Chegan as "Tardes de conto" para comezar o curso con ilusión ao abrigo da Biblioteca Rego da Balsa
Aberto o prazo de inscrición para o primeiro espectáculo, que será o xoves 9 e que terá a Caxoto como protagonista
Xoves 2 de setembro do 2021 Cultura
A quen non lle gusta que Caxoto, Nelson Quinteiro, Luis Vallecillo, Alba Grande, Paco Nogueiras, Anxo Moure, O mago Paco, María Faltri e Jorge Juncal lle conten ou lle canten historias? A nós rechíflanos! E por iso fixémoslles un convite para que veñan a Carballo. Grazas a estes e estas grandes artistas, comezaremos o curso con toda a ilusión que nos traerán as “Tardes de Conto” na Biblioteca Rego da Balsa.
“Unhas gafas coma as do avó” é o primeiro dos oito títulos previstos para as vindeiras semanas. Será o xoves 9, con Caxoto e Gema Santos como protagonistas, e é un espectáculo inclusivo, no que ademais da lingua oral tamén se utiliza a lingua de signos. Está primeira proposta está dirixida a nenos e nenas de 4 a 12 anos, pero fíxate nas idades recomendadas que atoparás xunto a cada unha das que integran o cartel. A reserva de prazas realizarase, como é habitual, dende unha semana antes e chamando ao 981758580.
As “Tardes de Conto” desenvolveranse no auditorio da biblioteca, cumprindo todas as medidas de prevención da COVID-19. Pero, dado que o aforo é limitado, as funcións tamén se retransmitirán por streaming a través das redes sociais das Bibliotecas de Carballo, Cultura Carballo e Concello de Carballo (YouTube e/ou Facebook).
.jpg)