As Bibliotecas de Carballo conectan á mocidade coa cultura urbana a través do graffiti e o parkour
Obradoiros, exposicións e presentacións literarias enchen o programa de actividades de verán
Mércores 12 de xullo do 2017 Cultura
Despois da Praza dos Libros, as Bibliotecas de Carballo entran de cheo na programación estival cunha programación que trata de conectar ao público xuvenil con manifestacións da cultura urbana como o graffiti ou o parkour.
A Biblioteca Rego da Balsa converterase nun campo de prácticas dirixidas pola Vella Escola Xuvenil, unha entidade centrada na difusión en Galicia das diferentes disciplinas de cultura urbana e que ofrece á xente nova a posibilidade de participar activa e socialmente en distintos proxectos que favorecen o seu desenvolvemento integral mediante a formación, a expresión artística, o ocio activo e a integración social.
O día 27 porán a proba a creatividade dos mozos e mozas de Carballo nun obradoiro de graffiti que se desenvolverá de 11.00 a 12.30, e para o que abre hoxe o prazo de inscrición na propia biblioteca. Pero sen dúbida a actividade máis innovadora será, o venres 28, un taller que permitirá que os rapaces e as rapazas teñan o seu primeiro contacto co parkour, unha actividade que comezou en Francia a finais dos 80 que cultiva a arte do desprazamento, sobre todo por espazos urbanos, de maneira que as persoas que o practican deben moverse dun sitio a outro o máis rápida e fluidamente posible, utilizando unicamente as habilitades do seu corpo e sorteando todo tipo de barreiras. No vídeo que acompaña esta nova veredes algúns exemplos. A seguridade está garantida no obradoiro e o prazo de inscrición abrirá mañá.
Outras propostas
Ademais da parte máis activa, a programación de Bibliotecas Carballo inclúe outras propostas. O vindeiro xoves 20, por exemplo, terá lugar na Biblioteca Rego da Balsa a presentación do libro Poder, dominio e sangue. A liñaxe Bermúdez de Castro, Señores de Montaos, de Marcos Emilio Amado Casdelo, unha actividade de acceso libre e para todos os públicos.
En agosto estará aberta durante todo o mes unha exposición da Protectora de Carballo contra o abandono animal. E ademais continúa o ciclo de lectura en francés da Asociación de Irmanamento de Carballo con L’Isle Jourdain e a oferta habitual de lecturas, videoxogos... das nosas bibliotecas.
