Benestar

Repartidos case 3.000 preservativos dentro da campaña de educación sexual do Concello de Carballo

O equipo de matronas do centro de saúde distribúe entre as súas usuarias o kit que inclúe folleto, preservativo e toalliña hixiénica

Mércores 22 de febreiro do 2023 Benestar

As matronas do centro de saúde colaboran na campaña

Dentro da campaña de educación sexual promovida polo Concello de Carballo lévanse repartidos no último ano case 3.000 preservativos. A iniciativa impulsada polas concellarías de Igualdade, Mocidade e Educación comezou nas aulas, cunha enquisa ao alumnado dos institutos que permitiu detectar, entre outras, importantes carencias do alumnado a nivel informativo. Por iso, a nosa intención é seguir desenvolvendo nos vindeiros meses campañas divulgativas en colaboración cos centros educativos pero tamén doutros colectivos.

Nese sentido, grazas á coordinación que mantemos dende o primeiro momento co equipo de matronas do centro de saúde, o material informativo e de protección elaborado polo Concello é distribuído entre as usuarias do servizo sanitario. A iniciativa partiu no seu momento das propias matronas, que non só consideran moi necesario achegar información profesional á mocidade, senón que tamén valoraron de xeito moi positivo os contidos e os obxectivos da campaña. Pola nosa banda, dende as concellarías de Mocidade, Sanidade e Educación queremos expresar o noso agradecemento e ofrecernos a ampliar esa colaboración co obxectivo de abordar do mellor xeito posible os problemas que afectan aos mozos e mozas na súa relación co sexo.

No último ano, a campaña de educación sexual saíu á rúa en diversas ocasións. Coincidindo coa celebración do Día do Amor ou das festas de San Xoán, o Concello de Carballo instalou nas zonas de maior afluencia da mocidade un posto informativo atendido por profesionais con formación específica en igualdade e violencia de xénero, que puideron resolver as dúbidas dos mozos e mozas. Ao mesmo tempo, co lema “Necesitas motivos para usar condón?” realizouse tamén a pé de rúa un reparto de paquetiños compostos por un preservativo, unha toalliña de hixiene íntima e un pequeno folleto no que se explican as vantaxes deste método de prevención das enfermidades de transmisión sexual e dos embarazos non desexados.

Coincidindo co Día da Sida, o pasado 1 de decembro realizamos unha campaña similar nos centros de educación secundaria en colaboración coa Cruz Vermella. Segundo a ONG Save the children, o 46,1% de adolescentes non usa sempre métodos de protección, e o 13,7% non o fai nunca ou case nunca. Nos últimos tempos, de feito, tense detectado un preocupante incremento das enfermidades de transmisión sexual entre a mocidade.