O MARTES 16 A INICIATIVA VISITA O IES ALFREDO BRAÑAS
Xoves 11 de abril do 2013
O Alcalde de Carballo, Evencio Ferrero, o Concelleiro de Normalización Lingüística, Xosé Regueira, e o alumnado e profesorado do IES Isidro Parga Pondal da capital municipal veñen de sumarse á campaña "Gústame o galego" que pretende visibilizar o apoio individual de persoas ao proceso de normalización lingüística a través de fotos con frases suxestivas sobre o uso do galego en diversos ámbitos e situacións. De 10.00 a 13.00 horas rapaces e rapazas foron pasando por un pousadoiro no que plasmar a través dunha imaxe o sentir de cada un acerca do idioma. Os obxectivos desta acción son visibilizar e difundir o apoio de persoas a nivel individual ao proceso de normalización lingüística, favorecer que persoas de todo tipo e de todas as idades se impliquen e posicionen a prol do fomento do galego, provocar unha mínima reflexión sobre a necesidade de fomento do galego en distintos ámbitos e situacións e achegar tanto a espazos públicos como á rede e aos medios mensaxes favorables a prol da normalización lingüística en todos os ámbitos, e facéndoas visibles a través de persoas concretas. O Alcalde escolleu o lema "...que no deporte o galego non quede en fóra de xogo", mentres que Xosé Regueira optou por "...poder entenderme en galego con máis de 200 millóns de persoas".
XOVES 11 E MARTES 16 DE ABRIL
Mércores 10 de abril do 2013
"Gústame... que non me traduzan o café con leite". "Gústame... que intentes falar galego, aínda que che custe un pouquiño". "Gústame... o galego ata no carné de identidade". "Gústame... como empezan a falar galego @s pequerrech@s". Estas son algunhas das suxestivas frases coas que o alumnado e profesorado dos IES Parga Pondal -o xoves 11- e Alfredo Brañas -o martes 16 de abril- se poderán retratar para dicir que lles gusta o galego. "Gústame o galego" é unha campaña xeral de fomento da lingua coa que se visibiliza o apoio individual de persoas ao proceso de normalización lingüística a través de fotos con frases suxestivas sobre o uso do galego en diversos ámbitos e situacións. Os obxectivos desta acción son visibilizar e difundir o apoio de persoas a nivel individual ao proceso de normalización lingüística, favorecer que persoas de todo tipo e de todas as idades se impliquen e posicionen a prol do fomento do galego, provocar unha mínima reflexión sobre a necesidade de fomento do galego en distintos ámbitos e situacións e achegar tanto a espazos públicos como á rede e aos medios mensaxes favorables a prol da normalización lingüística en todos os ámbitos, e facéndoas visibles a través de persoas concretas.
PRIMEIRA CITA: SÁBADO 13 DE ABRIL ÁS 16.00 HORAS
Martes 9 de abril do 2013
Un ano máis, e xa van tres, o Club Ciclista Carballo organiza, coa colaboración do Concello de Carballo, o ciclo de rutas en bicicleta "Coñece o teu Concello", que percorre sobre dúas rodas os lugares máis emblemáticos do municipio co obxectivo de poñer en valor o seu patrimonio cultural e artístico, ademais de fomentar a práctica do deporte. "Congratulámonos de que o Club Ciclista aposte non só polo deporte, senón tamén por dar a coñecer o noso Concello", subliña o Concelleiro Marcos Trigo. As rutas transcorren entre o sábado 13 de abril e o domingo 19 de maio e contan cunha media de lonxitude de aproximadamente 20 quilómetros para facelas alcanzables a persoas de todas as idades a partir dos 10 anos. En anos anteriores a proposta ten acadado un notable éxito, cunha media de 50 participantes por ruta que fai que a cita teña continuidade cada primavera. Cada unha das rutas conta con paradas programadas en monumentos ou espazos de relevancia do municipio, como cruceiros, castros, igrexas ou espazos naturais. A primeira delas ten lugar o sábado 13 de abril. De 19 quilómetros de lonxitude e baixa dificultade, transcorre por Sísamo, Goiáns, Cances e Oza. Os interesados e interesadas en asistir tan só teñen que presentarse na Praza do Concello a partir das 16.00 horas.
O OBXECTIVO É AXUDAR AOS AFECTADOS POLOS DESAFIUZAMENTOS
Martes 9 de abril do 2013
A Comisión de Coordinación Social do Concello de Carballo vén de manter a súa terceira xuntanza, unha reunión de hora e media de duración na que se recompilaron os pasos que se teñen dado ata o momento para conseguir a creación dunha bolsa de vivenda municipal con alugueres reducidos destinada a axudar a aquelas persoas en dificultades a causa de situacións de desafiuzamento. A resposta das entidades bancarias para poñer a disposición desta bolsa as vivendas baleiras do municipio que están no seu poder ten sido escasa ou máis ben nula, obténdose tan só unha morna resposta dunha das que operan no municipio. Por este motivo, a comisión acordou que o Concello se adhira ao convenio marco da FEMP (Federación Española de Municipios e Provincias) para poder formar parte dunha bolsa que conte coa colaboración dos concellos de todo o estado. Este Fondo de Vivendas funcionaría grazas aos gobernos locais que elaboran os informes sobre a situación dos solicitantes e informan sobre o Fondo aos cidadáns. Con esto conseguiríase ter a disposición da futura bolsa carballesa un total de tres vivendas de tres entidades financeiras distintas. Porén, a comisión non abandona a idea de crear unha Bolsa de Vivenda independente, unicamente xestionada polo Concello, esperando a colaboración e a solidariedade dos veciños e veciñas.
ESTÚDASE A COLOCACIÓN DUNHA LONA XIGANTE COA CASA DE CHINTO
Venres 5 de abril do 2013
O pasado mes de xullo máis de 35 alumnos e alumnas da Escola Técnica Superior de Arquitectura (ETSA) da Universidade da Coruña (UDC) estiveron analizando o casco urbano carballés co obxecto de propoñer solucións para mellorar a capital municipal no marco do curso "Estratexias cidadás para os tempos da crise". Divididos en seis grupos, realizaron un interesante traballo de campo movéndose pola vila e intercambiando impresións cos veciños e veciñas para ofrecer propostas e solucións que se plasmaron en forma de conclusións en outros seis traballos: "Invasión", "Carballando", "Espazos mixtos", "Quedamos na lembranza", "Ocúpame" e "Outra realidade". Agora estas seis propostas toman forma nun libro editado pola ETSA coa colaboración do Concello e Conservas Calvo que leva o título das xornadas e que recompila toda a interesante información e traballo que se realizou durante unha semana no Fórum Carballo e nas rúas da vila. Cristóbal Crespo, profesor da ETSA e coordinador do curso, lembrou durante a presentación deste libro algunhas das orixinais ideas xurdidas durante o que denominou unha gran "tormenta de ideas", como a creación dunha rede ficticia de metro en lugares sinalados do casco urbano para poñelos en valor, recuperar a historia da cidade ou cubrir as feas medianeiras do centro con imaxes do Carballo de hai 50 ou 60 anos.
A CITA SERÁ NO AUDITORIO DE GALICIA EN SANTIAGO O 4 DE MAIO
Venres 5 de abril do 2013
O equipo de dez alumnos de 1º de Bacharelato do IES Isidro Parga Pondal de Carballo será o que represente ao Concello na fase galega do Club de Debate que está previsto que teña lugar no Auditorio de Galicia de Santiago de Compostela o vindeiro sábado 4 de maio. O Pazo da Cultura de Carballo vén de acoller a celebración da fase previa e eliminatoria desta iniciativa, na que competiron o equipo gañador e o grupo de 4º de ESO formado tamén por dez alumnos e alumnas do IES Isidro Parga Pondal. O Club de Debate é unha actividade organizada desde os servizos de normalización lingüística dos concellos participantes que ten como obxectivo favorecer o emprego da lingua galega entre a mocidade, especialmente os usos orais en contextos formais e informais, potenciar a fluidez comunicativa ligada á oratoria, promover o pensamento crítico e analítico e fomentar a diversidade de opinións, a tolerancia fronte a diferentes cuestións e o traballo en equipo. O Concelleiro de Normalización Lingüística, Xose Regueira, foi o encargado de abrir a competición, tentando liberar aos participantes dos lóxicos nervos iniciais e subliñando "o carácter case experimental" desta primeira eliminatoria, xa que é a primeira vez que Carballo toma parte de forma activa nun Club que xa leva varios anos en marcha, e no que desta volta colaboran os concellos de Ames, Cee, Ferrol, Ourense, Pontevedra, Rois, Santiago de Compostela, Teo e Vigo, ademais do de Carballo.
VENRES 5 E SÁBADO 6 DE ABRIL NO PAZO DA CULTURA
Xoves 4 de abril do 2013
Mofa e Befa, vellos coñecidos de Carballo, regresan á escena no Pazo da Cultura para colocar un dos mitos contemporáneos no seu sitio: o espírito romántico. A revolución que transformou o mundo e o converteu nun espazo de liberdade serve agora de desculpa para a creación de cancións e filmes con doses de edulcorantes sintéticas. Si, os transboleiros e as afterbaladas que martirizan aos usuarios e usuarias de transportes públicos e visitantes de centros comerciais. O romántico fica reducido a música de cantores, ollares de carneiro de galáns de telenovela e á memoria para lembrar os aniversarios de voda. Mofa e Befa, sensibles ao auténtico espírito romántico, queren lembrar os cumes treboentos, as negras sombras, os monstros feitos de materia morta, os amores de vampiros prolongándose nos séculos, as mulleres dacabalo fumando pitillos e os navíos errantes de matrícula holandesa. Un instrutivo repertorio de Mofa e Befa (Evaristo Calvo e Víctor Mosqueira) que se ve completado polos luminosos esclarecementos do doutor Cadaval e polo romántico bálsamo das aveludadas melodías de Piti Sanz. A cita, que abre o programa Venres Culturais, é o venres 5 de abril ás 21.00 horas no auditorio do Pazo da Cultura. A entrada é de 4 €, 3 € con desconto e a duración prevista do espectáculo é de 100 minutos. Os interesados e interesadas en saber máis sobre a compra de entradas, premer aquí.
VENDA DE ENTRADAS E BONOS A PARTIR DO 2 DE ABRIL
Luns 1 de abril do 2013
O venres 5 de abril principia a programación do Pazo da Cultura para os meses de abril e maio. A oferta inclúe máis de vinte actividades para todos os públicos que se organizan en dous ciclos: Venres Culturais e Primavera enDanza. O programa Venres Culturais esténdese os dous meses e comprende espectáculos de teatro e de música, así como cine e exposicións. Pola súa banda, Primavera enDanza volve un ano máis, e xa van once, intentando achegar ao público a danza contemporánea. Nesta ocasión chega nun formato máis concentrado, tendo lugar nas dúas primeiras semanas do mes de maio. Está formado por 3 espectáculos de compañías galegas e unha de fóra de Galicia, dirixidos tanto a público adulto como a infantil. A Concelleira de Cultura, Mar Eirís, quixo subliñar que se trata dunha programación "variada e de calidade" que quere contribuír a que Carballo siga sendo "un punto de referencia comarcal para a cultura" mantendo cada ano citas estables relacionadas coa música, a danza e o teatro. Quixo agradecer, así mesmo, a colaboración da Agadic (Axencia Galega das Industrias Culturais), da Deputación da Coruña e das asociacións e entidades do municipio que contribúen á construción do programa. O Alcalde, Evencio Ferrero, defendeu a necesidade dunha programación que contribúa a crear "industria cultural", xa que "a danza e o teatro tamén son economía" e "si en algo non debemos recortar é na difusión cultural".
APROBADO UN RECOÑECEMENTO EXTRAXUDICIAL DE 37.000 EUROS
Martes 26 de marzo do 2013
O pleno da corporación vén de sacar adiante na sesión ordinaria de marzo os Presupostos xerais para 2013 cos votos a favor dos grupos políticos de BNG e PSOE e en contra de PP e TEGA. As contas aprobáronse coa inclusión de dúas emendas respecto das cifras iniciais presentadas o pasado 16 de marzo e que poden consultarse premendo aquí. A primeira refírese ao Capítulo 1 de gastos de persoal, no que se poderá incorporar a promoción interna dos anos 2010, 2011 e 2012, o que supón un incremento de 61.800,65 euros dese apartado. Esta cantidade achegarase dende o Capítulo 6 de Investimentos reais do orzamento, en concreto da partida de Urbanización de terreos que tiña un importe de 180.000 euros. A segunda emenda estará nos orzamentos a raíz dunha proposta do PSOE que incrementa en 30.000 euros a partida de gastos en Formación e Emprego co compromiso de que o goberno local destine a maior parte deste investimento a accións formativas propias do Concello. Esta cantidade restaríase do importe destinado a Augas e Sumidorios. Así mesmo, esta proposta do líder socialista, José Antonio Viña, supón a creación dunha partida no Capítulo 1 de gasto destinada á Concesión do Alumeado Público en previsión de que a contratación deste servizo sexa posible ao longo do exercicio de 2013, dado que neste momento estanse elaborando as prescricións técnicas para licitar o Mantemento do Alumeado Público.
MÉRCORES 17 DE ABRIL
Luns 25 de marzo do 2013
O goberno carballés vai convocar unha comisión informativa de urbanismo para o mércores 17 de abril na que está previsto realizar ante todos os grupos políticos municipais e coa axuda do equipo redactor unha valoración das alegacións presentadas ao documento para aprobación inicial do Plan Xeral de Ordenación Municipal (PXOM). Así, e unha vez rematado o venres 22 de marzo o período de exposición pública de dous meses marcado por lei, darase conta do número total de alegacións rexistradas, que a día de hoxe ascende a 1.850. Tamén se realizará unha clasificación atendendo á tipoloxía das alegacións, dependendo de se refiren a chan urbano, rústico, etc. Nesa xuntanza está previsto, así mesmo, que se realice unha estimación dos prazos previstos para resolver estas alegacións. Hai que lembrar que o documento para aprobación inicial do Plan Xeral de Ordenación Municipal de Carballo estivo a disposición de todos os veciños e veciñas durante dous meses no edificio Fórum Carballo, así como a través da páxina web municipal. Desde o primeiro día en que os planos e documentos estiveron a disposición do público a afluencia de cidadáns ten sido constante, así como a media de descargas e visitas a través da web.
LUZ VERDE PARA OS VENRES CULTURAIS E PRIMAVERA ENDANZA
Luns 25 de marzo do 2013
A Xunta de Goberno Local reunida en sesión ordinaria vén de adxudicar os contratos de obra de tres actuacións incluídas no Plan DTC 94 da Deputación da Coruña, "Unha Deputación para todos os concellos". En primeiro lugar, Construcciones López Cao SL realizará os traballos de "Conservación do pavimento das rúas do casco urbano de Carballo" por un prezo de adxudicación de 134.310 euros (con IVE) sobre un prezo de licitación de 149.513,02 euros e cun prazo de execución previsto de tres meses a contar dende o día seguinte á firma da acta de comprobación e replantexamento. En segundo, Construcciones Ramón Vázquez y Reino asumirá o contrato administrativo de obras de "Rebacheo e mellora da rodadura en varios camiños nas parroquias de Rus, Artes, Bértoa (na imaxe), Lema, Goiáns, Sísamo, Sofán e Carballo do Concello de Carballo" por un prezo de adxudicación de 74.620,70 euros (con IVE) sobre un prezo de licitación de 91.001,5 euros. O prazo de execución neste caso tamén é de tres meses. Por último, a Xunta de Goberno dou luz verde á adxudicación, tamén a Construcciones Ramón Vázquez y Reino, do contrato administrativo de obras de "Mellora da rede de saneamento nas parroquias de Ardaña e Rus". O prezo de adxudicación é de 74.052 euros (con IVE), sobre un valor estimado de contrato de 92.586,85 euros. Neste caso, o prazo de execución segue a ser de tres meses.
HORARIO: ININTERROMPIDO DE 11.00 A 21.00 HORAS
Venres 22 de marzo do 2013
O recinto Fórum Carballo acolle a fin de semana do 6 e 7 de abril Expo Voda, o I Salón de Vodas, Comuñóns e Celebracións que se celebra no municipio e na Costa da Morte. Arredor dunha vintena de establecementos da vila participan na iniciativa, pero tamén se ofrecen servizos doutros lugares próximos para ampliar a oferta con propostas que non están dispoñibles en tendas da comarca. É o caso de Fotomatón Galicia, situada na Coruña, que permite contratar unha cabina de fotomatón para que os invitados poidan sacar as fotos que queiran durante a celebración; ou un servizo de aluguer de coches clásicos que participa dende Arteixo. María del Carmen Freire, xerente do Centro Comercial Aberto Carballo (CCA), entidade organizadora da cita coa colaboración do Concello de Carballo e a Dirección Xeral de Comercio, explica que a feira non está dirixida tan só a parellas, senón tamén a invitados ou a outras celebracións que non sexan vodas. Inténtase cubrir toda a oferta posible, incluíndo traxes, perruquería e banquetes, pero tamén servizos financeiros, de seguros e incluso inmobiliarios. Trátase dun salón "que non pretende a venda inmediata, senón futuros contactos cos establecementos", segundo Freire. Durante o salón, con horario ininterrompido de 11.00 a 21.00 horas, haberá degustacións gastronómicas e un desfile de moda ás 19.00 horas.
_(535_x_143_px).jpg)
