Sete orixinais propostas optan este ano aos premios do tradicional Concurso de Cachelas de Carballo
A Asociación Cultural San Xoán repartirá 1.450 euros en premios, á parte das gratificacións a todos os participantes que cumpran uns requisitos mínimos
Sábado 22 de xuño do 2019 Cultura
Cachela en Vivente (Ardaña)
Mañá é o gran día, o día das cachelas, das sardiñas e das meigas. E, como é habitual dende hai 32 anos, a Asociación Cultural San Xoán celebra o seu Concurso de Cachelas, un certame que ten como finalidade potenciar unha tradición popular e unha das manifestacións culturais máis importantes das nosas festas. Este ano hai menos concursantes pero a competencia será especialmente dura, porque as sete propostas inscritas destacan pola súa orixinalidade e calidade, como podedes comprobar nestas imaxes do sábado 22, día de moito traballo para os/as participantes.
Cachela na rúa Río Anllóns
Os maiores da residencia DomusVi, que nunca fallan, participan este ano coa cachela “Habelas hailas”. Na rúa Río Anllóns, no mesmo emprazamento da cachela gañadora o ano pasado, nesta ocasión sitúase “Tranquilo Quasimodo”. Tamén son habituais os/as participantes que nos presentan “Air Chopos”, na rúa Chopos; “Carrusel”, en Carré Aldao; “Coche clásico carballés”, no Sisto, ou “O faro da rúa Buxos”, nesa mesma rúa. Ademais, este ano o concurso chega á parroquia de Ardaña, con “Es por tu bien”, unha composición que xa chama a atención dende hai días no lugar de Vivente. Podedes consultar os emprazamentos concretos no documento axunto, por se vos apetece facer a Ruta das Cachelas antes de que as queimen.
Normas de participación
Segundo as normas establecidas pola organización, as cachelas situaranse onde non supoñan ningún perigo para o contorno, a unha distancia prudencial, segundo o volume da cachela, de edificios, coches, tubaxes de gas, mobiliario urbano e nunca debaixo de liñas eléctricas, nin próximas a biomasa, árbores ou outras zonas inflamables. Nas proximidades deberá dispoñerse de extintores, mangueira, cubos de auga ou outros medios para o control do lume. Os integrantes do grupo son responsables do cumprimento das normas de seguridade precisas.
Cachela na rúa Carré Aldao
Ademais, non poden estar elaboradas con materiais plásticos, botes de spray, pneumáticos, gomaespuma, artificios pirotécnicos e en xeral calquera produto inflamable, explosivo ou materiais onde interveña o plástico, nin tampouco se poderán utilizar árbores autóctonas, como carballo, acevo, loureiro, castiñeiro...
Premios
En canto aos premios, establécense catro: 600 euros para a primeira, xunto cun trofeo doado por Sargadelos Galería de Carballo; 300€ para a segunda, 200€ para a terceira e 150€ para a cuarta. O xurado, integrado por membros da comisión de festas e colaboradores, poderá tamén outorgar accésits por valor de 200 euros. Así mesmo, todas as cachelas inscritas que non resulten premiadas e que reúnan uns requisitos mínimos recibirán gratificacións de entre 20 e 50 euros. O xurado empezará o seu percorrido ás 19.00 horas.