Benestar

Unha interesante mesa redonda con mulleres de Carballo que despuntan en profesións masculinizadas abriu os actos do 8M

Ata o 13 de marzo podes ver na Praza do Concello a exposición “Sinaladas”, que pretende contribuír a seguir construíndo referentes

Luns 6 de marzo do 2023 Benestar

As mulleres teñen a palabra reuniu a preto de cen persoas

Non podiamos ter mellor arranque para as actividades do 8M: a mesa redonda As mulleres teñen a palabra resultou un éxito dende todos os puntos de vista. Este domingo tivemos a sorte de poder escoitar a catro carballesas que despuntan en profesións masculinizadas, mulleres preparadas, feministas e referentes para as novas xeracións. A xefa do parque de bombeiros de Carballo, Catú Vilariño; a empresaria Mercedes Fraga; a enxeñeira informática Verónica Bolón e a letrada da Xunta de Galicia Patricia Iglesias, coa colaboración da regueifeira Lupe Blanco, que realizou un extraordinario labor como presentadora e moderadora, déronnos unha lección de vida que ben podería formar parte do currículo escolar. Por iso queremos compartila con todas e todos vós neste vídeo.

Con esta interesantísima mesa redonda, que se complementou cunha sesión vermú amenizada polo dúo Black Acoustic e na que intentamos facilitar a conciliación poñendo a disposición das persoas asistentes unha ludoteca na que pasaron unha entretida mañá máis de vinte nenos e nenas, abrimos o programa do Día da Muller, que se prolongará durante as vindeiras semanas con propostas divulgativas e, sobre todo, formativas.

Exposición “Sinaladas”

A exposición Sinaladas estará na Praza do Concello ata o día 13

Entre as primeiras, ademais da mesa redonda organizada polas concellarías de Innovación, Formación e Emprego e Igualdade, figura a exposición Sinaladas, que podes visitar ata o día 13 na Praza do Concello, como fixeron na xornada inaugural o alcalde, Evencio Ferrero, as concelleiras Maica Ures e Milagros Lantes, e a actual directora do Centro de Información á Muller (CIM), Laura Toimil.

Sinaladas é unha mostra integrada por 39 paneis a través da que se pretende divulgar a figura de mulleres e movementos co obxectivo de ofrecer unha visión global da memoria das mulleres e seguir construíndo referentes. As revoltas agrarias, a represión do movemento obreiro por parte do franquismo, as mulleres pioneiras na política, a situación educativa da muller durante a II República e o franquismo, a cultura en defensa do país, o borrado de referentes por parte da ditadura, as líderes sociais polos dereitos colectivos, a resistencia, as mulleres galegas nas milicias, as resistentes, as solidarias, o exilio, as galegas en América Latina, as guerrilleiras, as desterradas, a humillación das vencidas e a súa “dubidosa” moral ou a resistencia democrática, entre outros, son os temas que aborda a exposición.

Estes contidos son da elaboración de Montse Fajardo, xornalista e investigadora de recoñecida traxectoria, con anos de traballo neste eido e autora de diversos libros e publicacións sobre o tema, que cedeu á Deputación da Coruña os dereitos de reprodución da súa investigación.

Actividades lúdicas

Esta parte divulgativa do programa do 8M complétase con dúas actividades dirixidas á infancia. Por unha banda, o mesmo 8 de marzo, de 18.00 a 19.00 horas, os nenos e as nenas estarán Xogando sen xénero na Praza do Concello ou, no caso de mal tempo, na planta alta do mercado municipal. A actividade consistirá na realización de diversos xogos e dun mural colectivo.

A última proposta, tamén lúdica, é o reparto da baralla Feminismos no tempo, un xogo de 55 cartas para situar feitos relevantes da historia do feminismo.

Formación

Outro prato forte da programación do 8M en Carballo é a formación, cun programa dirixido aos diferentes sectores sociais. O mesmo 8 de marzo celebrarase na Casa do Concello un obradoiro básico de formación en perspectiva de xénero destinado a todo o persoal técnico e político, dado que as administracións temos unha responsabilidade na introdución e no desenvolvemento do noso traballo incorporando a perspectiva de xénero. O taller será impartido por Ramón Torrente, pedagogo, psicopedagogo, técnico de igualdade, autor e director teatral en proxectos pedagóxicos de igualdade.

A formación chegará tamén aos institutos de secundaria. Por unha banda, con dous obradoiros dirixidos ao alumnado: un sobre novas masculinidades, que enfocamos aos estudantes de FP, e outro titulado Para que non doa, no que se traballarán as relacións emocionais dende unha perspectiva non sexista, as dependencias emocionais e o que ten que ver coas formas de respecto e boa relación. O  obxectivo é que o alumnado cuestione os mitos e falsas crenzas en torno o namoramento e o amor, que diferencien entre relacións igualitarias e relacións violentas, de dependencia… e que reflexionen sobre os modelos impostos nas relacións afectivas.

O profesorado poderá participar tamén na acción formativa Pingas de igualdade, que neste caso impartirase telematicamente e que constará de seis horas de formación.

E, por último, a programación elaborada dende a área de Igualdade tamén inclúe a actividade Feminismo, traballo e vida. Dereito ao coidado, coidado con dereitos, que vai dirixida a mulleres traballadoras do ámbito dos coidados.

Vídeos