RESERVAS DE BALDE EN CULTURAENTRADAS@CARBALLO.GAL
Volve a Carballo o ciclo de cine euroárabe “Amal en Ruta” con cinco proxeccións todos os venres do 30 de abril ao 28 de maio
O ciclo organizado pola Fundación Araguaney-Puente de Culturas e o Concello de Carballo inclúe tres ficcións e dous documentais que narran historias femininas e de humor
Martes 27 de abril do 2021 Cultura
O presidente da Fundación Araguaney-Puente de Culturas, Ghaleb Jaber Martínez; o alcalde de Carballo, Evencio Ferrero, e o concelleiro de Cultura, Marcos Trigo, presentaron hoxe por streaming unha nova edición do ciclo de cinema euroárabe “AMAL EN RUTA CARBALLO 2021”. Esta actividade está organizada conxuntamente por ambas as entidades co obxecto de achegar a sociedade árabe a Galicia, rompendo cos estereotipos e ofrecendo unha visión ampla e multidimensional desta cultura tan heteroxénea.
Amal en Ruta Carballo é un resumo da última edición da Semana de Cinema Euroárabe Amal, celebrada no Teatro Principal de Santiago de Compostela o pasado mes de outubro. Jaber Martínez explicou que esta edición conta cunha programación de cinco películas que encarnan o mellor do cinema árabe do último ano e englobadas en dúas claves: as historias femininas e o humor.
Ghaleb Jaber agradeceu “a aposta do Concello de Carballo polo ciclo Amal en Ruta e pola cultura en xeral, sobre todo nesta época de pandemia, na que moitas veces se deixan de lado as iniciativas culturais”. Dende o seu punto de vista, do mesmo xeito que é preciso que chegue a todo o mundo e o antes posible a vacina contra o coronavirus, “porque todos somos vítimas da mesma pandemia”, é preciso loitar contra outras pandemias coma o extremismo ou a intolerancia. “A cultura _dixo nese sentido_ é unha vacina moi efectiva, e que está a disposición de todos, para loitar contra a intolerancia”.
O alcalde agradeceu á Fundación Araguaney que conte con Carballo e asegurou que nestes momentos o ciclo Amal en Ruta xa é “unha necesidade, a necesidade de ter a mente aberta ante realidades que parecen lonxanas pero que xa forman parte da nosa sociedade”. Evencio Ferreero destacou que a cultura debe estar presente “no día a día, e ese día a día ten que seguir formándonos como persoas”.
Edición 2021
O ciclo consta de tres ficcións e dous documentais –cintas en versión orixinal subtituladas en castelán–, que supoñen un percorrido polo mellor cinema árabe da actualidade. Poderanse ver do 30 de abril ao 28 de maio no Pazo dá Cultura ás 20:00 horas. O acceso ás proxeccións é libre e gratuíto, pero debido ás restricións sanitarias o aforo é limitado, por tanto, as persoas interesadas en asistir deben solicitar previamente a súa entrada enviando un correo electrónico a culturaentradas@carballo.gal (indicando nome, apelidos e número de teléfono).
Os espectadores poderán ver a película “Adam” (venres-30 de abril), historia de superación dunha muller na que se aprecia como a comunidade serve de escudo protector; o documental “The Cave” (venres-7 de maio), que narra a historia dun grupo de mulleres médicas no conflito sirio; o documental “Gaza” (venres-14 de maio), que retrata a vida cotiá dos cidadáns na Fronte de Gaza; a ficción “It must be heaven” (venres-21 de maio), cinta palestina dirixida por Elia Suleiman que, segundo Jaber Martínez, é un dos máximos expoñentes do cinema palestino; e a longametraxe de ficción “Papicha” (venres-28 de maio), que ofrece unha visión amarga pero estimulante do papel da muller no mundo contemporáneo nun país árabe, así como a loita do colectivo feminino.