ABERTOS OS PRAZOS PARA PARTICIPAR NO CERTAME E NO FORMACIP
Xoves 25 de febreiro do 2016
Hoxe tivo lugar a posta de longo do Carballo InterPlay (CIP), o festival de contidos dixitais do Concello de Carballo, que chega a unha terceira edición ampliando a contía dos premios e mantendo a oferta do FormaCIP, que dende este ano chega tamén á xente miúda. Este ano a cita terá lugar os días 5, 6 e 7 de maio, e Sonia Méndez, directora do festival, manifestou a vontade da organización de manter estar datas no futuro. Unha das principais novidades da terceira edición do CIP é a creación dun novo premio, de 1.500 euros, para o mellor proxecto de webserie en galego. O obxectivo deste premio é "fomentar a creación dixital innovadora, en lingua galega e para o mundo", en palabras de Méndez. O novo galardón, que se resolverá cun pitching en directo durante o festival e cuxa dotación deberá destinarse á produción dos primeiros capítulos da webserie premiada, súmase aos xa existentes: mellor webebserie de imaxe real, mellor webserie de animación, mellor webserie internacional e mellor webserie en versión orixinal en galego con 800 euros e trofeo, para cada categoría, e a escolla do público, con 400 euros e trofeo. Ademais, haberá trofeos para a mellor actriz, o mellor actor e un premio AGAG ao mellor guión. En suma, O III Carballo Interplay repartirá máis de 5.000 euros en premios. As persoas que queiran participar poden facelo dende hoxe mesmo ata o 27 de marzo a través da web www.carballointerplay.com. No mesmo web tamén poden anotarse no FormaCIP, que nestes momentos xa ten listaxe de agarda para algúns dos obradoiros ofertados.
INAUGURACIÓN DA EXPOSICIÓN: VENRES 26 ÁS 20.00 HORAS
Xoves 25 de febreiro do 2016
Un total de 160 imaxes de 78 autores e autoras non só de Galicia, senón tamén doutros puntos da Península como Madrid, Valencia, Andalucía, Navarra ou Cataluña teñen participado na XVIII edición do Certame Fotográfico Xosé Manuel Eirís, que este ano incrementou a contía dos seus premios ata os 2.300 euros. Os galardoados, seleccionados nunha reunión do xurado celebrada o pasado 19 de febreiro, son os seguintes: o Primeiro Premio, dotado con 1.000 € e diploma, recaeu na fotografía que leva por título "Praia" presentada por Luís Botana Pérez, de Ferrol; como Segundo Premio, dotado con 500 € e diploma, resultou elixida a fotografía que leva por título "Día de lluvia." presentada por José María Beut Duato, de Valencia; o Premio Especial Carballo, dotado con 500 € e diploma, foi para a fotografía que leva por título "Hora bruxa" presentada por Eduardo Verdes Pereira, de A Laracha. Por último, o xurado tamén decidiu outorgar un Accésits, dotado con 300 € e diploma, para a fotografía "Sen título" presentada por Simone Maestra, de A Coruña. A entrega de premios e inauguración da exposición do XVIII Certame Fotográfico Xosé Manuel Eirís realizarase o venres 26 de febreiro ás 20.00 horas no 3º andar do Pazo da Cultura. Está previsto que asistan o Alcalde de Carballo, Evencio Ferrero, o Concelleiro de Cultura, Marcos Trigo, así como membros do xurado e os gañadores e gañadoras desta edición, aos que se fará entrega dos premios.
AS DÚAS CITAS SON DE BALDE
Mércores 24 de febreiro do 2016
As actividades dos Venres Culturais 2016 continúan esta fin de semana con dúas novas propostas, neste caso cheas de música. Trátase do Rockarballo e do concerto das Cantareiras Arume co que celebran o seu 25 aniversario, nun programa que vai dende a música máis moderna ata os sons do noso patrimonio inmaterial cos sons tradicionais. A primeira das citas é o venres 26 de febreiro cando volve a cita anual cos grupos de música máis vivos do panorama musical de Carballo e Bergantiños: o Rockarballo. Este concerto consolídase cada ano como unha cita imprescindible para os seguidores dos xéneros máis variados como o rock & roll, pop, soul-blues e música electrónica que se farán ouvir no Pazo da Cultura con ese característico estilo que ofrecen as bandas de Carballo, desde as máis alternativas a outras de carácter máis clásico. Neste único concerto contaremos coas seguintes bandas: Lowcos, Sonseis+, Dude, Killer Cats e, pecharán o concerto, The Cerne. O espectáculo dará comenzo ás 21.00 horas no auditorio do Pazo da Cultura e está dirixido a todos os públicos, amantes e curiosos da música. A entrada é de balde até completar aforo. Rockarballo é unha oportunidade única para tomarlle o pulso e escoitar a evolución e creatividade destas agrupacións así como á música que interpretan. Unha aposta pola diversidade melódica na que, versións de cancións xa coñecidas e novos temas de sinatura propia, completan o programa.
A MESA DE CONTRATACIÓN PODERÍA REUNIRSE ESTA SEMANA
Luns 22 de febreiro do 2016
O TACRC (Tribunal Administrativo Central de Recursos Contractuais) vén de considerar "inadmisible por extemporáneo" o recurso interposto pola empresa FCC Aqualia SA o pasado 3 de febreiro contra os pregos para a licitación do contrato de xestión do servizo público do "Ciclo integral da auga do Concello de Carballo". Así o notificou a última hora do venres 19 de febreiro nunha resolución que, segundo explicou hoxe en rolda de prensa a Concelleira de Contratación, Milagros Lantes, permitirá "levantar a suspensión cautelar" sobre o procedemento, que se retomará o antes posible. O obxectivo, sinala Lantes, é que a mesa de contratación poda reunirse para abrir o sobre 1 o venres desta semana (26 de febreiro), ou, en todo caso, a primeiros da seguinte para axilizar a apertura do sobre 2 e que o comité de expertos poda comezar a avaliar o antes posible os aspectos técnicos das propostas presentadas. O Alcalde de Carballo, Evencio Ferrero, subliña que "é unha boa noticia" a desestimación deste recurso xa que "esta resolución permitirá continuar co procedemento" e que favorecer que o Concello conte cunha nova adxudicataria antes de que remate o contrato actual con Gestagua o próximo 30 de xuño. Ferrero tamén quixo lembrar que dende 2003 todos os grupos da corporación forman parte das mesas de contratación, e tamén quixo resaltar que o servizo do Concello "conta con técnicos moi cualificados". Hai que lembrar que un total de oito propostas de doce empresas (xa que varias concorren como UTEs) optan á concesión deste contrato, que ten un importe de 49.146.070,87 euros (IVE incluído) por un prazo de 20 anos (con cinco de prórroga previo acordo das partes). Máis información sobre a suspensión do proceso, aquí.
ISTO SUPÓN UN INCREMENTO DO 5 POR CENTO RESPECTO DE 2014
Xoves 18 de febreiro do 2016
Os veciños e veciñas de Carballo doaron un total de 59.257 kg de téxtil usado durante o ano 2015 para a súa reutilización e reciclaxe, unha cifra que representa un aumento do 5 por cento respecto do ano anterior (56.688 kg). Os depósitos realízanse a través dos 12 colectores que a organización non gobernamental Humana Fundación Pueblo para Pueblo ten instalados na capital municipal, nos que a cidadanía deposita a roupa, o calzado, os complementos e o téxtil de fogar que xa non utiliza e aos que Humana lles dá unha segunda vida. A recollida de téxtil é un servizo gratuíto para o Concello e representa un aforro importante nos gastos de recollida e eliminación de residuos urbanos. A reutilización e a reciclaxe de téxtil contribúen á protección do medio ambiente, outorgando unha segunda vida a unha peza que doutra maneira iría parar ao vertedoiro: cada quilo de roupa que se reutiliza e non é incinerado evita a emisión de 3,169 kg de CO2, segundo datos da Comisión Europea. Segundo estes parámetros, as 59 toneladas recollidas o ano pasado en Carballo representan un aforro de 187 toneladas de CO2 á atmosfera. Na delegación de Galicia, Humana dispón de 380 colectores que o ano pasado recolleron 2.171 toneladas de téxtil usado. A nivel global, a Fundación recolleu en España 16.800 toneladas. Na actualidade, a Fundación conta con máis de 800 concellos e 500 empresas colaboradoras en España.
O EQUIPO ESTARÁ NA VILA A PARTIR DO 22 DE FEBREIRO
Xoves 18 de febreiro do 2016
O director Ignacio Vilar (responsable de filmes como "A Esmorga", "Vilamor" ou "Pradolongo") iniciará a segunda fase da rodaxe da súa nova longametraxe, "Sicixia", na Costa da Morte o vindeiro luns 22 de febreiro. O equipo pasará por Carballo, unha das localizacións escollidas por Vilar para ambientar o seu novo traballo. Esta "historia para escoitar a vida na Costa da Morte", rodada integramente en galego, estará protagonizada por Monti Castiñeiras e Marta Lado. A historia contará ademais con outro protagonista moi especial, a propia Costa da Morte. Co fin de captar a súa esencia en todas as súas facetas, a rodaxe prolongarase ata a Semana Santa. Durante cinco semanas, o equipo de gravación estará rodando en Carballo, e tamén nos concellos de Carnota, Dumbría, Fisterra, Muxía, Camariñas, Cabana de Bergantiños, Cee e Cerceda. Así mesmo, tamén está previsto rodar algunhas secuencias no Gaiás e no Arquivo Sonoro de Galicia (Santiago de Compostela). Nestes momentos xa está finalizada a primeira fase de rodaxe, que tivo lugar na popular Rapa das Bestas de Sabucedo (A Estrada), unha festa que pola súa forza e carácter salvaxe serve de prólogo a unha historia de amor e desamor na Costa da Morte. Finalmente, cómpre subliñar que neste proxecto o director Ignacio Vilar aposta por experimentar cun diálogo entre a ficción e o documental. Na imaxe podemos ver ao director no Monte Pindo acompañado por Sandra Montes, axudante de dirección; por Diego Romero, director de fotografía; e por membros da Asociación Monte Pindo Parque Natural.
O CICLO FORMATIVO AMPLÍA A SÚA OFERTA A NENOS E NENAS
Mércores 17 de febreiro do 2016
A terceira edición do Festival de Contidos Dixitais Carballo InterPlay (CIP) celebrarase os días 5, 6 e 7 de maio. O CIP, que acadou nas dúas pasadas edicións unha grande repercusión a nivel nacional e internacional, situou Carballo como unha referencia para o público e para os profesionais do sector da creatividade dixital, ao converterse no primeiro concello de España que contou cun festival de webseries e de novos formatos narrativos. O Concello e a organización do evento completan a oferta cun ciclo formativo que se desenvolve nos meses previos, o FormaCIP, que nesta edición amplía a súa oferta tamén á xente miúda. Novas narrativas, marketing dixital, novas tecnoloxías, produción e financiación audiovisual, dirección de actores, robótica para nenos e nenas, Lego Mindstorms, Arduino, paleta gráfica codeco ou emoticonos analóxicos son algúns dos coñecementos que adultos, estudantes, nenos e nenas poderán adquirir no ciclo formativo do Festival de Contidos Dixitais Carballo Interplay, FormaCIP, dende o vindeiro 12 de marzo ata a mesma fin de semana do Festival. As persoas interesadas en inscribirse poderán facelo no web: . Respecto dos cursos, o Fórum Carballo acollerá a completa oferta educativa do FormaCIP, que comezará o sábado 12 de marzo.
A SUSPENSIÓN CONTINUARÁ ATA QUE SE COÑEZA A RESOLUCIÓN DO TACRC
Martes 16 de febreiro do 2016
A Concellaría de Contratación, segundo resolución do luns 15 de febreiro de 2016, informa da suspensión da tramitación do expediente de contratación para adxudicar a xestión do servizo público do Servizo Integral da Auga do Concello de Carballo. O motivo é a tramitación ante o TACRC (Tribunal Administrativo Central de Recursos Contractuais) dun recurso especial contra o prego de cláusulas administrativas particulares interposto por parte da empresa FCC Aqualia SA -unha das oito que se teñen presentado ao proceso de licitación-. O pasado venres 12 de febreiro o TACRC remitiulle ao Concello de Carballo unha resolución pola que denegaba a solicitude de suspensión por parte de FCC Aqualia, permitindo a continuación da tramitación do expediente de contratación. Non obstante, e segundo consta na resolución do Concello, "parece unha medida prudente, antes de continuar co procedemento de licitación, coñecer cal será a resolución do TACRC, xa que as súas disposicións sobre o fondo do recurso poderían afectar ao contido das ofertas e a retroacción do procedemento". Hai que lembrar que o "Contrato de xestión do servizo público, baixo a modalidade de concesión, que ten por obxecto o Ciclo Integral da Auga do Concello de Carballo" ten un importe de 49.146.070,87 euros (IVE incluído) por un prazo de 20 anos (con cinco de prórroga previo acordo das partes). O prego de condicións establece un canon base de dous millóns de euros, que as empresas terán a oportunidade de incrementar.
VENRES 19 E DOMINGO 21 DE FEBREIRO
Martes 16 de febreiro do 2016
O Concello de Carballo continúa coa programación dos Venres Culturais 2016 con dúas propostas, unha para adultos e outra para toda a familia o venres 19 e o sábado 21 de febreiro. A primeira cita en abrir a fin de semana é a proposta teatral da compañía de Huesca Producciones Viridiana, que presenta o espectáculo "Ligeros de equipaje. Crónica de la retirada". A través de dous actores que interpretan a preto de cincuenta personaxes, ofrecen un traballo emocionante e impactante, que nos atrapa desde o primeiro momento e que ven avalado por unha extensa e exitosa xira por toda España. "Ligeros de equipaje" son os anacos rotos da memoria de alguén que recorda sen querer recordar. Unha historia case esquecida, perdida no tempo. Unha crónica do exilio, de case medio millón de persoas que en 1939 cruzaron a fronteira francesa a través dos Pirineos. Hay que subliñar que Producciones Viridiana é unha das compañías aragonesas máis consolidada, cunha relevante traxectoria na escena nacional. A función comeza ás 21.00 horas e o prezo da entrada éde 4 € con prezo especial con desconto para estudantes e maiores de 65 anos de 3 €. A duración prevista do espectáculo é de 90 minutos. E para finalizar a semana o domingo 21 de febreiro a compañía María Fumaça presenta "Xiqui Xoque, Fiú Fiú!" un concerto-espectáculo para celebrar a vida que ademais aproveita a Asociación Aloumiños para organizar o festival Incluson a partir das 17.00 horas e dar a coñecer o seu labor.
SOLICÍTASE A CELEBRACIÓN DE SETE CURSOS
Luns 15 de febreiro do 2016
O Concello de Carballo informa de que dentro dos cursos que se desenvolverán este ano no Fórum Carballo figuran as Accións Formativas para Desempregados (AFD) programadas pola Consellería de Economía, Emprego e Industria da Xunta. Unha das condicións para poder solicitalas é que por parte dos concellos estea garantido, mediante convenios con empresas, o período de prácticas que debe superar o alumnado para obter o certificado de profesionalidade. No caso de Carballo xa están asinados os convenios cun total de 22 empresas de diferentes sectores, ás que se suma o propio Concello como entidade acolledora de traballadores e traballadoras en prácticas para dúas das sete accións solicitadas:
- Administración de servizos de internet
- Programación de sistemas informáticos
- Montaxe e mantemento de instalacións eléctricas de baixa tensión
- Montaxe de mobles e elementos de carpintería
- Control de proxectos e obras de construción
- Soldadura con electrodo revestido e TIG
- Operacións auxiliares de montaxe de instalacións electrotécnicas e telecomunicacións en edificios
OS DÍAS 17, 18 E 21 DE FEBREIRO: NA LUDOTECA E NO PAZO DA CULTURA
Luns 15 de febreiro do 2016
O proxecto Apego para a socialización en galego da infancia vén esta semana cargadiño de propostas que van dende un obradoiro de xoguetes, ata outro de contacontos para nais e pais ata a fin de festa con María Fumaça para conmemorar o Día da Lingua Materna. A primeira das citas é o mércores 17 de febreiro de 17.30 a 19.30 horas na Lucoteca co obradoiro "A xogar con Galileo", para coñecer diversos xogos e xoguetes educativos en galego. Crebacabezas, Escola de Escritura do Xabarín, Peregrinus, Super Vista, etc. Son moitas as propostas que dará a coñecer Galileo Nenos e coas que os máis cativos e cativas poderán xogar. A cita está dirixida a nenos/as de 2 a 6 anos, acompañados por algunha persoa adulta. Participación libre e de balde (non é necesaria inscrición previa). Xa o xoves 18 de febreiro celebramos a primeira sesión de "Había unha vez…", un obradoiro de contacontos para nais e pais. Como contarlles contos ás nosas fillas e fillos? Isto é o que se traballará neste obradoiro práctico para nais e pais con sesións de dúas horas cada unha e que rematará cunha Festa dos Contos. No obradoiro coñeceranse recursos para transmitir mellor, tanto as historias, como as emocións e a lingua; traballarase o xesto e a voz; aprenderanse contos da primeira infancia e sobre temas de interese para a vida diaria; farase un kamishibai e monicreques caseiros, etc. Despois da do día 18 no Pazo da Cultura as sesións seráns os seguintes xoves: 25 de febreiro, 3 e 10 de marzo no mesmo horario, de 17.30 a 19.30 horas.
APROBADAS AS BASES DO XII PREMIO A ARTIGOS NORMALIZADORES
Luns 15 de febreiro do 2016
A Xunta de Goberno Local reunida en sesión ordinaria vén de aprobar a adxudicación do contrato administrativo de obras da "Rede de saneamento do Rodo, parroquia de Oza" por un prezo de 74.052 euros (IVE incluído) a Construcciones Ramón Vázquez y Reino SL. A actuación está incluída no Plan Provincial de Cooperación ás Obras e Servizos de Competencia Municipal (POS 2015) e prazo de execución previsto é de catro meses a contar dende o día seguinte ao da sinatura da acta de comprobación de reformulo. No apartado de contratación, a sesión tamén supuxo a aprobación do contrato administrativo de subministro de "Reacondicionamento de instalacións na Biblioteca municipal Rego da Balsa do Concello de Carballo" con un prezo base de licitación de 39.202,40 euros. Realizarase mediante procedemento aberto con varios criterios de adxudicación e tramitación urxente. Entre os criterios de adxudicación, ademais da oferta económica, terase en conta a proposta de redución do prazo de execución así como o incremento no período de garantía da instalación completa. Esta actuación permitirá que comece a usarse de forma continuada o segundo andar da Biblioteca, nestes momentos a disposición do público só para o desenvolvemento de actividades puntuais. Por último, a sesión tamén supuxo a adxudicación do contrato de subministro, por renting, de catro copiadoras para as oficinas municipais do Concello á empresa Fornecementos Galegos SA por un prezo de 393,25 céntimos ao mes (IVE incluído). A finalización do contrato está prevista o 29 de outubro de 2018.
_(535_x_143_px).jpg)
