Semana de concertos no Conservatorio Profesional de Música
Atlántico Quinteto de Metais actúa o martes e o pianista Iago Franqueira Barca, o mércores
Luns 8 de maio do 2017 Cultura
No Conservatorio Profesional de Música de Carballo comeza unha semana de concertos, con dúas actuacións abertas a toda a cidadanía para dar a coñecer a solistas e grupos formados no centro municipal e tamén a agrupacións procedentes doutras localidades.
O martes 9 subirán ao escenario do auditorio do Pazo da Cultura José Ramiro Perez González, Manuel Bastos Gómez, Adrián Martínez Vieites, Fabián Jamardo e Pablo Méndez Rodríguez, ou, o que é o mesmo, Atlántico Quinteto de Metais. A agrupación interpretará oito pezas de estilos moi variados, e que abranguen dende a banda sonora de “Superman” ata o clásico “Yesterday” de The Beatles. Ao día seguinte asistiremos a un concerto de piano de Iago Franqueira Barca, que iniciou os seus estudos musicais no Conservatorio Profesional de Música de Carballo aos oito anos, e que na actualidade cursa 4º de Grao Superior na Coruña. A música de Brahms e Chopin centrará a súa actuación.
As dúas citas musicais terán lugar no auditorio do Pazo da Cultura e comezarán ás 19 horas.
.png)
