Cultura

600 escolares dos centros de primaria carballeses asistiron á representación de “Carabela”

A Concellaría de Cultura convidou aos nenos e nenas de 3º e 4º cursos a dúas funcións da última montaxe da compañía local Galeatro

Venres 31 de xaneiro do 2020 Cultura

Despois da multitudinaria estrea do día 19, Galeatro regresou coa súa nova montaxe, “Carabela”, ao auditorio do Pazo da Cultura, desta volta para ofrecer dúas representacións para o alumnado de 3º e 4º cursos dos centros de primaria carballeses. En total, 600 nenos e nenas.

A compañía carballesa colleitou un novo éxito e recibiu moitísimos aplausos pola súa fermosa historia, coa que trata de sensibilizar á cativada sobre o grave problema ambiental que supón o uso masivo de plástico. Carabela, a protagonista de historia escrita por Paula Carballeira, e a cociñeira dun barco que naufraga na Illa Pequena de Plástico. Soa, rodeada de peixes mutantes, de paxaros que non paran de queixarse de ter comido substancias sintéticas e de lixo, constrúe unha nena de plástico á que lle conta historias do mundo que hai fóra da Illa Pequena de Plástico, e que será a que lle axude a saír dela antes de morrer de fame.

“Carabela” está interpretada por Alba Bermúdez, Tone Martínez e Davide González, que tamén é o director da obra e o autor da música. Se tés nenos/as maiores de 4 anos, non desaproveites a próxima ocasión para velos en acción. Paga moito a pena!