a súa conexión. A Xefatura Territorial comprometeuse a estudar estas deficiencias. No que respecta ao centro de Sofán, Cabana Leira confirmou que durante as vacacións de Semana Santa, a finais do mes de marzo, desenvolveranse as obras de mellora no colexio, que consistirán na creación dunha nova aula de Educación Infantil na planta baixa trasladando o despacho de dirección e a conserxería. Estas melloras acordáronse durante unha visita do Xefe Territorial realizada no mes de novembro, na que a Consellería de Educación se comprometeu a encargarse destas obras. O Concello, en cambio, asumiu nesa cita a creación de novos aseos adaptados na planta baixa, traballos rematados dende antes de Nadal.
PRESENTADAS UN TOTAL DE 42 ALEGACIÓNS AO PLANEAMENTO
Xoves 7 de febreiro do 2013
Dende que o documento para aprobación inicial do PXOM (Plan Xeral de Ordenación Municipal) de Carballo está exposto na páxina web municipal téñense rexistrado un total de 2.629 visitas de 1.359 usuarios e usuarias distintos, o que supón unha media aproximada de 69 visitantes diarios xerándose un tráfico de 360 gigabytes nos 20 días que leva a disposición dos veciños e veciñas a través de Internet. Así, durante o mes de xaneiro contabilizáronse un total de 2.144 visitas, mentres que en febreiro xa son 485. O tomo do planeamento máis demandado é o VII.b. que contén os planos de ordenación para os núcleos rurais, ademais do V., o referido aos planos de información urbanística. O interese espertado polo planeamento tamén se reflicte na procedencia das consultas realizadas, xa que ademais de España -dende lugares como Vitigudino, Xaén, Madrid, Barcelona, Lepe ou Cambrils- constan visitas dende países como EE.UU, Kuwait, China, Xapón, Francia ou Suiza. Respecto da rolda de 13 xuntanzas realizadas en distintos puntos das parroquias para estender a información do PXOM a todo o municipio, arredor de 1.100 persoas asistiron a estas reunións cos técnicos e representantes do goberno local. A Concelleira de Urbanismo, Milagros Lantes, realiza un balance positivo destas citas, "nas que a xente participou e puido expresar a súa opinión".
O ALUGUER SERÁ GRATUÍTO E POR UN PRAZO DE 20 ANOS
Mércores 6 de febreiro do 2013
A Xunta de Galicia, a través da Secretaría Xeral Técnica e do Patrimonio, acaba de informar de que acepta a oferta presentada polo Concello de Carballo de trasladar as dependencias na vila da Oficina de Emprego (da Consellería de Traballo e Benestar) e das consellerías de Medio Rural e Mar e de Medio Ambiente, Territorio e Infraestruturas (neste último caso con seis persoas do distrito ambiental II do Servizo de Conservación da Natureza) ao complexo Fórum Carballo. Nun escrito con rexistro de entrada do 6 de febreiro, Patrimonio explica que as tres consellerías implicadas informaron favorablemente a realización dos distintos trámites para adquirir un dereito de uso sobre os espazos do edificio (na planta baixa e andar 1 da nave 2 do Fórum) onde xa están situadas as oficinas do Centro Municipal de Formación e do servizo de Orientación Laboral do Concello. A Xunta solicita formalmente a cesión de uso, ou no seu caso, concesión por un período mínimo de 20 anos -prorrogables- para poder desenvolver as actividades administrativas relativas aos departamentos citados no Fórum. A pesar de que, segundo a oferta, o aluguer sería gratuíto durante ese período, tamén se solicita información sobre os gastos ordinarios de auga, luz, calefacción e similares derivados da ocupación do edificio, que son os que deberá asumir a Xunta.
ENTREVISTAS PERSOAIS: VENRES 8 DE FEBREIRO
Mércores 6 de febreiro do 2013
Un total de 20 persoas, das que 16 son de Carballo e outras 4 de concellos veciños da comarca de Bergantiños como Coristanco, A Laracha e Malpica, están inscritas para participar nalgún dos catro módulos do Plan de Formación integral do Fórum Carballo organizado pola Concellaría de Promoción Económica que dirixe Xosé Regueira. Á hora de admitir ás persoas interesadas terán prioridade aquelas que estean empadroadas do municipio, aínda que o máis probable é que as persoas de fóra de Carballo poidan beneficiarse da formación ofrecida nos módulos como oíntes. Así mesmo, os inscritos deben superar unha entrevista persoal prevista para o venres 8 de febreiro no Fórum Carballo e na que se valorará e estudará o proxecto proposto polo solicitante, xa que as accións formativas están dirixidos a emprendedores en situación de desemprego que conten cunha idea de negocio empresarial ou comercial que queiran poñer en marcha. Os módulos, de carácter gratuíto, supoñen un total de 140 horas de formación para empresarios e emprendedores co obxectivo de formar aos interesados e interesadas para que poidan facer o seu proxecto realidade e que conten con ferramentas para que a súa idea teña posibilidades de perdurar.
PODE CONTACTARSE CO SERVIZO NO TWITTER @CarballoLimpo
Martes 5 de febreiro do 2013
Nas últimas semanas vense de poñer en marcha un novo plan de limpeza por parte do programa Carballo Limpo dentro do cal están a intervir tanto a concesionaria da limpeza viaria Aspaber -UTE como a da recollida do lixo Urbaser UTE Carballo. Este traballo, que está sendo coordinado desde ás áreas de Servizos e Medio Ambiente do Concello que dirixen Luís Lamas e Marcos Trigo, está a complementar os labores habituais das concesionarias. Por parte de Aspaber, estanse a realizar lavados a presión das beirarrúas do casco urbano nas que hai acumulación de mofo e suciedade, téndose xa realizado accións no barrio da Milagrosa, rúa Montevideo, Vázquez de Parga, fonte da rúa do Sol e rúa Cervantes, labor que se alongará nos vindeiros días. Estes labores realízanse nas beirarrúas do rural cunha frecuencia dunhas tres veces ao ano, pero detectouse que algunhas das rúas da vila tamén o precisaban e por eso se decidiu realizar estas limpezas nesta época así mesmo na capital municipal. Polo seu lado, Urbaser ven de iniciar a primeira limpeza de colectores desde que iniciou a prestación do servizo de recollida de lixo, cometido que realizará tamén periodicamente ao longo do ano co obxectivo de evitar os malos olores.
INCLÚE A RAZO, BALDAIO, PEDRA DO SAL E AS SAÍÑAS
Luns 4 de febreiro do 2013
A Xefatura Territorial da Consellería de Sanidade da Xunta de Galicia informa de que a clasificación final da auga de todas as zonas de baño do Concello de Carballo para a tempada 2012 é "excelente". Esta clasificación, baseada nos datos microbiolóxicos recollidos ao longo de todo o ano 2012, inclúe os areais de Baldaio, Pedra do Sal, As Saíñas e Razo e pode consultarse a través do Sistema de Información Nacional de Augas de Baño ou Náyade na páxina web da Dirección Xeral de Innovación e Xestión da Saúde Pública, ou a través dun documento en pdf, premendo aquí. A través do Náyade analízase a presenza na auga de dous tipos de bacterias: escherichia coli e estreptococos fecais. No primeiro caso, para acadar a excelencia, de 10 análises realizadas, 8 deben estar por debaixo de 100 unidades formadoras de colonia por cada 100 mililitros. No segundo, de 10 análises, 9 deben estar por debaixo deses parámetros. Despois das mostras tomadas ao longo do ano pasado, todas as zonas de baño do Concello superan estes controis. Ademais, hai que lembrar que os areais das Saíñas e Pedra do Sal acadaron nos últimos anos a concesión da Banceira Azul, un distintivo que outorga a ONG Asociación de Educación Ambiental e do Consumidor (ADEAC) e que recoñece a calidade das praias, así como das súas augas, ademais dos servizos que ten dispoñibles.
_(535_x_143_px).jpg)
