COLOCARANSE NAS PRINCIPAIS ESTRADAS QUE CRUZAN O MUNICIPIO
Venres 19 de abril do 2013
O Concello de Carballo, a través das concellarías de Servizos e Medio Ambiente, vén de poñer en marcha as primeiras "Illas Verdes" do municipio. Trátase de puntos de reciclaxe e recollida selectiva de residuos que estarán repartidos por todos os espazos rurais do Concello, completándose así o servizo de recollida selectiva de lixo existente dende hai anos no casco urbano. Para a colocación dos colectores tivéronse en conta os fluxos de poboación das diferentes vías do municipio, polo que os novos puntos instalaranse nas estradas principais que vertebran o territorio como son as de Santiago, Ordes, A Coruña, Caión, Razo e Malpica. Nos últimos días xa se teñen colocado as primeiras illas nos núcleos de Rús, Sofán e Berdillo (na imaxe), mentres que en vindeiras datas completaranse un total de 100 destes puntos coa incorporación de 165 novos colectores azuis de cartón e papel (un total de 79) e amarelos de envases lixeiros (86) aos colectores verdes de RSU (Residuos Sólidos Urbanos) e iglús de vidro xa existentes. Tanto o Alcalde de Carballo, Evencio Ferrero, como os concelleiros Luís Lamas e Marcos Trigo quixeron realizar un chamamento á colaboración cidadá para conseguir que "participe a veciñanza", en verbas de Lamas, o que repercutirá tanto na conservación do medio ambiente como no aforro de custos do servizo municipal de recollida de lixo.
ORDE PUBLICADA NO DOG DO VENRES 19 DE ABRIL
Venres 19 de abril do 2013
O Centro Municipal de Formación do Concello de Carballo informa de que a Dirección Xeral de Emprego e Formación convoca as probas de avaliación en competencias clave para acceder ás accions formativas dos novos certificados de profesionalidade de nivel 2 e 3 de cualificación dentro da formación profesional para o emprego na Comunidade Autónoma de Galicia (publicado no DOG núm. 76 do venres 19 de abril de 2013). Estas probas están dirixidas a traballadores desempregados e /ou ocupados que desexen optar nun futuro a cursos de Formación Profesional para o emprego de nivel 2 e 3, é dicir aquela formación onde se requira para poder participar a titulación mínima da Educación Secundaria Obligatoria (ESO) para os cursos de nivel 2 e o Bacharelato ou equivalentes (ou titulación superior) para os cursos de nivel 3. As persoas interesadas deben entregar perfectamente cuberto o anexo I, recollido na orde publicada no DOG, até o día 3 de maio, e acudir os días 22 e/ou 23 de xuño aos correspondentes exames que poden ser de lingua galega, lingua castelán, matemáticas, dixital, tecnoloxía, inglés e ciencia. Os exames terán lugar no recinto feiral de Silleda. Para obter máis información, dirixirse ao Servizo de Orientación Laboral do Concello.
A COMISIÓN DE URBANISMO REUNIRASE A MEDIADOS DE MAIO
Xoves 18 de abril do 2013
A Comisión informativa de Urbanismo vén de manter a súa primeira xuntanza dende que rematara o período de exposición pública de dous meses do documento para aprobación inicial do Plan Xeral de Ordenación Municipal (PXOM) de Carballo. Durante a reunión coñeceuse o número exacto de alegacións presentadas, 1.923, das que a ampla maioría, un total de 1.400 (máis do 70 por cento do total), refírense ao medio rural do municipio; 378 a solo urbano; 69 a solo urbanizable; 66 están clasificadas como "varios"; e 3 refírense a solo rústico. O equipo redactor está nestes momentos traballando na clasificación das alegacións, tendo sido procesadas ata o momento 1.004. Unha vez que teñan sido todas procesadas e rigorosamente revisadas polos técnicos, comezará o estudo pormenorizado de cada unha delas. Segundo explica o equipo redactor, está previsto que estean todas clasificadas a finais do mes de abril, de tal xeito que a próxima xuntanza da Comisión de Urbanismo, na que se falará do contido e da natureza de cada unha das alegacións, poida ter lugar a mediados do mes de maio. A partir de entón será cando se estableza un calendario para tentar resolver as alegacións o antes posible. Unha das propostas baralladas onte era comezar a resolver empezando polas reclamacións referidas ás parroquias, aínda que o sistema concretarase máis adiante.
VENRES 19 E SÁBADO 20 ÁS 21.00 HORAS NO PAZO DA CULTURA
Mércores 17 de abril do 2013
O programa Venres Culturais continúa a fin de semana do 19 e 20 de abril con dúas propostas de lecer ben diferentes: unha estrea teatral e a música do mellor pop-rock carballés. No primeiro caso, cóntase a historia de Nino Carpio, que traballa nunha empresa de seguros e busca a Mario -músico e amigo da infancia-, ao que lle propón unha estafa. O autor contemporáneo español Alfonso Vallejo crea unha desacougante atmosfera ao redor da relación entre estes dous vellos amigos que nos fai gozar dun duro combate entre dous recoñecidos actores galegos: Luís Iglesia B. e Xabier Deive. Só dous personaxes e altas doses de intriga, non exentas de humor acedo, para indagar nas paixóns e nas retortas da identidade do ser humano. O equipo de traballo desta produción está vinculado a tres empresas diversas que se alían para explorar novas relacións e formas de funcionar: RTA, Voz Audiovisual e Talía Teatro, que asume a dirección e versión da man de Artur Trillo. A cita é o venres 19 ás 21.00 horas no auditorio do Pazo da Cultura. A duración prevista do espectáculo é de 75 minutos, mentres que o prezo da entrada é de 4 € (3 € para maiores de 65, menores de 12 e persoas con carné de estudante).
A CAMPAÑA "GÚSTAME O GALEGO" VISITA O IES ALFREDO BRAÑAS
Luns 15 de abril do 2013
O Concello de Carballo ten recibido -unha vez finalizado o prazo de presentación o pasado xoves 11 de abril- un total de 46 traballos para o IX Premio a artigos xornalísticos normalizadores. Os membros do xurado comezarán a analizar e avaliar os diferentes traballos e, na última semana de abril ou na primeira de maio, xuntaranse na capital bergantiñá para elixir o artigo gañador. O xurado desta novena edición está composto por: Xurxo Chapela, xornalista carballés; Belén Puñal, xornalista carballesa; Carlos Callón, gañador da última edición do premio; Nel Vidal, como representante do Concello, secretario, sen voto. Os obxectivos do Premio a artigos xornalísticos normalizadores son promover a reflexión sobre a situación social da lingua galega, crear espazos nos xornais para analizar e promocionar o uso e prestixio do idioma galego e promover o uso do galego na prensa. Outorgarase un premio económico ao artigo gañador, dotado con 1.000 euros, ademais da difusión nos doce medios colaboradores coa iniciativa. Nas oito edicións anteriores foron premiados/as autores/as como Xurxo F. Carballido, Olga Patiño, Ana R. Barreiro, Ramón Vilar, Miguel Mosquera, Séchu Sende, Kiko Novoa, Xesús Fraga, Pilar García Negro, Marica Campo, Marcos Abalde ou Carlos Callón. O gañador ou gañadora desta edición darase a coñecer en maio.
INSCRICIÓNS NOS CURSOS DO 15 AO 26 DE ABRIL, INCLUSIVES
Venres 12 de abril do 2013
A Deputación da Coruña desenvolve en colaboración co Concello de Carballo accións formativas dirixidas a persoas desempregadas dos concellos da Laracha, Cabana de Bergantiños, Carballo, Coristanco, Malpica de Bergantiños, Ponteceso e Santa Comba. Carballo renova unha vez máis como entidade sede do proxecto Rede Xiana 2, e polo tanto será a encargada de facilitar as instalacións do Forum Carballo para a realización dos cursos de formación. O Concello de Carballo colabora coa Deputación en proxectos de formación e inserción laboral dende hai moitos anos, e é entidade sede do proxecto Rede Xiana dende o ano 2009, impartindo cursos de atención sociosanitaria e panadería e bolería. A formación enmárcase no proxecto RedeXiana2 (Xestión Integral, Accesibilidade, Novas Tecnoloxías e Adaptabilidade no mercado laboral galego), cofinanciado polo organismo provincial e o Fondo Social Europeo. O proxecto inclúe un programa formativo que combina formación teórica con experiencia laboral en entidades e empresas da provincia de sectores económicos relacionados coa formación impartida. O Concello cede as instalacións municipais do Forum para impartir accións formativas, que poden ser accións formativas de base ou específicas. O prazo de inscrición para participar está aberto entre o 15 e o 26 de abril, ambos inclusive.
EN HORARIO DE 18.00 A 21.00 HORAS
Venres 12 de abril do 2013
A fotógrafa santiaguesa afincada en Carballo Mónica Noya Pérez expón na sala do andar -1 do Pazo da Cultura a mostra titulada "Vivir do mar". Trátase dun proxecto académico que a artista realizou para a Escola de Artes Pablo Picasso e que pretende descubrir "o día a día e o modo de vida dunha vila costeira", nas propias verbas de Noya. A mostra consta de 23 instantáneas de carácter documental sobre a actividade do sector pesqueiro en Malpica, e a fotógrafa a descrebe como unha aposta "moi persoal" e tamén como unha maneira de homenaxear ás persoas que aparecen nas imaxes, algunhas delas, como Manolo "con moito mérito despois de 45 anos traballando no mar". Trátase dun documento gráfico que para esta santiaguesa "de interior" xurdiu froito da "curiosidade" e co obxectivo de "mostrar a realidade sen ningunha distorsión", valorando a mostra dende o punto de vista da "intensidade humana e social", máis que a través da estética. É a segunda ocasión en que estas fotografías ven a luz en forma de exposición, xa que a primeira vez amosáronse en Malpica porque, como di a propia autora, "creo que llo debía" como agradecemento pola colaboración e a acollida da vila mariñeira, na que traballou varios días en embarcacións, na lonxa ou cos percebeiros. Pode visitarse de 18.00 a 21.00 horas até o 10 de maio.
OCUPARÁN VARIOS ESPAZOS NA NAVE 2 DO RECINTO
Venres 12 de abril do 2013
O Alcalde de Carballo, Evencio Ferrero, acompañado do Concelleiro de Formación e Emprego, Marcos Trigo, e do responsable do Centro de Formación, Juan Lorenzo, vén de manter unha xuntanza coa Xefa Territorial da Xunta na Coruña, Belén Docampo, para ultimar os detalles do traslado das dependencias da Oficina de Emprego (da Consellería de Traballo e Benestar) e das oficinas consellerías de Medio Rural e Mar (Oficina Agraria Comarcal) e de Medio Ambiente, Territorio e Infraestruturas (neste último caso con seis persoas do distrito ambiental II do Servizo de Conservación da Natureza) situadas en distintos puntos da vila ao complexo Fórum Carballo. Durante a reunión examinouse o texto do convenio con detalle, estudándose os termos do acordo e coordinando os últimos fíos para que sexa ratificado o antes posible tanto pola Xunta como polo pleno do Concello carballés. As tres consellerías implicadas informaron favorablemente o pasado mes de febreiro a realización dos distintos trámites para adquirir un dereito de uso sobre os espazos do edificio (na planta baixa e andar 1 da nave 2 do Fórum) onde xa están situadas as oficinas do Centro Municipal de Formación e do servizo de Orientación Laboral do Concello. A cesión de uso sería gratuíta e por un prazo de 25 anos para poder desenvolver as actividades administrativas relativas aos departamentos citados.
INICIATIVA DA DIRECCIÓN XERAL DE COMERCIO COA AXUDA DO CONCELLO
Venres 12 de abril do 2013
O Mercado Municipal vén de acoller o primeiro dos dous sorteos que se levarán a cabo dentro da campaña "Presume de praceiro/a" posta en marcha pola Dirección Xeral de Comercio da Consellería de Economía e Industria en preto dun centenar de prazas de abastos de toda Galicia. Participaron na rifa aqueles clientes e clientas do mercado municipal que nos últimos días mercaron nos postos da praza e depositaron as súas papeletas nunhas urnas destinadas a tal fin incluíndo, ademais dos seus datos persoais, o posto do mercado do seu praceiro/a favorito. No sorteo estiveron presentes o Alcalde de Carballo, Evencio Ferrero; a Concelleira de Feiras e Mercados, Milagros Lantes; unha representante da Dirección Xeral de Comercio; e o dono de Carnicería Santiago, elixido como "mellor praceiro" polos clientes do mercado na anterior campaña e encargado de ser a "man inocente" que seleccionou as papeletas premiadas. Finalmente, resultaron elixidos 3 gañadores: 1º Premio, vale de 75 euros: Herminia Varela Cures; 2º Premio, vale de 50 euros: Mari Luz González Rama; 3º Premio, vale de 25 euros: Manuel Varela Díaz. Os cheques serán cambiables unicamente no propio mercado en forma de desconto nas próximas compras a través de vales por un importe de 5 euros. A validez dos cupóns remata o 31 de maio de 2013.
O ALCALDE E A DIRECTORA DE FUNDOSA PRESIDIRON O PECHE
Venres 12 de abril do 2013
Aspaber (Asociación de Pais de Discapacitados Psíquicos de Bergantiños) vén de clausurar nas súas instalacións da Brea un curso de Coidador de persoas con discapacidade física e psíquica no que teñen participado un total de 17 persoas entre os meses de novembro e febreiro e cun aproveitamento de 300 horas. Ademais dunha parte máis formativa, a actividade incluíu o desenvolvemento de prácticas, tanto no Centro de Día de Aspaber, como en outras entidades, como centros da terceira idade, etc. O peche da actividade consistiu na entrega de diplomas, na que, ademais do presidente e a directora de Aspaber, Francisco Costa e Dolores Vázquez, estiveron presentes o Alcalde de Carballo, Evencio Ferrero, a directora territorial de Fundosa (Fundación ONCE para a Cooperación e Inclusión Social de Personas con Discapacidade), Menchu Iglesias, e as persoas responsables de impartir o curso. Costa aproveitou para felicitar aos futuros coidadores e ás familias, e agradeceu a colaboración da Fundación ONCE, impulsora do curso, sen esquecer solicitar a súa axuda para actividades futuras, especialmente nestes tempos "en que os medios son francamente xustos". Vázquez subliñou o excelente rendemento do curso, que "superou todas as expectativas" e que serviu "non só para a formación laboral", senón tamén para "traballar no propio ámbito familiar".
ESTARÁN NA VILA ATÉ O VENRES 19 DE ABRIL
Venres 12 de abril do 2013
Un grupo de alumnos e alumnas da localidade bretoa de Vannes (Francia) visita Carballo até o venres 19 de abril nun intercambio con alumnado do IES Monte Neme da capital municipal. O Alcalde de Carballo, Evencio Ferrero e a Tenente de Alcalde e representante do Concello no Consello Escolar Municipal, Milagros Lantes, recibiron no salón de plenos da Casa Consistorial a estes rapaces e rapazas que chegaron á vila o xoves 11 de abril e que durante as próximas xornadas convivirán nas aulas con alumnado do IES Monte Neme e serán acollidos en distintas familias en toda a vila. Baixo a supervisión de directiva e profesorado do instituto, e nunha mestura de galego, castelán e francés, recibiron a benvida do rexedor, que subliñou o feito de que coñece a "preciosa" vila de Vannes de primeira man, así como parte da Bretaña francesa, desexando que "esta visita permita establecer amizades entre persoas de Galicia e Bretaña". A delegación de Vannes xa ten estado no Museo de Bergantiños e no centro da vila, pero nos próximos días tamén coñecerán A Coruña, Santiago de Compostela e Portugal, ademais de participar en varias clases coa sección bilingüe de francés do IES Monte Neme. Durante a recepción, o Alcalde recibiu da delegación francesa un agasallo consistente en sidra bretoa e unha caixa de doces típicos, mentres que os rapaces e rapazas franceses recibiron un pequeno lote de libros.
VENRES 12 ÁS 21.00 HORAS E DOMINGO 14 ÁS 18.00 HORAS
Xoves 11 de abril do 2013
Esta fin de semana continúa a programación cultural do Concello de Carballo do mes de abril, dentro da proposta Venres Culturais, con dous espectáculos destinados a público adulto e público infantil, neste último caso co diclo En Familia. O venres 12 de abril continúa o teatro de adultos coa compañía Redrum Producións que presenta o seu espectáculo "Curriculum Vitae" (na imaxe), unha comedia de rabiosa actualidade que aborda o tema das entrevistas de traballo. Varios autores son os responsables de ironizar sobre o traballo lixo, as ETT's, o enchufismo, os curriculos absurdos, etc., a través dunha visión distinta, divertida e sorprendente. Son Diego Ameixeiras, Araceli Gonda, Avelino González, Manolo Cortés e Xosé Prieto. Redrum Producións é unha compañía de recente creación que está formada por actores e actrices do sector audiovisual e que visitou a Rúa dos Contos no FIOT 2012. Este espectáculo comeza ás 21.00 horas no auditorio do Pazo da Cultura e conta coa colaboración da Axencia Galega das Industrias Culturais (Agadic). As entradas poden reservarse no 981 704 300 nas oficinas da Concellaría de cultura. O prezo ordinario é de 3 € e de 2 € o prezo reducido. A duración prevista do espectáculo é de 80 minutos.
_(535_x_143_px).jpg)
