Carballo acolle un dos 10 proxectos artísticos incluídos este ano no programa de Residencias Paraíso
Os creadores escénicos Matías Daporta e María De Dueñas comezaron a traballar esta semana no Pazo da Cultura no proxecto “Mocap-en Beta”
Venres 9 de agosto do 2019 Cultura
O programa Residencias Paraíso leva tres anos apoiando proxectos artísticos, e o Concello de Carballo leva tres anos colaborando para impulsar a creatividade da extraordinaria canteira de artistas galegos. Este ano o Colectivo RPM, que traballa da man da Axencia Galega das Industrias Culturais (Agadic) para impulsar a investigación e a creación arredor das artes vivas contemporáneas, seleccionou 10 proxectos. Un deles, Mocap-en Beta, está a desenvolverse en Carballo.
Matías Daporta avanza no seu proxecto xunto con María De Dueñas. Os dous estudaron no Conservatorio de Danza contemporánea de Madrid e máis adiante coincidiron no Máster de Práctica Escénica e Cultura Visual. Aínda que María desenvolveu unha carreira como bailarina e Matías como coreógrafo e xestor, os seus intereses sempre atoparon puntos comúns que se distinguen nas suas colaboracións en proxectos sobre a relación entre o cinema e a performance: “Knock Down” e “Funerals Welcome” producido por Veem Theatre en Amsterdam (2014), e “Flat, Not Apartment” producido por Projection Room en Bruselas (2015).
Arredor da súa estancia no noso concello deseñamos dúas actividades abertas ao público para que poidades coñecer máis a fondo o interesante proxecto deste artista galego.
MOSTRA > Xoves 22 de agosto ás 18.00 horas
Mocap-en Beta é unha peza en proceso, sobre como representar un corpo en constante desenvolvemento. Nesta mostra partillarán o material acumulado durante estas semanas. “O título _explican_ atende a dous estados en desenvolvemento. Mocap para aqueles movementos gravados para logo dixitalizar, e en Beta a un proxecto dixital en estado de proba. Entendemos o corpo nun limbo similar, no que a súa forma vese manipulada polos cambios continuos da sociedade e da vida en xeral”.
AULA > Venres 23 de agosto, de 18.00 a 20.00 horas
“Este encontro será una maneira de coñecer outros corpos en relación ao material e aos mecanismos escénicos cos que traballamos”, expoñen.