Inicio Carballo ao día Hemeroteca


Formulario de busca
As rúas Gran Vía e Vázquez de Parga son as que presentan un maior número de accidentes de tráfico na capital carballesa

A POLICÍA REALIZA XA UN LABOR PREVENTIVO EN PUNTOS ESTRATÉXICOS

As rúas Gran Vía e Vázquez de Parga son as que presentan un maior número de accidentes de tráfico na capital carballesa

Mércores 16 de marzo do 2016

As zonas da capital carballesa nas que se teñen rexistrado un maior número de accidentes de tráfico no ano 2015 son a Gran Vía (con 15 sinistros) e a Vázquez de Parga (con 21 sinistros) con 36 incidentes. A tendencia na Vázquez de Parga continúa en 2016, xa que nos dous primeiros meses do ano segue sendo a vía con maior número de accidentes, con 5. Así o reflicte o informe da Policía Local presentado na Comisión Especial de Seguridade celebrada o martes 15 de marzo con presenza de todos os grupos da corporación. Tanto o Concello como as forzas de seguridade solicitan a peóns e condutores que extremen as precaucións nesas zonas, con gran intensidade de tráfico, e tamén especialmente na confluencia de ditas vías onde se teñen rexistrado 3 dos 36 sinistros. A Concellaría de Seguridade que dirixe Milagros Lantes e a Policía Local recomendan aos peóns que crucen polos pasos habilitados; e aos condutores que repecten a velocidade recomendada, que hai que lembrar que en casco urbano ten un límite de 30 quilómetros por hora. A Policía Local tamén reflicte no informe presentado que xa se está realizando un labor preventivo "nos puntos estratéxicos e onde se rexistraron maior número de sinistros en anos anteriores", ademais da posta en marcha de medidas como aforadores, glorietas de nova construción, cambios no sentido de circulación nalgunhas rúas e implantación do sentido único noutras ou o ancheamento de beirarrúas e mellora do alumeado público. O obxectivo, sinala o informe: "mellorar a fluidez do tráfico e a seguridade".

Luz verde na Xunta de Goberno para os contratos de limpeza viaria e subministro de calefacción por 2,7 millóns de euros

APROBADA A CELEBRACIÓN DA CARREIRA DE ATLETISMO 10K CARBALLO

Luz verde na Xunta de Goberno para os contratos de limpeza viaria e subministro de calefacción por 2,7 millóns de euros

Luns 14 de marzo do 2016

A Xunta de Goberno Local reunida en sesión ordinaria vén de aprobar dous expedientes de contratación para a realización de servizos no Concello por un importe que supera os 2,7 millóns de euros. O primeiro deles é o contrato administrativo de servizos de "Limpeza viaria e servizos conexos do Concello de Carballo, reservado a centros especiais de emprego e empresas de inserción socio laboral". O obxecto do contrato será o da prestación da limpeza de vías entendendo por limpeza o conxunto de tratamentos que se efectúan na vía pública para manter un bo estado de limpeza e hixiene (varrido, baldeo, baleirado de papeleiras, limpeza de pintadas ou limpezas especiais). Tamén se inclúen servizos como a limpeza, mantemento e conservación do mobiliario urbano: bancos, maceteiros, etc. O orzamento para todo o período de duración do contrato incluídas as posibles prórrogas (4+2 anos) ascende a 2.376.000 euros (IVE incluído). O concurso efectuarase mediante procedemento aberto con varios criterios de valoración e con unha reserva para centros especiais de emprego e empresas de inserción socio laboral. O valor anual estimado do contrato sería de 396.000 euros (IVE incluído), sendo o importe total para os primeiros catro anos do contrato (sen as prórrogas) de 1.584.000 euros. No apartado de contratación tamén saíu adiante o expediente para o contrato de "Subministro por prezos unitarios de calefacción (pellets e achas), con destino a diversas instalacións municipais do Concello de Carballo". Neste caso tamén se trata dun procedemento aberto e o prezo total do contrato, por un período de catro anos, sería de 328.636 euros.

Carballo crea o seu propio selo de calidade turística para o sector da hostalería: Carballo Compromiso Calidade ou C3

NO FUTURO ESTÁ PREVISTO AMPLIAR O ÁMBITO AO SECTOR COMERCIAL

Carballo crea o seu propio selo de calidade turística para o sector da hostalería: Carballo Compromiso Calidade ou C3

Xoves 10 de marzo do 2016

Carballo xa conta co seu propio selo de calidade turística: a marca Carballo Compromiso Calidade, ou C3, polas tres ‘ces’ que avalan a creación dunha rede de establecementos hostaleiros que destaca pola súa calidade nos servizos turísticos, polas súas melloras nas pautas de atención ao cliente ou por contribuír a mellorar a percepción de Carballo como destino turístico de calidade. Un total de 20 empresas do municipio participaron nun proceso de validación para acadar este selo que tamén pretende dinamizar esta rede de establecementos turísticos mediante a súa identificación e promoción e a través da colaboración conxunta. Segundo explicou o Concelleiro de Promoción Económica e Turismo, Xosé Regueira, o obxectivo foi o de crear un distintivo de calidade turística que ofreza unha "diferenciación" dos servizos turísticos e hostaleiros ofrecidos en Carballo respecto doutros "competidores directos da zona", por exemplo, en toda a Costa da Morte. A través de Carballo Compromiso Calidade tamén se pretende que as empresas hostaleiras de Carballo que polas súas características concretas se cadra non teñen a posibilidade de optar a unha Q internacional de calidade turística ou a unha normativa ISO teñan a oportunidade de destacar; ademais de achegar un "plus aos servizos que ofrecemos a través dun pacto entre empresas e administración". Regueira quixo transmitirlle os seus parabéns e o seu agradecemento ás empresas participantes xa que manifestou o "orgullo" do Concello respecto dos sectores produtivos do municipio e espera que, dado que a marca C3 terá continuidade, moitas máis empresas se vaian sumando á marca.

O Concello xa prepara Carballo por etapas, a cita gastronómica que terá lugar a finais de maio e primeiros de xuño

A RUTA MANTERÁ OS SORTEOS E O TREN TURÍSTICO

O Concello xa prepara Carballo por etapas, a cita gastronómica que terá lugar a finais de maio e primeiros de xuño

Xoves 10 de marzo do 2016

Xa hai datas para Carballo por Etapas. A ruta organizada pola Concellería de Promoción Económica e Turismo do Concello de Carballo e a Asociación de Xóvenes Empresarios de Bergantiños (Axober) celebrarase os días 27, 28 e 29 de maio, e 3, 4 e 5 de xuño. O xoves 10 de marzo tivo lugar a primeira reunión co sector da hostalería, na que estiveron representados 12 locais. Por parte do Concello asistiu a técnica de Turismo, Maite Parga, mentres que por parte de Axober estiveron presentes o Presidente, Isidro Varela, e o Secretario, Raúl Cantorna. A cifra de locais incrementarase nos vindeiros días, por unha banda porque xa expresaron o seu interese en participar hostaleiros/as que non puideron acudir á xuntanza de hoxe, e, por outra, porque o prazo de incorporación segue aberto. As persoas interesadas poden dirixirse a Axober (rúa Fomento, 21-23) chamando ao número de teléfono 981 756 313 polas mañás. O esquema de Carballo por Etapas manterá as claves que constituíron o éxito de edicións anteriores. Os locais participantes elaborarán tapas específicas para o evento que servirán os venres pola tarde-noite e os sábados e domingos tanto a mediodía coma pola tarde. Os horarios tampouco varían, de xeito que as tapas estarán dispoñibles como mínimo de 12.00 a 14.00 e de 20.00 a 22.00 horas. O que si cambia é o prezo, que pasa a ser de 1,50 € por tapa. Carballo por Etapas manterá os seus distintivos, como o tren turístico, que fará a ruta polos locais participantes, ou os sorteos de tapas, gorras, camisetas e outro material promocional.

Cheo na primeira xornada do InForum16 dedicada á busca de emprego e ás claves dos procesos de selección das empresas

MAÑÁ 8 DE MARZO O WORKIN CARBALLO CÉNTRASE NA MULLER

Cheo na primeira xornada do InForum16 dedicada á busca de emprego e ás claves dos procesos de selección das empresas

Luns 7 de marzo do 2016

O auditorio do Fórum Carballo quedou hoxe luns pequeno para acoller as xornadas WorkIN Carballo do InForum16, que arrincaron centradas nas claves para a busca activa de emprego e en ofrecer aos e ás demandantes consellos prácticos para afrontar os procesos de selección das empresas. Manuel Rego, de Wittalento SL falou a primeira hora de "A busca de emprego, un paso necesario para emprender o teu propio voo" cos usuarios e usuarias da Bolsa de Traballo Municipal (BDT). A continuación, e logo da inauguración por parte do Concelleiro de Promoción Económica, Xosé Regueira; e do Alcalde de Carballo, Evencio Ferrero, foi a quenda de Mari Pacoret, intermediadora laboral de Eu busco; de Patricia Guitián, técnico de Recursos Humanos de Gadisa; de Fran Castro, responsable adxunto do departamento de calidade do Balneario Baños Vellos; e de Diego Vázquez, Presidente da Asociación de empresarios da Construción Apeco, e xerente da empresa Ramón Vázquez y Reino. Todos eles ofreceron consellos prácticos para levantar "os malos números", en verbas de Regueira, e "para facer que cada vez máis xente poda incorporarse ao mercado laboral". O Alcalde subliñou o feito de que "os actos que se programan dende o Concello teñan unha asistencia tan masiva" pero tamén quixo salientar que a elevada asistencia tamén "reflicte outra realidade como é a do paro". Ferrero resaltou que precisamente a preocupación do Concello polo desemprego foi a que motivou a celebración destas xornadas e convidou aos veciños e veciñas a que participen "en todas as actividades programadas ao longo destes días" e que continúan até o xoves 10.

Compartir: