A Asociación Lumieira e o Concello "recuperan" o trolebús coincidindo co 50º aniversario da súa desaparición
Este venres ás 19:00 horas será inaugurada unha exposición ao aire libre que recolle material recompilado durante décadas polo historiador Xan Fraga
Martes 25 de maio do 2021 Cultura
Trolebús en Carballo nos anos sesenta
O 15 de marzo de 1971 circularon por última vez os trolebuses A Coruña-Carballo. Coincidindo, pois, co 50º aniversario da súa desaparición, a Asociación Cultural Lumieira e o Concello de Carballo tratan de recuperar a historia dun medio de transporte que foi decisivo no desenvolvemento dos catro concellos polos que pasaba: Carballo, A Laracha, Arteixo e A Coruña.
Unha parte do material recompilado durante décadas polo historiador local Xan Fraga Rodríguez, autor de varios libros sobre o trolebús e o tranvía e gran coñecedor da historia deste medios de locomoción, sairá á luz a través dunha gran exposición ao aire libre que será inaugurada este venres ás 19:00 horas na Praza do Concello.
A mostra, realizada integramente en Carballo, inclúe dez expositores de catro caras cada un, con información escrita e fotografías, principalmente, pero tamén con outro tipo de material recuperado dos trolebuses, como nóminas ou billetes.
A liña de trolebuses entre Carballo e A Coruña fora inaugurada o 23 de febreiro de 1950. A estrada que une estas dúas localidades foi a primeira que se electrificou en España, e a liña de trolebuses, cos seus 34 quilómetros de lonxitude, chegou a ser a máis longa de todo o Estado e a segunda de Europa occidental. A súa historia estará a disposición de toda a veciñanza ao longo do mes de xuño.