DE 1.500 METROS CADRADOS, ESTARÁ NA RÚA PONTEVEDRA

A Biblioteca Comarcal de Carballo será un espazo aberto, para todas as idades e "para que a xente se quede a ler"

Venres 24 de setembro do 2010

O Alcalde de Carballo, Evencio Ferrero, sinalou que a elección do arquitecto, profesor na Escola Técnica Superior de Arquitectura da Coruña, baseouse na súa experiencia na elaboración de proxectos similares, e a concepción no novo servizo baseouse así mesmo, nas visitas a numerosas bibliotecas, tamén en Portugal. Óscar Pedrós subliña que a súa intención é crear un espazo "aberto" no que non existen salas e co obxectivo "de que a xente quede a ler na Biblioteca". Ademais do espazo aberto de consulta e lectura, crearase unha sala multiusos con bancadas para poder realizar recitais e para as actividades dun club de lectura. O edificio estará equipado coas últimas tecnoloxías, incluíndo detalles como a posibilidade de que os nenos e nenas poidan ter acceso a videoxogos, cunha área de cómics e un espazo para literatura xuvenil. Está previsto que o acabado do edificio, rodeado por unha zona verde, se realice en pranchas verticais de cerámica.

O Alcalde de Carballo, Evencio Ferrero, que estivo na presentación do proxecto xunto co Tenente de Alcalde, José Antonio Viña, e a Concelleira de Cultura, Belén Lendoiro, subliña que é un edificio "para todas as idades, dende bebés a nais e pais", para que "todo o mundo atope o seu espazo". Así, haberá unha zona específica para que os bebés poidan gatear, e incluso cunha área para cambiar os cueiros. Os adultos contarán cunha zona de hemeroteca con máquina de café, accesos a Internet e todos os elementos que fagan o lugar atractivo para desfrutar del. Ferrero tamén subliña que o proxecto "nace da necesidade dun Concello de incrementar os puntos de lectura" e de ampliar notablemente os servizos da biblioteca actual, pensada como un punto "de estudo e de silencio" en verbas do arquitecto, e non como un lugar accesible para a consulta e lectura de libros e para estar nel. Os interesados e interesadas poden consultar unha imaxe da maqueta nesta mesma nova. O edificio da biblioteca está situado na parte dereita da imaxe.