CULTURA

Aberto o prazo de inscrición para participar nos concursos do San Xoán 2007

Venres 25 de maio do 2007

A XX edición do Concurso de Cachelas celebrarase o 23 de xuño entre as 19:00 e as 23:00 horas. As cachelas non poderán contar con materiais plásticos, botes de spray, neumáticos, combustible, ou árbores autóctonas como carballo, acivro, loureiro, catiñeiro... Deberán ubicarse en lugares que non supoñan ningún perigo para o entorno. As subvencións por participar serán de 20 ou 30 euros e haberá catro premios de 450, 200, 150, e 100 euros. O VII Gran Prix de Carrilanas celebrarase o 24 de xuño ás 19:00 horas. Deberán ser carrilanas de construcción artesanal, quedando prohibida a utilización de motor, pedais ou poleas para a súa propulsión. É obrigatorio a utilización dun sistema de freado na carrilana e de casco. Haberá tres premios á velocidade de 200, 100 e 90 euros, dous premios especiais á velocidade da carrilana clásica de 200 e 100 euros, un premio especial á mellor carrilana de 120 euros e un premio especial aos concursantes máis orixinais de 100 euros. O X Descenso do Anllóns celebrarase o 25 de xuño a partir das 18,00 horas. Deberán ser vehículos de construcción artesanal, que poderá ser propulsada por calquera medio agás a propulsión mecánica a motor. A s subvencións por participar serán de 20 euros e repartiranse 900 euros en premios.

O prazo de inscrición nas tres modalidades estará aberto até o día 20 de xuño, ás 13.00 horas. Os interesados en participar deberán formalizar a inscrición no Museo de Bergantiños (de martes a venres 12.00-14.00/ 18.00-20.00h, martes e xoves ata as 21:00h e sábado de 12.00- 14.00h).