O pregón de Álex Ávila ateigou a planta alta do Mercado Municipal
Escoita a súa intervención no vídeo que acompaña esta nova
Mércores 22 de xuño do 2022
O pregón do San Xoán tivo que celebrarse a cuberto porque a chuvia quixo acompañarnos no inicio das nosas festas, pero o mal tempo non impediu que máis de medio milleiro de carballeses e carballesas ateigasen a planta alta do Mercado Municipal.
A música de Big Band do Conservatorio Profesional de Música do Concello de Carballo, dirixida por Javier Bardanca, abriu unha tarde moi emotiva. A propia música e as voces dos cantantes soaron coma nunca, e a Big Band conseguiu poñer ao público en pé.
Tras a interpretación musical chegou a quenda do pregoeiro, Álex Ávila, presentado polo presidente da comisión de festas, Sergio Varela, que destacou os valores profesional, cultural e humano do actual director do Hospital Materno Infantil da Coruña. O alcalde de Carballo, Evencio Ferrero, que previamente ofrecera unha recepción na Alcaldía ao pregoeiro, puxo o broche do acto, que podedes ver e escoitar de forma case íntegra no vídeo. Evencio Ferrero, como xa é tradición, agasallou ao pregoeiro cunha figura do Carballo de Sargadelos, e, no nome da comisión de festas, Sergio Varela fíxolle entrega dunha caricatura realizada por Mon Lendoiro.