Inicio Carballo ao día Novas As parroquias de Cances, Bértoa e Artes...

As parroquias de Cances, Bértoa e Artes acollerán os últimos cursos de manexo do teléfono móbil por este ano

O prazo de inscrición está permanentemente aberto, e os obradoiros iranse organizando a medida que se vaian completando os grupos

Luns 21 de novembro do 2022 Benestar

Os cursos son impartidos por voluntariado da Cruz Vermella

Os cursos son impartidos por voluntariado da Cruz Vermella

O Concello de Carballo ofrece á veciñanza a posibilidade de mellorar o manexo dos teléfonos móbiles a través dunha serie de obradoiros prácticos que son impartidos a través da Cruz Vermella. No mes de xuño comezaba na parroquia de Sofán o primeiro curso dende a pandemia, e nestes cinco meses lévanse impartido tamén en Lema, Noicela e Carballo. Nas vindeiras semanas levaranse a cabo os tres últimos deste ano, que terán lugar nas parroquias de Cances (días 22, 24 e 29 de novembro), Bértoa (días 23 e 30 de novembro e 1 de decembro) e Artes (días 13, 14 e 20 de decembro).

Esta actividade, organizada polas concellarías de Terceira Idade e Benestar, vai especialmente dirixida ás persoas maiores, coa finalidade de facilitarlles o acceso a unha ferramenta de uso tan cotiá como o teléfono móbil. O curso, de seis horas de duración, inclúe conceptos básicos, como a realización de chamadas, como gardar un contacto, programar alarmas, facer fotos e/ou vídeos, o uso do Whatsapp, o funcionamento da aplicación do Sergas, facer buscas en Internet, descargar unha aplicación, consultar páxinas de interese ou buscar contidos en YouTube, entre outros.

Dende o Concello de Carballo seguiremos ofrecendo os obradoiros de manexo dos smartphone mentres exista demanda. As persoas interesadas poden anotarse a través das asociacións e/ou consellos parroquiais de cada parroquia, na Biblioteca Rego da Balsa ou enviando un correo electrónico a comunicacion@carballo.gal cos seguintes datos: nome completo, idade, parroquia de residencia e teléfono de contacto. En función do número e o lugar de residencia dos veciños e veciñas inscritos elaborarase, en coordinación coa Cruz Vermella, o calendario dos cursos en cada centro social.

Talleres de memoria

Este ano tamén se puxeron en marcha dende o Concello de Carballo talleres de memoria, que son impartidos por Afaber. Mañá xoves arrincará o noveno e último, que se levará a cabo na parroquia de Cances. Os demais celébranse en Noicela, Lema, Razo, Sísamo, Sofán, Verdillo, Ardaña e Carballo. Neste caso as sesións son semanais, e levaranse a cabo ata o mes de maio.

Compartir: